• Бизниң сөһбәт
• 26 Сәуір, 2018

Келәчәк яшларниң қолида

Сабирәм ӘНВӘРОВА, «Уйғур авази»/ Пәрзәнтхана. Көплигән аилиләргә сүйүнчә йәткүзүп, унтулмас дәқиқиләрниң гувачиси болуватқан ушбу мәркәздә ана вә балиниң аманлиғи, саламәтлиги үчүн хизмәт қиливатқан ақхалатлиқ әвзәл җанлар кечә-күндүз тиним тапмайду. Уйғур наһийәлик туғутханиниң яш һәм тәҗрибилик мутәхәссиси Гүлнарәм Абдукәримова билән сөһбәтлишиш җәриянида буниңға йәнә бир қетим көз йәткүздуқ.–– Гүлнарәм Мусаҗан қизи, аңлишимизчә, сиз йеқинда Астана шәһиригә берип, «Жас Отан» яшлар қанитиниң ІV қурултийиға қатнишип кәпсиз. Әгәр, қарши болмисиңиз, сөһбитимизни пайтәхткә болған сәпириңиздин башлисақ... – Мәрһәмәт, «Нұр Отан» партияси Уйғур наһийәлик шөбиси тәрипидин «Жас Отан» яшлар қанитиниң ІV қурултийиға қатнишиш пурситигә еришкиним үчүн өзәмни бәхитлик һис қилимән. Чүнки бу мениң елимиз пайтәхти – Астана шәһиригә биринчи сәпирим болди. Астананиң көрсә, көз тоймайдиған қияпитидин бөләкчә тәсирләндим. Әнди ушбу қурултай һәққидә тәпсилий ейтип бәрсиңиз? Мәзкүр қурултайниң мәхсити, Президентимизниң «Бәш иҗтимаий тәшәббуси» билән «Келәчәккә нишан: мәнивий йеңилиниш» программилиқ мақалисида ейтилғанларни әмәлгә ашурушта яшларниң вәзипилирини муһакимә қилиш екән. У күни Астана конгресс мәркизигә елимизниң барлиқ вилайәтлиридин миңдин ошуқ яш жиғилди. Қурултай “дүгләк үстәл” әтрапида өтти. «Жас Отан» яшлар қанитиниң рәиси Данияр Сүндетбаев қурултайни рәсмий ачқандин кейин, униң давами соал-җавапларға улашти. Чүштин кейин «Мәнивий йеңилиниш», «Қазақстанда ясалған», «Билим, илим, инновация», «Рәқәмлик Қазақстан», «Сағлам милләт» охшаш 5 секциягә бөлүнүп, музакиригә чүштуқ. Бу мениң һаятимдики әстин чиқмас бир күн болди. Шу пәйттә Қазақстанниң келәчиги яшларниң қолида екәнлигигә йәнә бир қетим көзүм йәтти. Әгәр, дөләт тәрипидин яшларға мүмкинчиликләр яритилса, уларниң техиму чоң утуқларни қолға кәлтүрүп, егиз чоққиларни беқиндуридиғанлиғиға ишәндим. Шуни алаһидә ейтип өткүм келидуки, бу күни мүмкинчилиги чәкләнгән, амма һаяттин үмүтини үзмәй, көзлигән мәхситигә йәткән қурдашлирим билән учришип, сөһбәтләштим. Улар мениң һаятқа болған көзқаришимни тамамән өзгәртти. – Өзиңиз ейтқандәк, бу сизниң Астанаға тунҗа сәпириңиз екән. Тәсиратлириңиз қандақ? – Бийил Астанамиз 20гә толди. Бу 20 жилниң ичидә һули тикләнгән пайтәхтимизниң көрки кимнила болсун, бирдин өзигә җәлип қилиду. Униң гөзәллигини тилим билән ейтип йәткүзәлмәймән. Телевизордин, сүрәттин көргән бир бөләк, әмәлиятта, көз билән көргән башқа екән. Шәһәрни сәяһәт қилип, Қазақстанниң тәрәққиятиға қайил болдум. Һәммә нәрсә йеңичә. Заманивий кочилар, чирайлиқ беналар көзниң йеғини йәйду. Бир сөз билән ейтқанда, елимизниң жүриги вә тириги болған Астана келәчиги парлақ шәһәр екән. – Әндики өзимизниң наһийәмизгә қайтип кәлсәк, сиз, хаталашмисам, наһийәлик мәркизий дохтурханидики бирдин-бир неонатолог дохтурғу дәймән? — Шундақ. – Бәзибир оқурмәнләргә «неонатолог врач» дегән сөз анчә тонуш болмиса керәк... – Чүшәндим. Аддий тил билән ейтқанда, неонатолог врачниң асасий вәзиписи — йеңи туғулған бовақларниң саламәтлигини назарәт қилиш. Бу ейтмаққа асан болғини билән, интайин жуқури мәсъулийәтни тәләп қилиду. — Бу кәсипни таллишиңизға немә сәвәп болди? – 2007-жили 1-Чонҗа оттура мәктивини тамамлидим. Биртуташ миллий тесттин жуқури көрсәткүчкә ериштим. Шу жили С.Асфендияров намидики Қазақ миллий медицина университетиға грантқа оқушқа қобул қилиндим. Дохтур болуш — мениң балилиқ арминим еди. 2012-жили бакалавр, 2014-жили интернатурини пүтирип, қолумға диплом алдим. Андин, «Дипломмен ауылға» дөләтлик программиси бойичә ана жутумға қайтип келип, дәсләпки иш-паалийитимни наһийәлик дохтурханиниң туғутхана бөлүмчисидин башлидим. 2014-жилдин бүгүнки күнгичә мәзкүр дохтурханида неонатолог-врач болуп ишләп келиватимән. Мениң неонатолог мутәхәссислигини таллишимдики сәвәп, биринчидин, қизиқишим, иккинчидин, ушбу кәсип бойичә яш мутәхәссисләр йетишмәслиги болди. Һәр кәсипниң өз артуқчилиғи һәм шуниң билән биллә қийинчилиғиму бар. Мениңчә, яш мутәхәссисләр һәрқачан издиништә болуши керәк. Мәсилән, өткән жили «Тіko» компаниясидики түркиялик илғар мутәхәссисләрдин тәҗрибә топлап қайттим. Неонатолог болуш, йәни, йеңи туғулған сәбиниң һаятини сақлап қелиш инсанға чәксиз хошаллиқ, бөләкчә сезим әта қилиду. Бу һиссиятни пәқәт неонатолог дохтурларла баштин кәчүрәләйду. Қийинчилиғиға кәлсәк, вақти тошмай туғулған, салмиғи төвән һәм саламәтлиги начар сәбиләрни «путиға турғузуш» асан әмәс. Иккинчидин, наһийәдә мениңдин башқа неонатолог врач болмиғанлиқтин, дохтурханидин жирақ кетәлмәймән. Бош вақтим интайин аз, бәзи чағларда кечиләп ишқа қайтип келишимгә тоғра келиду. – Туғутханида һәрқандақ әһвал йүз бериду. Иш бабида һаятиңизға зор тәсир қилған вақиәләр орун алдиму? – Әлвәттә, 3-4 жилниң ичидә әстә қаларлиқ көплигән вақиәләр йүз бәрди. Болупму, 850 грамм туғулған бовақниң һаяти үчүн күрәшкиним, мениң үчүн чоң бир синақ болди. Бүгүн шу бовақ, 3 яшқа толди. – Ана вә бала саламәтлигигә сәлбий тәсирини тәккүзүватқан амилларни атап өтсиңиз? – Дунияға йеңидин кәлгән бәзи сәбиләргә көзини ечипла түрлүк-түмән дора-дәрмәкләрни қобул қилишқа тоғра келиду. Буниңдики асасий сәвәп, ана саламәтлигиниң начарлиғи, болғуси аниларниң дохтурға вақтида қаралмиғанлиғиниң ақивити дәп чүшинимән. – Гүлнарәм Мусаҗан қизи, жуқурида “көп вақтим ишта өтиду» дәп ейттиңиз, хизмитиңиз шәхсий һаятиңизға тәсир қилмамду? – Дурус дәйсиз. Мәнму бир өйниң келини. Йолдишим Илзат Йүсүпҗанов. Икки оғлимиз бар. Аиләмдикиләрниң қоллап-қувәтлишидә хизмитимни шәрәп билән атқуруватимән. Растимни ейтсам, бәзи күнлири балилиримға пәқәт бир-икки саатла көңүл бөлүшкә тоғра келиду. — Сөһбитиңизгә рәхмәт.