• Әхбаратлар еқими
• 05 Сәуір, 2018

диққәткә сазавәр хәвәрләр

“Болашақтики” өзгиришләр ҚҖ һөкүмити “Болашақ” стипендияси үчүн намзатларни таллаш қаидисигә бәзибир өзгиришләрни киргүзди. Әнди, мошу мәсилә бойичә һөкүмәт қобул қилған тохтамға мувапиқ, илгири егә болған стипендияни пайдиланмиған вә оқушқа яки тәҗрибидин өтүшкә киришмигән шәхсләр, әгәр уларниң Мәркәз алдида қәризи болмиса, конкурсқа иккинчи қетим қатнишиш һоқуқи берилиду. “Өз алдиға оқушқа чүшкәнләр” категорияси бойичә конкурсқа қатнишидиған намзатларға қойилидиған тәләп бакалавр яки мутәхәссислик дипломи 3.3тин 3.0 GPA оттура пайғичә төвәнлитилди. Шундақла Қазақстандики тил үгиниш курслирини пүтәргәндин кейин шу тилни қанчилик дәриҗидә өзләштүргәнлигини ениқлайдиған назарәт механизми киргүзүлди. Мошу тесттин өтәлмигән стипендия егиси икки ай ичидә йәнә бир қетим тестқа қатнишиш һоқуқиға егә. Әгәр униңдинму өтәлмисә, стипендиядин мәһрум болиду. Мутәхәссисләрниң пикричә, әң муһим өзгириш “Болашақ” программиси түләклириниң мутәхәссислиги бойичә ишлишини капаләтләндүрүш нормисини җарий қилиш болуп һесаплиниду. Муәллимләр үчүн – 62 млрд. тәңгә ҚҖ малийә министри Бахыт Султанов җумһурийәтлик бюджет лайиһисигә қошумчә ениқлима бәрди. “2018-жилниң җумһурийәтлик бюджетиниң чиқими 417 миллиард тәңгигә көпийип, январь ейидики ениқлима бойичә, 9 триллион 643 миллиард тәңгини тәшкил қилди”, деди малийә министри Б.Султанов. Мошу мәбләғдин тәхминән 292,5 млрд. тәңгә Дөләт рәһбириниң Бәш иҗтимаий тәшәббусини әмәлгә ашурушқа хәшлиниду. “Җүмлидин муәллимләрниң айлиқ маашини 30 – 50 пайиз көтириш үчүн – 62 млрд. тәңгә, “Назарбаев Университетини” йәниму тәрәққий әткүзүш үчүн – 31,7 млрд. тәңгә, накаларни күтүп-беқиватқан шәхсләргә ярдәм пул үчүн – 2,7 млрд. тәңгә бөлүниду” дәп тәкитлиди министр. Булардин ташқири бюджетта йезиларни ичидиған су билән тәминләш вә селиниватқан турушлуқ өй объектлириға инженерлиқ-коммуникациялик инфрақурулумларни тартиш үчүн 31,5 млрд. тәңгә, йәрлик йоллар тармақлирини җөндәш үчүн 29 млрд. тәңгә қошумчә мәбләғ қараштурулған. Әнди 20 минут тәләп қилиниду Әнди өзәңниң турушлуқ җайида ройхәткә елиниш үчүн дөләтлик баж селиғини төләш тәләп қилинмайду. Қазақстанда электронлуқ һөкүмәт порталида турушлуқ җай бойичә онлайн-ройхәткә елиниш җәрияни өзгәрди. Әнди нопузға олтириш үчүн бари-йоқи 20 минут тәләп қилиниду. ҚҖ Селиқ кодексиға киргүзүлгән өзгиришләр түпәйли, 1-январьдин тартип ройхәткә елиниш үчүн дөләтлик баж селиғи төләнмәйду. Илгири электронлуқ һөкүмәт порталида нопузға елиниш үчүн айлиқ һесап көрсәткүчиниң 10 пайизи миқдарида дөләтлик баж селиғи төлинәтти вә шуниңдин кейинла “Гражданлар үчүн һөкүмәт” дөләт корпорациясиниң идариси арқилиқ миграция хизмитиниң хадимлири шәхсий гуванаминиң чипиға ройхәткә елинғанлиғи тоғрилиқ әхбаратни язатти. Әнди март ейидин башлап электронлуқ һөкүмәт портали арқилиқ нопузға елиниш хелила йеникләштүрүлди: egov.kz сайти арқилиқ қозғалмайдиған мүлүк егиси өзиниң разилиғини электронлуқ-рәқәмлик имзаси билән тәстиқләйду, андин ройхәткә елинмақчи болған шәхс әризә бериду. Аридин 20 минут өткәндин кейин ройхәткә елинғанлиғи тоғрилиқ йеңи мәлуматларни елишқа болиду. Әгәр раст екәнлигигә ишәнсәк... Мошу һәптидә: Мухтар Шаханов: “Биз чеқирап жүргәндә, Муқағалиниң һарақ ичиштин қоли бошимиди. (Шаирниң новәттики бу билдүрүши иҗтимаий торларни бир тәвритивәтти). Чимкәнт шәһиридә музшекәрдин зәһәрләнгән адәмләрниң сани 180дин ешип кәтти. (Пәқәт шуниңдин кейинла бу ишқа вилайәт һакими Жансейит Қансейитулы арилашқан). Бир банк бөлүмчисиниң ечилиш тәнтәнисидә нахша ейтқан Дилназ Әхмәдиева нака балиларниң алдиға кәлмиди. (Атақлиқ иҗрачини нака балилар билән уларниң ата-анилири кам дегәндә 100 минут күтүп олтарған). WBC президенти Головкин билән “Канело” арисидики “җәңниң” өтмәйдиғанлиғини хәвәрлиди. (Һәтта бу учришишни уюштурғучилар униң рекламисиниму тохтатти). Ақмола вилайитидә бир аял 20 жилдин бери “өлүп кәтти” дәп һесаплап жүргән өзиниң акисини тепивалди. (Регионда адәм ишәнгүсиз вақиәләрниң бири орун алди). Чиркода Қуръан сүрилириниң бирини оқуған Ердоған христианларниң аччиғини кәлтүрүп қойди. (Түркия Президенти Провослав чиркосида хасийәтлик Қуръандин елинған сөзләрни тәкрар-тәкрар ейтқанлиғи христианларға яқмиди). Тәйярлиған Иврайим БАРАТОВ.