• Йеңилиқлар
• 16 Наурыз, 2018

Иттипақниң йеңи рәиси сайланди

Шәмшидин АЮПОВ, «Уйғур авази»/ Өткән һәптидә Қазақстан Язғучилириниң новәттики XV қурултийи болуп өтти. Қурултай икки қурултай арилиғида вапат болған 131 шаир-язғучини бир минут әскә елип, сүкүт сақлаш билән ечилди. Шуниңдин кейин сөз новитини алған Қазақстан Язғучилар иттипақи башқармисиниң рәиси Нурлан Оразалин өткән чарәк әсирдә қол йәткүзгән утуқлар билән әвәтилгән камчилиқларға тохтилип өтти.Қурултайға Қазақстан Җумһурийити Мәдәнийәт вә спорт министри Арыстанбек Мухамедиулы қатнишип, елимиз Президенти Нурсултан Назарбаевниң Тәбрик хетини оқуп бәрди. Униңда Дөләт рәһбири Қазақстан Язғучилар иттипақиниң XV қурултийиниң ечилиши билән тәбрикләп, қурултай ишиға утуқ тилигән. Қурултай давамида тәшкилий мәсилә қарилип, Язғучилар иттипақи башқармисиниң йеңи тәркиви бәкитилди. Униңға уйғурлардин Қазақстан Җумһурийитиниң хизмәт көрсәткән әрбаби Йолдаш Азаматов, Қазақстан Язғучилар иттипақи йенидики Уйғур әдәбияти кеңишиниң рәиси, язғучи-драматург Әхмәтҗан Һашири, алим вә шаирә Патигүл Мәхсәтова киргүзүлди. Ахирида очуқ аваз бериш нәтиҗилири бойичә Қазақстан Язғучилар иттипақи башқармисиниң йеңи рәиси болуп ақын вә журналист, Дөләт мукапитиниң лауреати Улықбек Есдәулет сайланди. Улықбек Есдәулет, 1954-жили Шәрқий Қазақстан вилайити Зайсан наһийәсиниң Үлкен Қаратал йезисида туғулған. 1977-жили С.Киров намидики ҚазДУниң журналистика факультетини, 1985-жили Москвадики М.Горький намидики Әдәбият институти йенидики Алий әдәбият курслириниң Поэзия бөлүмини тамамлиған. “Қанат қақты”, “Жұлдыз жарығы”, “Алтайдың алтын тамыры”, “Ақ керуен” вә башқиму китапларниң муәллипи. Униң әсәрлири рус, хитай, қирғиз тиллирида нәшир қилинған. Һәрхил жилларда “Жас қазақ” гезитиниң баш муһәррири, Қазақстан Җумһурийити Ташқи ишлар министрлигиниң бөлүм башлиғи, Мәдәнийәт, әхбарат вә җәмийәтлик разимәнлик министрлигиниң бөлүм башлиғи, Қазақстан Җумһурийити Премьер-министри идарисиниң Мәдәнийәт секториниң башлиғи, “Қазақ әдебиеті” гезитиниң вә “Жұлдыз” журналиниң баш муһәррири болуп ишлигән. Дөләт мукапитиниң, Қазақстан Ленин комсомоли, “Алаш” мукапатлириниң лауреати. “Құрмет” ордени билән мукапатланған, бирмунчә хәлиқара мукапатларниң саһиби.