• Спорт
• 04 Мамыр, 2018

«Аримиздин техи талай чемпионлар чиқиду»

Мәшүр САСИҚОВ, «Уйғур авази»/ Буниңдин он жил илгири Алмута шәһириниң Қайрат мәһәллисидә тонулған тиҗарәтчи Тиләпҗан Йүсүпов «Нийәт» спорт клубини ачқан еди. Мана шуниңдин етиварән, бу йәрдә тәрбийиләнгәнләрниң айримлири хәлиқара турнирларда көплигән утуқ-муваппәқийәтләргә қол йәткүзди. Һазир мәзкүр спорт клубида күрәшниң барлиқ түрлири бойичә йүздин ошуқ спортчи мәшиқлиниватиду. Йошуридиғини йоқки, редакциямизгә пат-пат телефон қилип, «Оғлум яки нәврәм «Нийәт» спорт клубида мәшиқлинивататти. Йеқинда әву-бу шәһәрдә өткән турнирда чемпион болуп кәлди» дәп хошаллиқлири билән бөлүшидиған гезитханлар күн санап көпийиватиду. Шу мунасивәт билән биз йеқинда әйнә шу бәхитлик ата-анилар билән бова-момиларға хошаллиқларни тәғдим қиливатқан спорт клубиға берип, униң паалийити билән тонушуп қайттуқ. Спорт ишқивазлири арисида исми көпчиликкә яхши мәлум, тәҗрибилик мәшиқләндүргүчи Имәрҗан Идиллаев бизгә төвәндикиләрни сөзләп бәрди. – Спорт клуби ечилған дәсләпки вақитларда бу йәргә балилирини елип кәлгүчиләр унчивала көп болмиди, – деди у шагиртлириға новәттики мәшиқни давамлаштурушни җекигәндин кейин. – Кейинирәк адәмләр пәрзәнтлирини сағлам һаят тәризидә тәрбийиләшниң муһимлиғини чүшәндиму, әйтәвир, бизгә балилирини шагиртлиққа бәргүчиләр сани көпийишкә башлиди. Һазир өсмүрләргә икки сменида мәшиқ жүргүзүватимиз. Пәйдин-пәй уларниң арисида клубимизниң шәнини қоғдайдиған чемпионлар чиқишқа башлиди. Мәсилән, Ризайдин Райлинни алидиған болсақ, у йәкму-йәк күрәштин дуния чемпионатида ІІ орунға сазавәр болуп, Қазақстанниң көк байриғини егиз көтәргән шагиртлиримизниң бири. Буниңдин ташқири, униң Қазақстанниң йәттә дүркүн чемпиони атилиши биз үчүн чоң утуқ. Әлвәттә, биз униң билән пәхирлинимиз һәм башқиларға үлгә қилип көрситимиз. Һәқиқәтәнму, дуния миқиясида уюштурулуватқан турнирларда ғәлибә қазиниш оңайлиқчә қолға кәлмәйду. Спортчиниң тиришчанлиғи өз алдиға, әнди униңға йол-йоруқ көрситидиған устазиниңму атқуридиған роли алаһидә. Имәрҗан Идиллаевниң әмгиги түпәйли чоң-кичик спорт мусабиқилиридә алдинқи орунлардин көрүнүп, чемпион аталғанлар көпләп санилиду. Мәшиқләндүргүчи сөһбәтара мундақ дәйду: – Күрәшниң һәрхил түрлири бойичә Қазақстан чемпиони аталған Илшат Султанияров, Ядикар Әнвәров, Дамир Сайдинов, Әнвәр Хәйруллаев, Алияр Қәмирдинов, Закир Тоқаев, Батырхан Шерипов, Тимур Һәмраев, Нурһаҗидин Нәсирдинов охшаш шагиртлирим мошундақла мәшиқләнсә, ишәшлик ейталаймәнки, биздин техи талай чемпионлар чиқиду. Тәкитләш лазимки, йеқинда Нурһаҗидин Нәсирдинов еғир салмақ дәриҗиси бойичә джиу-джитсудин Қазақстан чемпиони аталди. Шундақла 17 яшлиқ Илһам Ғаппаровқа артиватқан үмүтимиз зор. Чүнки у үч айниң ичидә йәкму-йәк вә джиу-джитсу күрәш түрлири бойичә Қазақстан чемпиони атиғиға сазавәр болуп, Азия чемпионатиға йолланма утувалди. Бу жигитләрниң орнини бесип келиватқан Рамзат Абдумеҗитов, Рәфқәт Зерипов, Арман Хәмитов вә Мухаметсаит Һошуровлар билән җиддий ишләватимиз. Уларму спортқа болған иштияқи күчлүк яшлардин. Һазир клубимизда уларни хәлиқара дәриҗидики мусабиқә-турнирларға тәйярлашқа барлиқ шараитлар моҗут. Пәқәт спортчилардин тиришчанлиқ тәләп қилиниду, халас. Һазир немә тола — спорт клуби, спорт мәркизи тола. Уларниң бәзилири пәқәт пул тепишниң койида ечилған. Амма дәсләп спорт дуниясиға қәдәм басқан өсмүрниң бисини бирдинла қеқиветиш яки униңға дурус мәшиқ жүргүзмәслик инсанийлиққа ятмиса керәк. Биз бу күни «Нийәт» спорт клубидикиләрниң буниңдин әсла жирақ екәнлигигә көз йәткүзүп, паалийитигә утуқ тилидуқ.