• Йеңилиқлар
• 29 Наурыз, 2018

«Жаңғыру жолы» һәрикитиниң вәзиписи – яшларни җипсилаштуруш

Мәмликәттә Қазақстан хәлқи Ассамблеясиниң йеңи «Жаңғыру жолы» җумһурийәтлик яшлар һәрикити қурулди. Униң тәсис конференциясигә Қазақстан Җумһурийитиниң дөләт кативи Гүлшара Әбдиқалықова қатнашти. Гүлшара Әбдиқалықова тәсис конференциясидә сөзгә чиқип, «Жаңғыру жолы» һәрикитиниң қурулушиниң Қазақстанниң стратегиялик йолини қәтъий қоллап-қувәтләш испати екәнлигини тәкитлиди. Дөләт кативиниң қәйт қилишичә, «Рухани жаңғыру» программисиниң әмәлгә ашурушқа һәссә қошидиған паалийәтчан яшларни бирләштүрүш – униң асасий вәзиписи болуши керәк. Яш әвлат билән ишләш биз үчүн асасий йөнилиш болуп һесаплиниду, – дәп тәкитлиди Қазақстан хәлқи Ассамблеяси Рәисиниң орунбасари – Қазақстан Җумһурийити Президентиниң Мәмурийити ҚХА Кативатиниң мудири Леонид Прокопенко. – Биринчидин, мәмликәтниң келәчиги мәмликәтниң йеңи гражданлириға тәәллуқ, улар үчүн Қазақстан һәрқачан мустәқил болған. Иккинчидин, һазирқи шараитта қазақстанлиқ охшашлиқни, вәтәнпәрвәрликни күчәйтиш мәмликитимиз вә униң гражданлириниң аләмшумул дуниядики риқабәткә тақабил турушниң муһим асаслириниң биригә айланмақта. Үчинчидин, җәмийәтлик аң-сәвийә вә умуммиллий бирликму Қазақстанниң күчлүк риқабәткә қабил әвзәллигигә айланди вә стратегиялик иҗтимаий, ихтисадий ислаһатларни әмәлгә ашуруш шуларға бағлиқ. Төртинчидин, гражданларниң қатнишиши аң-сәвийәни йеңилашниң асаси болған вә шундақ болиду. Бәшинчидин, җәмийәтлик аң-сәвийәни йеңилаш, биринчи новәттә, яшларға мунасивәтлик. Яшлар инновацияләрниң, очуқ аң-сәвийәниң билимниң, прагматизмниң вә риқабәткә қабиллиқниң, миллий кодниң егиси болуп һесаплиниду. Мән мәзкүр һәрикәт программисини диққәт билән қарап чиқтим вә у йеңи җәмийәтлик аң-сәвийәни шәкилләндүрүш вәзипилирини, мәмликәтни йеңилаш вәзипилирини толуқ әкис әттүриду. ҚХА Рәисиниң орунбасари Ассамблеяниң җәмийәтлик аң-сәвийәни йеңилаш бойичә бирқатар программилириға диққәт ағдурди вә яшларни уларға қатнишишқа тәклип қилди. Мәсилән, улар «Туған жер», «Қазақстанниң муқәддәс җайлири» лайиһилирини әмәлгә ашурушқа қатнашса болиду. ҚХА «Қазақстандики 100 йеңи исим» программисиға қатнишишни давамлаштуруватиду вә буниңдиму яшларниң тәшәббуслири чоң роль ойнайду. Бу тизимға шундақла Дин ишлири вә гражданлиқ җәмийәт министрлиги әмәлгә ашуруватқан лайиһиләрни қошушқа болиду. Биз йеңи һәрикәтни һәртәрәплимә қоллап-қувәтләймиз, мәркәздә вә җайларда униң ишлиши үчүн зөрүр болған барлиқ шараитни яритимиз, – дәп ишәндүрди Леонид Прокопенко. Шуниңдин кейин конференциядә җумһурийәтлик һәрикәт программиси муһакимә қилинди, ҚХА әзаси Максим Споткай «Жаңғыру жолы» җумһурийәтлик яшлар һәрикитиниң рәиси болуп сайланди. Андин кейин конференциягә қатнашқучилар Президентниң Бәш иҗтимаий тәшәббусини, җәмийәтлик аң-сәвийәни йеңилаш программисиниң асасий йөнилишлирини, «Жаңғыру жолы» һәрикитиниң 2018 – 2020-жилларға бәлгүләнгән стратегиясини муһакимә қилди.