• Йеңилиқлар
  • 26 Сәуір, 2018

ҚХА – достлуқ билән разимәнликниң рәмзи

Өгүнлүккә, йәни 28-апрель күни, Астанадики Течлиқ вә разимәнлик сарийида “Бәш иҗтимаий тәшәббус – җәмийәтлик иҗтимаий бирлигиниң платформиси” күн тәртиви билән Қазақстан хәлқи Ассамблеясиниң жигирмә алтинчи сессияси ечилиду. Шу мунасивәт билән Қазақстан хәлқи Ассамблеясиниң әзаси, Алмута вилайәтлик мәслиһәтниң депутати, “Универсал” ширкәтләр топиниң президенти Закирҗан Пирмәһәмәт оғли КУЗИЕВниң мақалисини гезитханлар диққитигә һавалә қиливатимиз.Қазақстан хәлқи Ассамблеясиниң бу қетимқи сессияси алаһидә рәмзлик характерға егә дәп ойлаймән. Чүнки, биринчидин, сессия, күн тәртивидин билинип турғинидәк, Қазақстан Президенти Нурсултан Назарбаевниң хәлиққә “Президентниң Бәш иҗтимаий тәшәббуси” мураҗиитидә көтирилгән муһим иҗтимаий мәсилиләрни утуқлуқ һәл қилишниң мәнтиқий давами болса, иккинчидин, инақлиғи ярашқан Қазақстан хәлқиниң муқәддәс мәйрими сүпитидә нишанлинидиған 1-Май – Қазақстан хәлқи бирлиги күни вә, үчинчидин, бизниң кедәчәкни пәмләшни билидиған дана Президентимиз һулини салған вә өзи баш мемари болған пайтәхтимиз – Астана шәһириниң 20 жиллиқ сәнәси һарписида өтүватиду. Мана мошу сәнәләрниң һәммиси бизгә мәрикилик һис-туйғуларни һәдийә қилиду. Дунияда тәңдиши йоқ ҚХАниң һәрбир сессияси җәмийитимиз һаятиниң әң муһим мәсилилирини муһакимә қилидиғанлиғини инавәткә алсақ, бу қетимму барлиқ қазақстанлиқларни қанатландуруп, әтики техиму парлақ келәчәккә үмүтләндүргән Бәш иҗтимаий тәшәббус һәрбир қазақстанлиқни паравән турмушқа йетәкләйдиған программа екәнлиги тоғрилиқ тәпсилий ейтилидиған болиду. Шундақ екән, Президентимизниң шәхсән өзи Рәиси болған ҚХА паалийити пәқәт елимиздики хәлиқләр достлуғини, җәмийәтлик разимәнликни техиму мустәһкәмләш вә кәң тәрғип қилишла әмәс, шундақла қазақстанлиқларниң паравәнлигини ашурушқа қаритилған дөләтлик иҗтимаий сәясәтни толуқ қоллап-қувәтләштин, Президентниң рәһбәрлигидә ишләнгән ениқ иҗтимаий программилар арқилиқ нишан қилинған пәллиләргә қол йәткүзүшкә кәң аммини җәлип қилиштин ибарәттур. Қазақстан Җумһурийитиниң Президенти Н.Ә. Назарбаевниң Қазақстан хәлқигә йоллиған «Қазақстан йоли — 2050: бир мәхсәт, бир мәнпийәт, бир келәчәк» намлиқ Мәктүбидә «Мәңгілік Ел» умуммиллий вәтәнпәрвәрлик идеяси алға сүрүлгән еди. Бу идеяни пүткүл җәмийәт қазақстанлиқ бирпүтүнлүк билән бирликни, җәмийәтлик разимәнликни қелиплаштуридиған қәдрийәтләр системиси сүпитидә қобул қилди. «Мәңгілік Ел» идеясини умуммиллий разимәнликниң бирпүтүн модели сүпитидә тәвсийә қилип, униң муәллипи вә мемари — Дөләт рәһбири Нурсултан Назарбаев келәчиги бирпүтүн милләтни қелиплаштурушниң муһим йөнилишлирини бәлгүләп бәрди. Биз «Мәңгілік Ел» умуммиллий идеясигә егә болдуқ. «Ел» сөзидә чоң бириктүргүчи күч бар, чүнки һәрқандақ дәвирдә, һәрқандақ шараитта туғулған йәр, қазақстанлиқлар үчүн әң йеқин вә өзигә җәлип қилғучи қәдрийәт болған һәм болуп қаливериду. «Мәңгілік Ел» идеясидә келәчәккә дегән умумхәлиқ ишәнчиси өз әксини тапқан. Бәрпакар қазақстанлиқ вәтәнпәрвәрликниң асасини биз өзимизниң улуқ ишлиримиз билән қелиплаштурдуқ. Уни күчәйтип, пәқәт көпәйтипла қоймай, әвлаттин-әвлатқа, дәвирдин-дәвиргә улаштуруп турушимиз керәк. Дөләт рәһбириниң «Хәлиқ һаяти униң келәчәк әвлади билән давамлишиду. Шуңлашқа хәлиқниң мәңгүлүк тоғрилиқ армандин башқа изгү армини йоқ. Мәңгілік Ел — бу әтики күнгә ишик ачидиған, келәчәккә болған ишәнчини ашуридиған идея, бу — кәйнигә қайтмайдиған вә һәқиқий турақлиқниң рәмзи» дегән сөзлири билән башлинидиған Вәтәнпәрвәрлик акт қедимий қазақ йеридә умумий тәғдир билән тарихий хатирә арқилиқ бағланған, Улуқ Дала елиниң тарихий әнъәнилирини давамлаштуруп, нурғунлиған әвлатларниң Мустәқиллик тоғрилиқ арминини әмәлгә ашуруватқан келәчәк әвлат алдидики муқәддәс пәризни, бизниң умумий өйүмиздики өмлүк билән разимәнликниң, бирликниң маһийитини билидиған дөләт гражданлириниң қәлбидики есил ойлирини билдүриду. Әйнә шу ойлар ҚХАниң новәттики ХХVI сессиясидә йәнә бир қетим өз ипадисини тапидиғанлиғи һәқиқәт. Бирақ биз Президент тәклип қилған Бәш иҗтимаий тәшәббусниң әмәлиятта өз әксини тепиши үчүн униңға биркишилик мунасип үлүшимизни қошушимиз шәрт. Әгәр уни өзәмниң мисалида ейтсам, мән рәһбәрлик қиливатқан “Универсал” ширкәтләр топи тәркивидә пәқәт Қазақстандила әмәс, шундақла Оттура Азиядә тәңдиши йоқ “Яркәнт крахмал-ширнә заводи” ҖЧЙ бар. Униң қолға кәлтүрүватқан утуқлиридин һәммә хәвәрдар дәп ейтсам, кәмтарлиқ чәмбиридин чиқип кәтмәймән дәп ойлаймән. Шундиму уларға қисқичә тохтилип өтәй. Буниңдин төрт жил илгири, Астанада өткән “Йеңи индустрияләштүрүш: қазақстанлиқ барсниң қәдими” умуммиллий телекөрүктә Дөләт рәһбири Нурсултан Назарбаев «Яркәнт крахмал-ширнә заводи» җавапкәрлиги чәкләнгән йолдашлиғини ишқа қошқан еди. Шу вақитта мән мундақ заводниң техи Мәркизий Азиядә тәңдиши йоқ екәнлигини алаһидә тәкитләп, Дөләт рәһбиригә заводниң толуқ қувәт билән ишлиши үчүн өзәмгә жүкләнгән вәзипә һөддисидин шәрәп билән чиқидиғанлиғимни вәдә қилип, завод коллективи билән Президентниң «Заводни ишқа қошушқа рухсәт қилимән!» дегән буйруғини давамлиқ алқишлар ичрә қобул қилған едим. Әнди аридин төрт жил өтүп, Дөләт рәһбиригә бәргән вәдини толуқ орунлидим вә Яркәнт крахмал-ширнә заводи, өзиниң йезилиқ наһийәгә орунлашқанлиғиға қаримай, җумһурийәттики алп ишләпчиқириш орунлири билән үзәңгә талишидиған дәриҗигә йәтти. Завод жилиға 260 миң тонна қурутулған көмүқонақ денини қайта ишләш арқилиқ йетиштүрүлүватқан мәһсулат түрини 20дин ашурди. Бүгүн бу мәһсулатниң 60 пайизи чәт әлләргә экспорт қилиниватиду. Шундақ қилип, завод пәқәт Алмута вилайитиниңла әмәс, бәлки шундақла пүткүл җумһурийәтниң байрақдар карханилириниң биригә айланди вә өткән жили мошундақ ишләпчиқириш орунлири арисида әтивалиқ вә инавәтлик һесаплинидиған Қазақстан Җумһурийити Президентиниң «Алтын сапа» мукапитиға сазавәр болди. Әнди өзәмниң депутатлиқ паалийитимгә кәлсәм, у һәммә җәһәттин утуқлуқ болмақта. Мән вилайәтлик мәслиһәткә Панфилов наһийәсидин депутат болуп сайландим. Сайлиғучилирим билән һәрбир сессия һарписида учришип туримән. Адәттә, һәрқандақ дәриҗидики депутатниң алдиға пәқәт муһтаҗи бар адәмләр келиду. Маңиму худди шундақ. Уларниң көпчилигини иҗтимаий проблемилар билән мураҗиәт қилидиғанлар тәшкил қилиду. Шуңлашқа мән “Нур Отан” партияси Панфилов наһийәлик шөбисиниң Җәмийәтлик қобулханиси билән һәмкарлашқан һалда сайлиғучилар билән учришиш усулини йолға қойдум. Униң вақти вә қәрәли наһийәлик гезитта алдин-ала елан қилиниду. “Нур Отан” партияси Җәмийәтлик қобулханисиниң ярдими билән наһийәлик һакимийәтниң барлиқ саһалар бойичә бөлүм башлиқлирини, прокуратура вә сот органлириниң вәкиллирини шу учришишқа тәклип қилимән. Мундақ усул нәтиҗидарлиқ болуватиду. Чүнки, ейтайлуқ, бир сайлиғучи турушлуқ өй селиш үчүн участка сорап кәлсә, униңға, әлвәттә, наһийәлик яки шәһәрлик һакимийәттики мошу мәсилә билән шуғуллинидиған шәхсләр җавап бериду. Мәсилән, бийил 22-февраль күни новәттики қетим сайлиғучиларни қобул қилғинимда, униңға “Нур Отан” партияси Панфилов наһийәлик шөбиси рәисиниң биринчи орунбасари К.Досмаилов, Панфилов наһийәлик мәслиһәтниң кативи Е.Шоқпаров, Панфилов наһийәлик турушлуқ өй-коммунал егилиги вә турушлуқ өй инспекцияси бөлүми рәһбири А.Тазабеков, Сарибәл йеза округиниң баш мутәхәссиси Ж.Болатов, Яркәнт шәһириниң һакими Е.Нурахметов, Панфилов наһийәсиниң прокурори А.Төребеков, Панфилов наһийәлик билим бөлүминиң методисти Р.Қарабалаева, Панфилов наһийәлик ички ишлар бөлүминиң башлиғи М.Жексинбиев, Панфилов наһийәлик җәмийәтлик кеңәш комиссиясиниң әзаси С.Аксубаев вә вилайәтлик, наһийәлик аммивий әхбарат васитилириниң вәкиллири қатнашти. Мениң тәшәббусим билән сайлиғучиларни мана мошундақ тәркиптики әмәлдарларниң қатнишиши билән қобул қилиш әмәлияти илгири болмиған екән. Һазир бу усул Алмута вилайити бойичә үлгә қилип көрситилип, барлиқ наһийәләрдә қизғин үгиниливатиду. Вилайәтлик мәслиһәтниң бюджет бойичә комитетиниң әзаси вә Панфилов наһийәсидин сайланған депутат сүпитим билән мошу тәвәниң иҗтимаий-мәдәний тәрәққиятиға мисқалчә болсиму үлүш қошушни өзәмниң гражданлиқ борчим дәп билимән. Әйнә шу әснадин елип қариғанда, бийил вилайәтлик бюджеттин Яркәнт шәһиридики Крупская намидики мәктәпниң мурәккәп ремонти үчүн 285 миллион тәңгә, “Жаркент-Арасан” санаторийисигә баридиған йолни ремонтлаш үчүн 112 миллион тәңгә, Тышқан дәриясиниң икки яқисини мустәһкәмләш ишлири үчүн 165 миллион тәңгә аҗритилди. Ейтивәрсәк, әмәлгә ашурулған ишлар нурғун. Бирақ мәхсәт униңда әмәс. Ойлаймәнки, барлиқ қазақстанлиқлар елимиз Президенти Нурсултан Назарбаевниң барлиқ тәшәббуслириниң толуқ әмәлгә ешишиға биркишилик үлүшини қошуш үчүн бар имканийәтләр вә мүмкинчиликләрдин утуқлуқ пайдилинишни өзлириниң инсаний борчи дәп билиду. Пурсәттин пайдилинип, барлиқ гезитханларни алдимиздики шанлиқ сәнә – 1-Май – Қазақстан хәлқиниң бирлиги күни билән қизғин вә сәмимий тәбрикләп, мустәқил елимизниң өсүп-бейиши йолидики паалийитиниң дайим утуқлуқ болушиға тиләкдашлиқ билдүримән.

460 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы