- Асасий мақалилар
- 29 Наурыз, 2018
Тәбрик телеграммилирини йоллиди
Нурсултан Назарбаев Владимир Путинға Россия Президенти сайлимида
ғалип чиқиши мунасивити билән тәбрик телеграммисини әвәтти. Дөләт рәһбири Қазақстан хәлқиниң вә шәхсән өзиниң намидин Владимир Путинниң Россия Федерациясиниң Президенти лавазимиға тәкрар сайлиниши билән тәбриклиди. Қазақстан Президенти сайламдики ишәшлик ғалибийәтниң Россия хәлқиниң Владимир Путинниң өз мәмликитиниң тәрәққиятиға вә униң миллий мәнпийәтлирини илгирилитиш ишиға қошқан чоң һәссисини новәттики қетим жуқури баһалишиниң испати болуп һесаплинидиғанлиғини тәкитлиди.
«Сизниң нәтиҗидарлиқ рәһбәрлигиңиздә Россия миқияслиқ сәясий вә ихтисадий ислаһатлар, аһалиниң иҗтимаий паравәнлигини ашуруш вә актуал аләмшумул һәм регионлуқ проблемиларни һәл қилишқа актив қатнишиш йолида ишәшлик илгириләватиду.
Сизниң мәмликәтлиримиз оттурисидики әнъәнивий достлуқ вә яхши хошнидарчилиқ мунасивәтләрни риваҗландурушқа қошуватқан шәхсий һәссиңизни алаһидә тилға алғум келиду, улар стратегиялик шериклик һәм иттипақдашлиқниң ярқин мисали болуп хизмәт қилмақта.
Қазақстан хәлиқлиримизниң бәхит-саадити үчүн Россия билән һәм иккитәрәплимә шәкилдә, һәм Евразия ихтисадий иттипақи даирисидә алақиларни кәңәйтишни давамлаштурушқа нишан қилинған.
Буниңда мән бизниң ишәнчә вә өзара чүшәнчигә асасланған достлуғимизни жуқури баһалаймән һәм қәдир тутимән.
Ишинимәнки, бизниң буниңдин кейинму бирләшкән ишимиз Астана вә Москваниң көпқирлиқ һәмкарлиғимизниң барлиқ йөнилишлири бойичә утуқлуқ диалогниң пухта һули болуп хизмәт қилиду», дейилиду телеграммида.
Нурсултан Назарбаев Владимир Путинға мустәһкәм саламәтлик, бәхит-саадәт вә җавапкәрлик дөләт лавазимида йеңи утуқлар, достанә Россия хәлқигә болса, течлиқ вә паравәнлик тилиди.
107 рет
көрсетілді0
пікір