• Әхбаратлар еқими
• 16 Наурыз, 2018

Фестиваль ғалиби аталди

Мәшүр САСИҚОВ, «Уйғур авази»/ Йеқинда Алмута шәһиридики Чайковский намидики музыка колледжида Тунҗа Президент фондиниң қоллап-қувәтлиши билән ІІ Хәлиқара яш пианистларниң «Pіano Fest Almaty – 2018» фестивали болуп өтти. Униңға Россия, Җәнубий Корея вә Хитай Хәлиқ Җумһурийитидин кәлгән 7 – 25 яш арилиғидики пианистлар қатнашти.Мәзкүр фестивальға жуқурида нами аталған колледжниң ІІ курс студенти Малика Яқуповаму иштрак қилған еди. Малика бу байқашта өзиниң талантини толуқ испатлап, тәңтушлири арисида І орунға сазавәр болди һәм Пәхрий ярлиқ вә маддий соғилар билән мукапатланди. Пианино челишта өзгиләрдин алаһидә пәриқләнгән Маликаға устазлириниң артқан үмүти чоң. Шуңлашқа у һазирниң өзидә дәл мошундақ утуқлири арқилиқ пәқәт уларниңла әмәс, ата-анилириниңму бешини көккә йәткүзүватиду. Малика җәнубий пайтәхтимизниң Заря Восток мәһәллисидики 151-мәктәпни тамамлиған. Униң сәнъәткә, йәнә келип, пианино челишқа ишқи бар екәнлигини байқиған ата-аниси пәрзәндигә барлиқ шараитни яритип беришкә тиришти. Оқуштин сирт, Малика мустәқил мәшиқлирини көпәйтип җиддий шуғулландидә, 9-синиптин кейин һеч ойланмай һөҗҗәтлирини Чайковский намидики музыка колледжиға тапшурди. Мана шуниңдин буян у тиришчанлиқ билән бу йәрдә әла баһаларға оқуп келиватиду. Устазлириниң ейтишичә, Малика җәмийәтлик ишларниңму паал иштракчиси екән. Колледж даирисидә өтүватқан бирқатар мәдәний чарә-тәдбирләрниң тәшәббускариму болған охшайду. Мәзкүр фестивальда Хәлиқара конкурсларниң лауреати, атақлиқ австриялик пианист Олег Маршев башлиған қазилар топини қайил қилған Малика Яқуповани утуғи билән тәбрикләп, келәчәктә пәрвазиңиз техиму егиз болғай демәкчимиз.