• Мәнавият
• 28 Мамыр, 2018

«Иҗаткарниң» новәттики сани

Шәмшидин АЮПОВ, «Уйғур авази»/ Йеқинда «Иҗаткар» әдәбий-публицистикилиқ, илмий-аммибап журналиниң новәттики сани йоруқ көрди. Безилиши жуқури дәриҗидики журналниң муқависида уйғур хәлқиниң мунәввәр пәрзәнди, атақлиқ композитор вә көрнәклик дөләт һәм җәмийәт әрбаби Қуддус Ғоҗамияровниң рәсими берилгән вә Қазақстан Җумһурийитиниң хизмәт көрсәткән әрбаби Йолдаш Азаматовниң бүйүк композитор тоғрилиқ йезилған «Һаят чеғида өзигә упримас һәйкәл орнитип кәткән» мақалиси елан қилинған. Андин журналда пешқәдәм устаз Хелпәм Һәмраеваниң жутдиши, Қазақстан Җумһурийитиниң Халық Қаһарманы Мөрдүн Тейиповниң туғулғининиң 100 жиллиғиға даир «Һәқиқий хәлиқ қәһримани» мавзусидики хатириси орун алған. Журналда оқурмән йәнә бир тонушидиған шәхс — атақлиқ шаир вә журналист Долқун Ясин. Әгәр шаир һаят болғинида, бийил 80 яшқа толатти. Әдипниң иҗадийитигә журналниң баш муһәррири Малик Мәһәмдинов әтраплиқ тохтилип, өз әслимилири билән бөлүшиду. Буниңға қошумчә, әдипниң бир түркүм шеирлири берилгән. Журналниң мәзкүр санида оқурмән шундақла Зордун Сабир, Мухтар Әвезов,Муһәммәтҗан Садиқ, Ғалым Жайлыбай, Ядикар Сабитов, Мухтәрҗан Җумаров, Гүлнарә Авутова кәби талантлиқ қәләм саһиблириниң әсәрлиридин ташқири, исми көпчиликкә әндила тонулуватқан яш иҗаткарларниң әмгәклири биләнму тонушалайду. Умумән бу әдәбий нәширниң новәттики саниниң мәзмун җәһәттин хелә чоңқурлуғи, униңда тил вә әдәбияттин башқа сәнъәт, тарих, илим-пән саһалириға мунасивәтлик мақалиларғиму орун берилгәнлиги диққәткә сазавәрдур. Буниң,әлвәттә, оқурмәнләр даирисиниң кәңийишигә түрткә болидиғанлиғи талашсиз. Йоруқ көргинигә анчә көп вақит болмисиму, аммибаплиққа айлиниватқан ушбу журналниң тонуштуруш мәрасимини мошу жилниң 29- май күни Уйғур наһийәсиниң Чонҗа йезисида кәң даиридә өткүзүш көздә тутулуватқини униң оқуғучилириниң саниниң күндин-күнгә көпийиватқанлиғиниң йәнә бир рошән испати болса керәк.