• Яшлар вә вақит
• 05 Сәуір, 2018

Ярдәмгә... өшкиләр кәлди

Гөһәрбүви ИСМАЙИЛҖАНОВА, «Уйғур авази»/ Ағриқниңғу яхшиси йоқ. Бүгүнки күндә болупму сил кесили адәмләрни һәләйкүмгә салмақта. Мутәхәссисләрниң ейтишичә, кох бактериялири арқилиқ жуқидиған бу ағриқ яш таллимайду. Һәтта униңға йеңи туғулған наресидиләрму муптила болуши мүмкин. Чүнки у һава арқилиқму жуқиду. Бу ағриққа дучар болғанлар алтә ай давамида турақлиқ даваланса, сәллимаза сақийип кетидекән. Елимиздә бу кесәлликни давалаш һәқсиз. Ечинарлиғи, сил кесилигә дучар болғанлар сани жилдин-жилға өсмәктә. Статистикилиқ мәлуматларға асаслансақ, 2017-жили Қазақстанда сил кесилигә 17 444 адәм муптила болған. Алмута вилайити бойичә 1591 адәм рәсмий тиркәлгән болса, униң 32 Панфилов наһийәсидә яшайдекән. 2018-жили сил кесилигә челиққанларни ениқлаш вә давалаш үчүн дөләт бюджетидин 42 миллиард тәңгә бөлүнүпту. Йеқинда Панфилов наһийәлик һакимийәтниң мәҗлисләр залида өткән уйғунлаштуруш кеңишиниң мәҗлисидә медицина хадимлири ағриқни давалаштин көрә, униң алдини елиш чарилиригә әһмийәт бериш керәклигини чүшәндүрди. Тәкитләш керәкки, наһийәдә сил кесилиниң алдини елиш бойичә яркәнтлик Алмаз Батырхан бир яхши ишни башлапту. Ениғирағи, Алмаз ушбу кесәлни өшкә сүти арқилиқ давалашни қолға апту. Алмаз Қазақстан Җумһурийити Билим вә пән министрлигиниң қоллап-қувәтлиши арқилиқ Дуниявий тәрәққият банкидин 1 миллион тәңгилик грантқа қол йәткүзгән. Алмазға тиҗарәтчиләр Назим Меделханқизи билән Дилфайруз Маһмут қизи ярдәм қолини сунған. Тиҗарәтчиләр есил нәсиллик сүтлүк өшкиләрни елишқа ярдәмләшкән. Һазир улар Яркәнт шәһиридики сил кесили дохтурханисидикиләрни өшкә сүти билән һәқсиз тәминләватиду. – Бизниң диспансерда бүгүнки күндә һәрхил яштики 32 бемар давалиниватиду. Улар һәр күни дора-дәрмәкләрдин башқа Алмазниң өшкилириниң сүтини ичишкә үгәнди. Һәрқандақ ағриқни давалиғандин көрә, униң алдини алған әвзәл. Сил кесилиниң алдини елиш үчүн өшкә сүтиниңму пайдилиқ екәнлигини әсткәрткүмиз келиду. Яш болғиниға қаримай, бу ағриққа муптила болғанларниң дәрдигә дәрман болуватқан жутдишимиз Алмазға көп рәхмәт. Униң тәдбирчанлиғиға утуқ тиләймиз. Амма униң херидарлириниң аз болғинини халаймиз, – дәйду наһийәлик сил кесили ағриқханисиниң баш врачи Эльмира Ниязова. Жилдиқидәк наһийәдә «Сил кесилигә қарши күрәш айлиғи» өтүп, мәктәп вә колледжларда униң алдини елиш бойичә акцияләр уюштурулуватиду. Медицина хадимлири оттура вә мәхсус билим дәргаһлириниң студентлири билән учришип, сөһбәтләрни өткүзмәктә. Панфилов наһийәси.