• Гезитимиз җанкөйәрлири
  • 29 Наурыз, 2018

Изгү ишларниң дәвәтчилири

Шәмшидин АЮПОВ, «Уйғур авази»/ Алмута шәһиридики уйғурлар зич орунлашқан Султанқорған жутида «Чигорин» дегән мәһәллә бар. Униң адәмлири өм, бир-бири билән иҗил-инақ яшаватиду. Жут вә униң адәмлири миллий урпи-адәт вә әнъәнилиримизни, диний етиқатимизни сақлап, җамаәт болуп яшимақта. Бу жутта шундақла миллий маарипимиз вә мәтбуатимиз җанкөйәрлириму нурғун. Норуз мәйрими күни мәзкүр мәһәллидә болуп, жут ғемида жүргән бир топ активистлар, гезитимизниң җанкөйәрлири билән учраштуқ. Мәһәллиниң жигитбеши Султан Исрапиловниң ейтишичә, жут өмлүги билән турғунларниң инақ-иттипақлиғиниң һули мәһәллә бәрпа болған дәсләпки жиллирила қелиплашқан. Уйғурларда «Жутниң ишини десә, ичиватқан ешини ташлап туруп кетиду» дегән ибарә бар. Бу ибарә Султан акиниң «пешанисигә» йезилған десәк, ашуруп ейтқанлиқ болмайду. У жигирмә жилдин бери жутниң һәләкчилигидә жүриду. У жут үчүн отқиму, суғиму киридиған инсан. Турғунлар арисидики өзара достлуқ билән иҗил-инақлиқни мустәһкәмләш, яшларни чоң әвлатниң мунасип избасарлиридин қилип тәрбийиләш, иҗтимаий-мәдәний мәсилиләрни биртәрәп қилиш охшаш ишлар билән җиддий шуғуллинип кәлмәктә. «Уйғур авази» гезитиға муштири топлаш йолидиму мәхсәтчанлиқ билән иш елип бериватиду. — «Ялғуз атниң чеңи чиқмас...» дегәндәк, маңа һәр қәдәмдә қол-қанат болуп, пикир-мәслиһәтлирини берип келиватқан Исмайил Зайиров, Юнусҗан Ғоҗамбиров, Гүлбаһар Баратова, Гүлбәһрәм Насирова, Мәрийәм Мирзабаева вә башқиму жутниң ақнийәтлик активистлиридин алаһидә миннәтдармән, – дәйду Султан ака сөһбәтара. – Улар жут мәнпийити үчүн паалийәтчанлиқ көрситип келиватқан инсанлар. Шуни қошумчә қилмақчимәнки, бийил мәһәллимиздә муштирилар санини көпәйттуқ. Алла буйриса, кәлгүсидә мәһәллимиздә гезитимизниң тарилишини йәниму көпәйтишкә һәммимиз болуп күч чиқиримиз. «Уйғур авази» — һәрбир уйғурниң авази, һаятимизниң әйниги. Мениңчә, миллий гезитимизға йезилмайдиған уйғур болмаслиғи керәк. Әнди маңа йеқиндин яр-йөләк болуп, паалийитимни һәр җәһәттин қоллап-қувәтләп келиватқан жуқурида исимлири аталған ярдәмчилиримму мәһәллимиз турғунлириниң «Уйғур авази» гезитиға толуқ дегидәк йезилишини тәминләп келиватиду. Чигорин мәһәллисидики жут активистлириниң еғиз толтуруп ейтқидәк ишлири, жутниң бәрикитини тәминләватқан чарә-тәдбирлири аз әмәс. Биз бу мақалида уларниң әмәлгә ашуруватқан чоң-кичик соваплиқ ишлириға тәпсилий тохтилип кәтмидуқ. Ундақ болғини, гезитимиз сәһипилиридә у тоғрилиқ буниңдин илгириму йезилған. Җәмләп ейтқанда, мәзкүр мәһәллиниң активистлири, һәқиқий виждани билән тәр төкүп, җамаәтчилик ишлирини йолға қоюп, миллий әнъәнилиримизни техиму риваҗландуруш йолида көп ишларни әмәлгә ашуруватиду. Умумән, Султанқорғанда бүгүнки күндә йүз бериватқан барлиқ изгү ишларда мәзкүр мәһәллә турғунлириниңму мунасип һәссиси бар. СҮРӘТТӘ: Чигорин мәһәллисидики гезитимизниң бир топ җанкөйәрлири. Ялқун МӨМҮНОВ чүшәргән сүрәт.

70 рет

көрсетілді

0

пікір
Алдыңғы мақала Дайим дост болуп қалайли!
Келесі мақала Яқупҗанниң яхшилиғи тола

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *