• Асасий мақалилар
• 16 Наурыз, 2018

Мәйрәмлик концертни тамашә қилди

Дөләт рәһбири 8-Март – Хәлиқара ханим-қизлар мәйримини нишанлашқа беғишланған «Көктем шуағы» тәнтәнилик концертини тамашә қилди. Дөләт рәһбири өз сөзидә Қазақстанниң барлиқ аяллирини 8-Март – Хәлиқара ханим-қизлар мәйрими билән тәбриклиди. Нурсултан Назарбаев аялларниң мәмликәт һаятидики алаһидә ролини тәкитләп, Қазақстанниң яш әвлади арисида әхлақий қәдрийәтләрни сақлашниң зөрүр екәнлигигә диққәт ағдурди. Аләмшумуллаштуруш шараитида биз қизлиримизға хас алийҗанап хисләтләрни сақлап қелишимиз керәк. Интернет дәвридә ташқиридин әхбаратниң келишини үзүл-кесил чәкләш мүмкин әмәс. Һәрбир қиз бала яхшини ямандин айривелиш үчүн ички сүзгигә егә болуши керәк, – деди Қазақстан Президенти. Дөләт рәһбири қобул қилинған Бәш иҗтимаий тәшәббусниң һәммидин авал Қазақстан җәмийитиниң аяллириға қаритилғанлиғини тәкитлиди. Нурсултан Назарбаев Қазақстан аяллириниң бойида елимиздики течлиқ вә бирликни күчәйтишкә тәсир қилидиған изгүлүк һәм бәрпакарлиқ энергиясиниң түгимәс мәнбәси муҗәссәмләнгәнлигини тәкитләп өтти. Һазир яш әвлатни тәрбийиләш вә униңға билим беришниң пүткүл системиси силәрниң зиммиңларда. Балилиримизға ғәмхорлуқ қилишниң асасий вәзиписи нәқ силәргә жүкләнгән, силәр уларниң тәпәккүрини шәкилләндүрүватисиләр вә уларда өзигә һәм өз күчигә болған ишәнчини пәйда қиливатисиләр. Силәр ишәнчә, үмүт вә муһәббитиңлар арқилиқ мәмликитимизниң утуқлуқ келәчигиниң мустәһкәм һулини селиватисиләр, – деди Қазақстан Президенти. Дөләт рәһбири һазир Қазақстанда чарәк миллионға йеқин аялниң «Алтын алқа» вә «Күміс алқа» пәхрий мукапатлириниң егиси екәнлигини тәкитлиди, шундақла вәтәндаш ханим-қизларниң дөләтниң изчил тәрәққиятиға чоң һәссә қошуватқанлиғини атап көрсәтти. Йеңи гражданларниң туғулуши вә милләтниң көпийиши – бу дөлитимизниң асасий стратегиялик мәхсити. Аяллар утуққа йәтмигән бирму саһа йоқ. Силәр кәспий вә спорт чоққилирини бойсундурдиңлар, илим вә сәясәт чоққилириға чиқтиңлар. Һазир үч миңға йеқин докторантниң 60 пайизи – бу аяллар. Мәҗлис депутатлириниң үчтин бир қисми – ханим-қизлар вәкиллири. Буни дөләт башқурушниң нәтиҗидарлиғини ашурушқа ярдәм қилидиған тоғра яндишиш дәп һесаплаймән, – деди Қазақстан Президенти. Нурсултан Назарбаев мәмликәтниң барлиқ әрлири намидин барлиқ ханим-қизларни йәнә бир қетим мәйрәм билән тәбриклиди вә уларға чәксиз бәхит-саадәт, муһәббәт һәм паравәнлик тилиди. Қазақстан Президенти сөзиниң ахирида Җәнубий Қазақстандин кәлгән көпбалилиқ ана А.Түзелбаеваға «Алтын алқа» вә астаналиқ Р.Аяғановаға «Күміс алқа» мукапатлирини тапшурди.