• Дин вә җәмийәт
• 28 Мамыр, 2018

Рамзан – сәвир-тақәт мәктиви

Шәмшидин АЮПОВ, «Уйғур авази»/ Елимиз Президенти Нурсултан Назарбаев «Келәчәккә нишан: мәнивий йеңилиниш» мақалисида хәлқимизни миллий қәдрийәтләрни һөрмәтләшкә, туғулған йериңни гүлләндүрүшкә, йеңичә ойлап, җәмийәт үчүн изгү ишларни қилишқа, мәнивий йеңилинишқа дәвәт қилиду.Дөләт рәһбири елимизни мәнивий йеңилинишқа башлиған мақалиси арқилиқ хәлқимизгә парасәтлик ой-пикир ташлиди. Әнди қәдәм тәшрип қилған мубарәк Рамзан мәнивий йеңилинишимизға пайдисини тәккүзүп, иманимизни күчәйтишкә қәдри билән хасийити мол ай. Рамзан — он икки айниң султани, бәрикәтлик һәм кәчүрүми мол ай. Күндилик турмуш һәләкчилиги билән жүридиған бәндиниң жүригигә бу айда иман нури қуюлиду. Сәвәви, Роза адәмни сәвир вә тәқвадарлиққа тәрбийиләйду. Сәвирлик, хәйрихаһлиқ, меһриванлиқ, қериндашлиқ кәби инсаний алий пәзиләтләр көпийип, иман күчийиду. Рамзан — Алланиң меһир-шәпқити төкүлүп, җәннәтниң ишиги ечилидиған, иманни күчәйтишкә пурсәт беридиған бәрикәтлик ай. Бу —Яратқучимизниң бәндигә бәргән чәксиз немити. Тәңдиши йоқ соға-төһписи. Қудси һәдистә Алла таала: «Роза – пәқәт Мән үчүн. Униң соғисини (совавини) Мәнла өлчәп, Мәнла һәдийә қилимән...», дәп розиниң қәдир-қиммитини, мәзмун-маһийитини баян қилған. Роза – күндүзи пәқәт йәп-ичиштин өзини чәкләш дегән сөз әмәс. Роза – роһниң озуғи, тәнниң даваси. Рамзан – җан билән тәнни мәнивий тазилайдиған, мусулман үчүн чоң сәвир-тақәт мәктиви. Әнди сәвир егисигә берилидиған соға – җәннәт. Саламәтлиги яр бәрмигән яки қерилиқ йетип, роза тутушқа чамиси йәтмигән адәмләр роза тутқан кишиләргә иптар бәрсә, уму — чоң совап. Пәйғәмбиримиз Муһәммәд әләйһиссалам: «Алла таала әң болмиғанда бир данә хорма, һәтта бир жутум су билән болсиму ғәмхорлуқ қилғанға совап язиду...» , дегән. Меһир-шәпқәт ейи – Рамзан мубарәк болсун! Хасийәтлик айда тутқан розимиз, дуа-тиләклиримиз, қилған ибадәтлиримиз қобул болғай! Алла таала аилимизгә хатирҗәмлик, ишимизға бәрикәт-бирлик әта қилсун! Амин!