• Замандаш
  • 05 Сәуір, 2018

Пул адәттики жүк болғанда

Мәшүр САСИҚОВ, «Уйғур авази»/ Әркин Абдурешит оғли Әхмәтов үчүн аилисидикиләр, қом-қериндашлири вә умумән уларниң әвлади хизмәт қиливатқан малийә системиси, немишкиду, хәтәрлик билингән екән. Амма тәғдир уни йәнила мошу саһада ишләшкә елип кәлди. Бирақ у, башқа қериндашлириға охшаш, идаридә олтирип, аһалиға хизмәт қилиш билән шуғулланмай, мишкап-мишкап ахчиларни банктин-банкиға яки шәһәрдин-шәһәргә тошуп, инкассатор сүпитидә, аддий тил билән ейтқанда, җенини дәттикамға тикип жүрди. Әлвәттә, Әркин Әхмәтов тәғдирниң бу язмишиға пушайман йегини йоқ. Әксичә, өз иши пәхирләнди. Пәйдин-пәйдин у мәзкүр кәсипниң қир-сирини чоңқур үгинип, әндила кәсипдашлири арисида тәҗрибилик инкассатор аталғинида, Кеңәш Иттипақи ғулиди. Қазақстан Җумһурийити мустәқилликкә ериштидә, өзиниң миллий валютиси — тәңгини муамилигә чиқириду. Әйнә шу йеңи ахчини Москвадин Алмутиға тошуш мәсилиси көтирилиду. Бу муһим вә мәхпий һаләттә жүргүзүлидиған паалийәткә Әркин Абдурешит оғлиму иштрак қилиду. Сөһбәтдишимниң маңа ейтип бериватқан мошу сәргүзәштилирини аңлап, дәрһал униңдин «Әркин ака, елимиздә шу чағлардики ихтисадий әһвални ядимизға алсақ, силәргә бир күнниң ичидә бай болуп кетиш пурсити яралған екән. Кеңәш Иттипақиниң пахал пулини хелила авуштуруп үлгәргәнсиләр?», дегән соални қойдум. У күлүмсиригән һалда мундақ дәп җавап бәрди: – Растини ейтсам, маңа бу соални қоюватқан ялғуз сән әмәс. Биринчидин, һөкүмәт биздин бу сирни сиртқа чиқармаслиғимизниң капалити сүпитидә һәрбиримиздин алаһидә тилхәт алғандин ташқири, паспортлиримизға мәхсус мөр басти. Буниңдин кейин қиливатқан ишиң тоғрилиқ бир еғиз сөз қилип көр. Сән өзәңниң бир кечидә қандақ түрмигә чүшүп қалғиниңни сәзмәй қалардиң. Әнди буниңға қошумчә ейтип кетидиған нәрсә, инкассаторлар үчүн пул пәқәт «жүк» болуп һесаплиниду. Бизниң вәзипимиз — уларни бәлгүлүк бир җайдин елип, йәнә бир җайға йәткүзүш. Шуңлашқа инкассаторлуққа ишқа қобул қилинған шәхсниң пулға болған мунасивити алаһидә тәкшүрүштин өтиду. 1985 – 1992-жиллар арилиғида Қ.Сәтбаев намидики Қазақ политехника институтида билим алған Әркин Абдурешит оғли бир күнму өз кәспи билән ишлимәпту. Униң сәвәвиму, жуқурида тәкитлигинимиздәк, аилиси билән қериндашлириниң бир саһада хизмәт қилиши болуп чиқти. Сөһбәтдишимниң алий билим дәргаһиниң дипломини қолиға алған күндин башлапла, банк системисиға ишқа орунлашқанлиғиға бийил чарәк әсирдин ешипту. Мошу вақит мабайнида инкассатор болуп, бирдә автомобильда, бирдә самолетта пул тошимиған йери қалмиди. Әнди җинайәтчиләрниң әң биринчи нишани болған бу кәсиптә ишләш җәриянида униң кәсипдашлири билән қанчилик түнләрни уйқисиз, дәккә-дүккидә өткүзгәнлигини тәсәввур қиливелиш тәс болмиса керәк. Лекин қорқумсиз, өз ишиға берилгән инсанларниңла қолидин келидиған бу кәсип егилириниң җасурлуғи түпәйли, җумһурийәт аһалисиниң нәқ пулға болған еһтияҗи өз мәзгилидә һәл қилиниватиду дәп ейтишқа асас бар. Алдиға қойған мәхсити ениқ, җавапкәрликни чоңқур һис қилған Әркин Әхмәтов пәйдин-пәй иш бабида өсүп, һазир АТФ банк тәркивидики «Төбет Group» җавапкәрлиги чәкләнгән йолдашлиғиниң баш мудири хизмитини атқуруватиду. Қол астидики йүздин ошуқ инкассаторларға рәһбәрлик қилишқа униң узун жиллиқ тәҗрибиси һәр күни «ярдәмгә» келиду. Чүнки бу кәсип башқа кәсипләрдин хелила пәриқлинидиған болуп, хадимларниң җисманий җәһәттин сағламлиғини сақлаш вә улардин, худди һәрбийләр охшаш, тәртип-интизамни тәләп қилиш асанға чүшмәйду. Мана мошуларниң һәммисини өз бешидин өткүзгән Әркин Әхмәтов инкассаторларға уларниң бир күни болмисиму бир күни әсқатидиғанлиғини дайим әскәртиду. Тәҗрибилик рәһбәрниң ейтқинини икки қилмайдиған ширкәт хадимлири бүгүнки күндә җумһурийитимиздә паалийәт елип бериватқан нурғунлиған нәқ пул билән ишләйдиған банк, мәһкимә вә карханиларниң хиҗалитидин чиқиватиду. Өз новитидә, ишәшлик, әң муһими, сүпәтлик хизмәт қиливатқан, йәни Әркин Абдурешит оғли рәһбәрлигидики инкассаторлар коллективиға уларниң ейтар миннәтдарлиғи чәксиз. Һаятта рәпиқиси Саламәтхан билән үч пәрзәнт сөйгән Әркин Әхмәтовниң әмгәк паалийити тоғрилиқ ейтаримизни мошу йәрдә тамамлисақму болатти. Амма биз униң билән сөһбәтлишиш җәриянида Алмута шәһириниң нәқ мәркизидә туғулуп-өскәнлигигә қаримай, уйғур тилида таза сөзлиши бизни толиму қайил қилди. Униң үстигә қәһриманимиз бу күнләрдә әллик яшлиқ тәвәллудини нишанлаватиду. Бир кәсиптә чарәк әсир әмгәк қилип, тилға аларлиқ утуқ-муваппәқийәтләргә қол йәткүзгән акимизға мустәһкәм саламәтлик вә аиләвий хатирҗәмлик тиләймиз.

75 рет

көрсетілді

0

пікір
Алдыңғы мақала Закир МӘМИРОВ: “Мениң һаятимда пәқәт бирла устазим болди”
Келесі мақала Қолиңиз талмисун, Уста!

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы