• Гезитимиз җанкөйәрлири
• 05 Сәуір, 2018

Жутниң ғемида жүргәнләр

Сабирәм ӘНВӘРОВА, «Уйғур авази»/ Жутдашлири билән тәң күлүп, тәң муңуп, уларниң отидин кирип, сүйидин чиқип жүргән жигитбашлириниң әмгиги бебаһа. Йошуридиғини йоқки, жигитбеши той-төкүн, нәзир-чирақта һәммини назарәт қилип жүрсә, «немә қиливатқанду бу?» дәйдиғанларму йоқ әмәс. Әмәлиятта, жуттики чоң-кичик мәсилиләр мана шу жигитбашлириниң ярдими билән һәл қилиниду. Чонҗа – Уйғур наһийәсиниң мәркизи болупла қалмай, әң чоң жутларниң бири. Бу йезида бир әмәс, 30ға йеқин жигитбеши бар. Һәммисиниң мәхсити бир: жутқа хизмәт қилиш. Әйнә шундақ жутниң ғеми билән яшаватқан теги-тәкти ачиноқилиқ Нурмәһәмәт Арипов (сүрәттә оңдин солға), Демьян Оғулғазиев, Ерлан Қурбановни тонимайдиған чонҗилиқ камдин-кам болса керәк. Барлиғи жут алдида алаһидә һөрмәт-еһтирамға егә, қәдирлик инсанлардин. Әлниң алқишиға егә болуш үчүн шуниңға лайиқ тәр төкүш керәк. Хулләс, бу қәдирдан инсанларни адимийлик хисләтлири, жутқа сиңгән әмгиги, хәлиқкә болған муамилиси билән көпчиликниң ишәнчисигә һәм һөрмитигә сазавәр болди десәк, хаталашмаймиз. Нурмәһәмәт ака 1994-жилғичә Уйғур наһийәлик истималчилар жәмийитидә әмгәк қилиду. 2001 – 2008-жиллири Чонҗа йезилиқ һакимийәттә ишлигән болса, 2008-жилдин та мошу күнгичә «Аһалиға хизмәт көрситиш мәркизидә» әмгәк қиливатиду. 1993-жилдин тартип жигитбеши болуп сайлинип, 2017-жилдин етиварән наһийәниң чоң жигитбешиниң орунбасари хизмитиниң һөддисидин чиқмақта. Әмгиги мунасип баһалинип, 2017-жили җумһурийәтлик Уйғур этномәдәнийәт мәркизиниң «Сахавәт» медали, бийил Алмута вилайәтлик Уйғур этномәдәнийәт мәркизиниң Пәхрий ярлиғи билән мукапатланди. Бүгүнки күндә 3 балиниң атиси һәм үч нәвриниң бовиси. Кәтмән йезисида туғулуп өскән Демьян Оғулғазиев ана жутидики оттура мәктәпни тамамлиғандин бу ян әмгәктин қол үзгән әмәс. Бу күнләрдә у «Ұйғыр су құбыры» мәһкимисидә ишләватиду. Демьян ака Оғулғазиев җәмийәтлик ишлардики паалийәтчанлиғи түпәйли җумһурийәтлик Уйғур этномәдәнийәт мәркизиниң Пәхрий ярлиғи билән тәғдирләнгән. Шундақла у үч пәрзәнт сөйүп, барлиғини алий билимлик қилған ғәмгүзар ата. Қурбановлар аилисини жут «сазәндиләр сулалиси» дәп атап кәткән. Ерлан ака Қурбановму қутлуқ Кәтмән жутидин. 1978-жили Хәшкиләң шәһиридики музыка техникумини түгитип, наһийәлик музыка мәктивидә әмгәк йолини башлайду. Көплигән талантлиқ яшларни тәрбийиләп қатарға қошиду. Бүгүнки күндиму яшларға музыка пәнидин дәрис бериш билән бәнт. Рәпиқиси Һөрмәтхан һәдиму музыкидин дәрис берип, һөрмәтлик дәм елишқа чиққан пешқәдәм устаз. Уларниң пәрзәнтлириму сәнъәткә иштияқ бағлиған инсанлар. Бүгүнки күндә Чонҗа йезисида истиқамәт қилип келиватқан Нурмәһәмәт, Ерлан, Демьян акилар – жутниң хизмитидә, хәлиқниң һөрмитидә жүргән инсанлар. Һәр үчилиси «Нур Отан» партиясиниң әзаси. Һәрқандақ чарә-тәдбирдә һәрқачан сөзини хәлиқниң мәнпийитидин башлайду. Уларниң һәрбиригә тәпсилий тохтилишимниң сәвәви, баһарниң бүгүнкидәк иллиқ күнлиридә һәр үчи 60-баһарини қарши алмақта. Сөз ахирида, тәвәллуд егилирини ушбу хошаллиғи билән тәбрикләп, меһнитиңларниң һалавитини көрүп, бүгүнкидәк жут адәмлириниң қәлб төридин орун елип жүрүвериңлар, демәкчимиз.