• Спорт
• 26 Сәуір, 2018

Өсмүрләр өзара бәс-бәскә чүшти

Мәшүр САСИҚОВ, «Уйғур авази»/ Өткән йәкшәнбә күни Талғир наһийәсиниң Бесағаш йезисидики 45-мәктәп-гимназияниң спорт залида 1-Май — Қазақстан хәлқиниң бирлиги күнигә беғишланған грек-рим күриши бойичә җумһурийәтлик турнир болуп өтти. Униңға җай-җайлардин, җүмлидин Қарағанда, Павлодар, Чимкәнт, Тараз, Шәрқий Қазақстан, Алмута вилайәтлиридин вә Алмута шәһиридин 2001 – 2010-жиллар арилиғида туғулған 600гә йеқин спортчи қатнашти. Турнирниң рәсмий қисмида Алмута вилайәтлик алий спорт мәктивиниң мудири Нурбақыт Теңизбаев, Гүлдала мәлисиниң баш жигитбеши Азат Қурбанов, «Спорт жұлдыздары» журналиниң муһәррири Жандос Аянбек, Қазақстан Җумһурийитиниң спорт маһири Демеу Жадыраев, Қазақстанниң хизмәт көрсәткән мәшиқләндүргүчиси Боранбек Қоңыратов сөзгә чиқип, мошу Йәттису тәвәсидин чиққан көплигән палванларниң бүгүнки яш әвлатқа үлгә болуватқанлиғини алаһидә тәкитлиди һәм турнир иштракчилириға ақ йол тилиди. Андин спорт саһасиға өзлириниң салмақлиқ һәссисини қошуп келиватқан бир топ шәхсләргә уюштурғучилар тәрипидин бәлгү, Пәхрий ярлиқ вә хатирә соғилар тапшурулди. Атап ейтқанда, жуқурида исми аталғанлардин ташқири, турнирни өткүзүшкә һамийлиқ қилған Билал Һошуров, Әлишер Сасиқов, Җәвдат Әйсаров, Руслан Абдурахманов, Адилҗан Һәмраев, Арупҗан Имиршаев шулар җүмлисидиндур. Шундақла мәрасимда Азат Қурбанов Гүлдала йезисиниң яшлири намидин грек-рим күриши бойичә Қазақстан Җумһурийитиниң хизмәт көрсәткән мәшиқләндүргүчиси Боранбек Қоңыратовқа уйғурниң чапинини кийгүзди. Умумән, бу күни турнир башлиништин илгири мошу саһада әмгәк қилип, өсмүрләрниң сағлам һаят тәризини таллашқа күч чиқириватқан барлиқ инсанларға уюштурғучилар намидин миннәтдарлиқ билдүрди. Икки топқа бөлүнгән өсмүрләр салмақ дәриҗилири бойичә, өзара күч синашти. Жуқури дәриҗидә уюштурулған турнирда спортчиларниң алған һәрбир пайлири электронлуқ таблода елан қилинип турди. Икки күн давам қилған турнирда ғалип чиққан спортчилар 21 алтун, 21 күмүч вә 42 бронза медаль билән тәғдирләнди. Әнди ушбу турнирниң башқа мусабиқиләрдин пәрқи шуки, бу йәрдә ғалип чиққан өсмүрләр спорт маһирлиғиға намзат нормисини орунлиди. Һә, бу күни 600 спортчи арисида мундақ дәриҗигә еришкәнләр аз болмиди.