• Әхбаратлар еқими
• 29 Наурыз, 2018

Улуқ мәдәнийәтләрниң қериндашлиқ томури

Қазақстан вә Өзбәкстан Президентлири Нурсултан Назарбаев билән Шавкәт Мирзиёев Өзбәкстанниң Қазақстан Җумһурийитидики Жилини ачти. Тәнтәнилик мәрасим «Астана Опера» дөләт опера вә балет театрида болуп өтти. Дөләт рәһбири өзиниң тәбрик сөзидә Астана вә Ташкәнтниң сода-ихтисадий вә инвестициялик һәмкарлиқни утуқлуқ тәрәққий әткүзүватқанлиғини, муһим хәлиқара вә регионлуқ мәсилиләрни һәл қилишта охшаш көзқарашқа егә екәнлигини тәкитлиди. – Өзбәкстанниң Қазақстандики Жили хәлиқлиримиз мунасивәтлириниң һәқиқий қериндашлиқ характериға егә екәнлигини әкис әттүриду. Мунасивәтләр әсирләр мабайнида қелиплашқан вә әҗдатлиримизниң шанлиқ умумий тарихи, бай роһий мираси билән мустәһкәмләнгән, – дәп тәкитлиди мәмликитимиз Президенти. Дөләт рәһбири мәзкүр чарә-тәдбирниң Қазақстан-Өзбәкстан достлуғи вә яхши хошнидарлиғиниң рәмзи сүпитидила әмәс, бәлки пүткүл регион шериклигини һәм мәдәний-цивилизациялик йеқинлиғини күчәйтишкә салмақлиқ һәссә қошидиған вақиә сүпитидиму алаһидә әһмийәткә егә екәнлигини тәкитлиди. Нурсултан Назарбаев сөзиниң ахирида мәмликәтлиримиз оттурисида иккитәрәплимә сәясий, ихтисадий вә мәдәний мунасивәтләрни күчәйтиш һәм тәрәққий әткүзүшкә чоң һәссә қошқанлиғи үчүн Өзбәкстан Президенти Шавкәт Мирзиёевни І дәриҗилик «Достық» ордени билән мукапатлиди. Өз новитидә Шавкәт Мирзиёев Нурсултан Назарбаевқа әмгигини жуқури баһалиғанлиғи үчүн миннәтдарлиқ билдүрди вә Қазақстанда Өзбәкстан Җумһурийитиниң Жилини өткүзүш тәшәббусини көтәргәнлиги үчүн чоңқур тәшәккүр изһар қилди. Шавкәт Мирзиёев Қазақстанниң изчил сәясий өзгиришлири вә ихтисадий ислаһатлирини, жирақни көздә тутидиған вә чоңқур ойлаштуридиған аләмшумул һәм регионлуқ тәшәббуслирини тилға елип, уларниң пүткүл дунияда етирап қилиниватқанлиғини алаһидә тәкитлиди. Шундақла Өзбәкстан Президенти Нурсултан Назарбаевниң пүткүл региондики течлиқ, турақлиқ вә гүллиниш үчүн Мәркизий Азия мәмликәтлириниң интеграциялик һәмкарлиғидики ролини алаһидә тәкитлиди. Шавкәт Мирзиёев икки мәмликәт оттурисида мәдәний-гуманитарлиқ саһалардики мунасивәтләрни тәрәққий әткүзүшниң жуқури әһмийәткә егә екәнлигини вә Өзбәкстанда қазақ хәлқиниң улуқ шаир-мутәпәккүри Абай Қунанбаев мирасини чоңқур үгиниш һәм тәрғип қилиш тоғрилиқ Президент тохтаминиң қобул қилинғанлиғини тәкитлиди. Мәрасим Өзбәкстан сәнъәт маһирлириниң чоң концерти билән давамлашти. Шундақла «Астана Опера» театрида хошна мәмликәт декаратив-әмәлий сәнъәт маһирлири әсәрлириниң көргәзмиси болуп өтти. Қазақстандики Өзбәкстан Жилини тәнтәнилик ечиш мәрасимиға Қирғизстан вә Таҗикстан Президентлири Сооронбай Жээнбеков билән Эмомали Рахмон қатнашти.