• Асасий мақалилар
• 29 Наурыз, 2018

Узақ муддәтлик һәмкарлиқ һули

Нурсултан Назарбаев Бирләшкән Әрәп Әмирликлиридә рәсмий сәпәрдә болди. Учришиш мәрасимидин кейин Нурсултан Назарбаев Абу-Дабиниң мирасхор шаһзадиси, Бирләшкән Әрәп Әмирликлириниң Қураллиқ күчлири Алий Баш қоманданиниң орунбасари шейх Муһәммәд бен Заид Әл Нахаян билән кәңәйтилгән тәркиптә музакириләрни өткүзди. Қазақстан Президенти Муһәммәд бен Заид Әл Нахаянға сәмимий қарши алғанлиғи үчүн миннәтдарлиқ билдүрди. Мениң сәпиримниң Бирләшкән Әрәп Әмирликлириниң асасини салғучи Заид бен Султан Әл Нахаян тәвәллудиниң 100 жиллиғида өтүватқанлиғи рәмзликтур. Мән Сизниң атиңиз билән тонушуш шәрипигә еришкән едим, – деди Нурсултан Назарбаев. Дөләт рәһбири қериндашлиқ мунасивәтләрниң вә үнүмлүк учришишларниң икки мәмликәт оттурисидики алақиларниң тәрәққиятиға йеңичә күч-қувәт бериватқанлиғини тәкитлиди. Өзара келишимләрниң әмәлгә ашурулуши түпәйли пәқәт 2017-жилдила сода көләми 2 һәссә – 374 миллиондин 643 миллион долларға өсти, 2015-жилдин етиварән болса, 6 һәссә өсти, – деди Қазақстан Президенти. Нурсултан Назарбаев мәмликәтләр оттурисида визисиз тәртипни киргүзүшниң пайдилиқ екәнлигини тәкитлиди вә тәрәпләрниң инвестицияләрни һимайә қилиш, космос технологиялири, гидроэнергетика, нефть-химия, йеза егилиги вә әхбаратлаштуруш саһалиридики һәмкарлиқни техиму чоңқурлитишқа мәнпийәтдар екәнлигини тилға алди. Ахирида Дөләт рәһбири БӘӘ Президенти Халиф бен Заид Әл Нахаянға салам ейтти вә мирасхор шаһзадә Муһәммәд бен Заид Әл Нахаянни Қазақстанға рәсмий сәпәр билән келишкә тәклип қилди. Өз новитидә Муһәммәд бен Заид Әл Нахаян Нурсултан Назарбаевқа рәсмий сәпәр билән келиш тәкливини қобул қилғанлиғи үчүн миннәтдарлиқ билдүрди. Шәхсән өзәмниң вә өз хәлқимниң намидин Сизни Бирләшкән Әрәп Әмирликлири йеридә қарши елишқа рухсәт қилғайсиз. Сизниң сәпириңизниң утуқлуқ болидиғанлиғиға үмүт қилимән. Бүгүн биз бирқатар муһим иккитәрәплимә һөҗҗәтләрни имзалаймиз. Өз тәрипимдин һәртәрәплимә һәмкарлиққа тәйяр екәнлигимни билдүримән, – деди Муһәммәд бен Заид Әл Нахаян. Рәсмий сәпәр давамида тәрәпләр оттурисида муһим һөҗҗәтләр имзаланди.