• Көргәзмә
• 28 Мамыр, 2018

«Әмән һиди»

Астана шәһиридики «Астана-Байтерек» монументиниң галереясидә «Әмән һиди» намлиқ көргәзмә ечилди. Униңда Қазақстанниң заманивий рәссамлириниң мәхсус таллавелинған әмгәклири қоюлди. Мәзкүр көргәзмә көп жил моҗут болуп, «Куланши» заманивий сәнъәт мәркизиниң көчмә көргәзмиләр лайиһиси болуп һесаплиниду. Көргәзмидин орун алған әмгәкләр шуңғичә көплигән дөләтләрниң көргәзмә заллири билән мәхсус мәйданлирида көрситилгән. «Лайиһиниң вәзиписи пәқәт һәрхил пландики әмгәкләрниң гармониялик қатарини тәшкил қилиш әмәс, бәлки көргәзмә иштракчилириниң әмән һидини һис қилишидин ибарәттур. Көргәзмә мавзуси зиярәтчиләрни әсәрләрниң мәзмуниға чөкүшкә, өзлириниң ой-пикрини әркин изһар қилишиға түрткә болиду», дәп язиду мәзкүр көргәзминиң куратори Лейла Махат. Хәйрият, мәзкүр көргәзмигә алтә иҗаткарниң – Сағинтай Алимбетов, Сембигали Смагулов, Шоқан Төлеш, Шалқар Қабдеш, Оралбек Қабоке, Мэлс Отаровниң әмгәклири қоюлған. Шалқар Қабдеш өз әсәрлиридә йезидики адәмләрниң әмгигини реалистик усулда тәсвирлигән (1-сүрәт). Униң қәһриманлири тәбиәт мәнзириси билән маслишип, биртуташ дунияни һасил қилиду. Рәссам бизгә мәлум болған йеза һаятини башқичә аһаңда йәткүзүшкә тиришиду. Сағинтай Алимбетовниң әсәрлири башқичә йосунда ишләнгән. Униң әмгәклиридә рәң асасий орунни егиләйду (2-сүрәт). Шоқан Төлеш Қазақстандики алдинқи қатарлиқ һәйкәлтарашларниң бири. Униң чоң вә кичик һәйкәллиридә заманивий авангард сәнъитиниң йөнилиши бар. Иҗаткарниң әмгәклири бизни башқичә бир сәнъәт дуниясиниң муһитиға елип кетип, ойға чөмиду. Һәйкәлтарашниң әсәрлириниң йәнә бир алаһидилиги – уларни қобул қилиш җәриянида, биздә бу дунияни бир қелипта қобул қилиш сезимимизни тар-мар қилиду. Көргәзминиң ечилиш тәнтәниси баһар пәслигә тоғра келиши тәсадипи әмәс. Мениңчә, көргәзмидин бәһирләнгән һәрбиримизниң тәсиратлирини, тәбиәтниң көркәм пәслини техиму улғайтип, уларниң ички дуниясини бейитип, диллирида мәнивий ойғинишни пәйда қилғини талашсиз. Һакимҗан ГҮЛИЕВ, «DUNІYA-ART» заманивий сәнъәт галереяси” җәмийәтлик фондиниң президенти, мәдәнийәтшунаслиқ пәнлириниң намзити.