• Йеңилиқлар
• 28 Мамыр, 2018

Муһим мәсилиләр муһакимә қилинди

Дөләт рәһбири Нурсултан Назарбаев 14-майда Сочида болуп өткән Алий Евразия ихтисадий кеңишиниң мәҗлисигә қатнашти. Кеңәш мәҗлисигә шундақла Беларусь, Қирғизстан, Россия Президентлири – Александр Лукащенко, Сооронбай Жээнбеков, Владимир Путин, Әрмәнстан Премьер-Министри Николь Пашинян вә Евразия Ихтисадий комиссияси коллегиясиниң рәиси Тигран Саркисян қатнашти. Кәңәйтилгән тәркиптә өткән музакириләргә Евразия бәшлигиниң рәһбәрлиригә Евразия ихтисадий иттипақида байқиғучи дөләт рәһбири сүпитидә Молдова Президенти Игорь Додон қошулди. Мәҗлис давамида тәрәпләр Ихтисадий иттипақ даирисидә өзара ихтисадий һәрикәтни күчәйтиш мәсилилирини муһакимә қилди. Нурсултан Назарбаев өз сөзидә ЕАИИға қатнашқучи мәмликәтләрниң ихтисадий интеграциясиниң нәтиҗилиригә вә истиқбалиға айрим тохталди. Дөләт рәһбири интеграциялик җәриянларниң ЕАИИға қатнашқучи дөләтләрниң ихтисадий өсүшигә җиддий һәссә қошуватқанлиғини тәкитлиди. – Буниңға стратегиялик саһалардики – йеза егилиги вә санаәттики иҗабий җошқунлуқ ярдәм қилди. Һәм ташқи, һәм өзара содида җиддий “сәкрәш” йүз бәрди. Өткән жилда ЕАИИ даирисидики ташқи вә өзара сода 24,4 вә 26,1 пайиз көпәйди. Бийилму иҗабий җошқунлуқ сақланмақта, – деди Қазақстан Президенти. Нурсултан Назарбаев ихтисадий бирләшминиң хәлиқара абройиниң өсүватқанлиғини тәкитлиди вә чәт әлләрниң тәшкилат билән сода-ихтисадий мунасивәтләрни тәрәққий әткүзүшкә чоң қизиқиш һасил қиливатқанлиғини атап көрсәтти. Дөләт рәһбири ихтисадий бирләшминиң устав Шәртнамисиға өзгиришләрни киргүзүш мәсилилири, ЕАИИниң хәлиқара паалийитиниң аспектлири, шундақла ихтисадий иттипақниң техиму тәрәққий етишини тәминләш мәсилилири муһакимә қилинған мәҗлисниң нәтиҗилиригә тохталди. Қазақстан Президенти қобул қилинған қарарларни орунлашни тәһлил қилиш вә һазирқи мурәккәп геоихтисадий шараитни һесапқа елип ЕАИИ ихтисатлирини илгирилитиш бойичә чариләр комплексини ишләп чиқиш үчүн мәхсус һөкүмәтләрара иш топини қурушни тәклип қилди. – Шундақла чоң инфрақурулумлиқ “мегалайиһиләрни” әмәлгә ашуруш үчүн имканийәтләрни ойлаштуруш зөрүр. Евразия тәрәққият банкисиниң һәм Евразия турақлаштуруш вә тәрәққият фондиниң бирләшмимиз паалийитидики ролини ашуруш муһим. Улар чоң лайиһиләрни әмәлгә ашурушқа паал қатнишиши керәк, – деди Нурсултан Назарбаев. Униңдин ташқири Дөләт рәһбири ЕАИИ ишида “ЭКСПО–2017” комплекси асасида қурулуватқан үч хәлиқара мәркәзниң имканийәтлирини пайдилинишни тәклип қилди. – ЕАИИ мәмликәтлириниң малийә институтлирини “Астана” Хәлиқара малийә мәркизиниң имканийәтлиридин пайдилинишқа тәклип қилимән. Униңдин ташқири “ЭКСПО” территориясидә ЕАИИ малийә блогиниң чарә-тәдбирлирини, җүмлидин қошумчә консультатив-мәслиһәт органлириниң мәҗлисини өткүзүш керәк. Шуниң билән биллә рәқәмлик күн тәртивини әмәлгә ашуруш даирисидә келәчәктики Хәлиқара технопарк вә ИТ-стартаплар асасида ЕАИИ даирисидә “Рәқәмлик лайиһиләрни вә тәшәббусларни башқуруш идарисиниң” ишини уюштурушни тәклип қилимән, – деди Қазақстан Президенти. Дөләт рәһбири сөзиниң ахирида АЕИК мәҗлисидә қолға кәлтүрүлгән келишимләрниң әмәлгә ашурулушиниң ихтисадий иттипаққа қатнашқучи барлиқ әлләрниң һәмкарлиғини хелә жуқури дәриҗигә көтириш имканийитини беридиғанлиғиға ишәнчә билдүрди. Алий Евразия ихтисадий кеңиши мәҗлисиниң йәкүни бойичә бирқатар қарарлар вә һөҗҗәтләр қобул қилинди. Шундақла тәшкилатқа әза мәмликәтләрниң рәһбәрлири Алий Евразия ихтисадий кеңишиниң новәттики мәҗлисиниң вақти вә орни тоғрилиқ келишти. Мәҗлис ноябрь-декабрьда Санкт-Петербургта өтиду.