• Бизниң сөһбәт
  • 29 Наурыз, 2018

Ақ йол саңа, «Талант!»

Бәхтишат СОПИЕВ, «Уйғур авази»/ Йеқинда Алмутида «Талант» продюсерлиқ мәркизи қурулупту» дегәнни аңлап, уларға қәдәм тәшрип қилип, мәркәз мудири Азнәм Ғаппаровани сөһбәткә җәлип қилдуқ. – Йеңи продюсерлиқ мәркәз мубарәк болсун! Алди билән мәркәзниң қуруштики мәхситиңлар билән тонушуп өтсәк. Рәхмәт. Өзиңизгә мәлум, он жилдин ошуқ вақит давамида «Шавкәт-шоу» театр-студияси үнүмлүк паалийәт елип барған еди. Мана икки жил болуп қалди, униң мудири Шавкәт Нәзәров иҗадийәт билән шуғуллинишқа киришкәнлиги түпәйли, мәзкүр театр өз паалийитини тохтатти. Андин «Һәқиқий талантлар хәлиқ ичидә» дегән ибарә бар әмәсму. Уларниң һәммисиниң мувапиқ оқуш орунлирини пүтирип, кәспий театримизда ишләшкә шараити яр бәрмәйду. Көпчилигиниң ихтисадий җәһәттин қоли қисқа. Уларға ким ғәмхорлуқ қилиду? Уларниң кәспий җәһәттин өсүп йетилишигә ким зәмин яритиду? Мана мошу соаллар бизни мошу мәркәзни қурушқа дәвәт қилди. – Ундақта немишкә театр әмәс, продюсерлиқ мәркәз дәп атидиңлар? Сәвәвини билишкә боламду? – Әлвәттә. Биз пәқәт концерт программилирини тәйярлаш биләнла чәкләнмәймиз. Алла несип қилса, келәчәктә чоң-чоң сәһнә әсәрлирини сәһниләштүрүшни, шундақла кино чүширишниму көздә тутуватимиз. – Қоллап-қувәтләшкә әрзийдиған башланма екән. Лекин, өзиңиз ейтиватқандәк, бүгүнки ихтисадий еғир шараитта уларниң толуқ әмәлгә ешишиға ишинәмсиләр? – Биздә «бөридин қорқсаң, җаңгалға кирмә» дегән сөз бар. Биз тамашибинларниң қоллап-қувәтлишигә ишинимиз. Бизниң ишимизниң йемишини көргәндин кейин чоңирақ лайиһиләрни қолға алғанда сахавәтлик инсанларму қарап турмайду, дәп ойлаймиз. – Әнди мәркәз қурулуми билән тонуштуруп өтсиңиз? – Мәрһәмәт, мәркизимиз икки топтин ибарәт. Биринчиси, «Гәпбәрмәс» комикс топи. Иккинчи топ «Висал» дәп атилиду. «Гәпбәрмәсни» хәлиқ ичидин чиққан талантлиқ қизиқчи, һәвәскар актер Данияр Қунахунов башқуриду. Әнди «Висал» топиға болса, кәспий сазәндә вә композитор Бәхтияр Рәхмидинов йетәкчилик қилиду. – Намидин чиқип турғандәк, «Гәпбәрмәс» сатира йөнилишидә иш елип барса керәк? – Нәқ шундақ. Сәһнә сатирисини тәрәққий әткүзүштә «Шавкәт-шоу» теариниң ойниған роли чоң болди. Әнди бу театр йепилғандин кейин көплигән яшлар гаңгирап қалди. Әйнә шу театрниң әзалири паалийитини йәниму давамлаштурушни мәхсәт қилмақта. Әлвәттә, пәйдин-пәй йәниму йеңи талантлиқ жигит-қизлар қобул қилиниду. Шундақла биз бу қетимқи дәсләпки концертимизға әнжанлиқ қериндишимиз, иллюзионист-фокусник Аббас Абдуллаевни тәклип қилдуқ. Аббас дунияда әң күчлүк иллюзионистлар қатариға кириду. У көплигән хәлиқара конкурсларниң ғалиби. Шундақла Россияниң «Минута славы» конкурсида баш мукапат елишқа муйәссәр болған. – Әнди «Висал» топи һәққидә ейтип бәрсиңиз? – «Висал» топи концерт программилириниң музыка қисмини толуқтуриду. Өзиңиз билисиз, биздә һәрхил топ, ансамбльлар моҗут. Уларниң бесим көпчилиги заманивий, эстрадилиқ йөлиништә паалийәт елип бериватиду. Ойлап қарисақ, заманисида чоң аммибаплиққа айланған һәрқандақ нахша вақит өтүши билә унтулуп кетип бариду. Әвлаттин-әвлатқа өтүп келиватқан нахшилар камдин- кам. Әнди хәлиқ нахшилирини алсақ, улар әсирләр өтсиму өз қиммитини йоқатқини йоқ. Әксичә, бүгүнки күндә 25 яштин 60 яшқичә болғанлар һәммисиниң мәшрәплири моҗут. Мана шу мәшрәп әһлиниң һәммиси пәқәт хәлиқ нахшилирини сөйүп тиңшайду. Бу хошал боларлиқ һадисә, әлвәттә. Биз көпирәк мана шу миллий йөнилиштики аһаңларға көңүл бөлүшни нийәт қиливатимиз. Әнди заманивий шәкилдә йезилған нахшиларму диққәт мәркизимиздин қалмайду. Бизниң дәсләпки концертимизда тамашибинлиримиз миллий вә заманивий услубларда йезилған йеңи он төрт нахшини аңлап, бәһриман болалайду. – Сөһбитиңизгә рәхмәт, ишиңларға утуқ тиләймиз! – Ейтқиниңиз кәлсун. Пурсәттин пайдилинип, 8-апрель күни Алмута шәһиридики Жолдасбеков намидики студентлар сарийида өтидиған «Талант» продюсерлиқ мәркизиниң тунҗа концертиға сөйүмлүк гезитимиз «Уйғур авазиниң» барлиқ оқуғучилирини тәклип қилимиз.

238 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы