• Йеңилиқлар
• 28 Мамыр, 2018

Ветеранниң йеңи китави тонуштурулди

Йолдаш МОЛОТОВ, “Уйғур авази”/ Йеқинда Алмутидики “Достлуқ өйидә” Улуқ Вәтән урушиниң ветерани, шаир Леонид Гиршниң «Стихи о войне и мире» намлиқ китавини тонуштуруш мәрасими болуп өтти. Униңға язғучи-шаирлар, алимлар, ҚХА әзалири, миллий мәдәнийәт мәркәзлириниң вәкиллири қатнашти.— Леонид Юзефович өзи қанлиқ урушниң әң шиддәтлик җәңлиригә қатнашқан ветеран, – деди мәрасимни киришмә сөз билән ачқан ҚХА Рәисиниң орунбасари Леонид Прокопенко. – У әйнә шу дәһшәтниң тирик гувачиси. Қәләм егиси болғачқа, өзи гува болған вақиәләрни яш әвлатқа йәткүзүшни борчи дәп һесаплайду. Бирнәччә китави йоруқ көргән һәм у китаплар оқурмәнләр тәрипидин қизғин қарши елинди. Бүгүн биз униң йеңи китавини қолға елип олтиримиз. Муәллипниң барлиқ шеирлири урушқа беғишланған. Униң йәнә бир алаһидилиги, һечқачан һардим дегәнни билмәйду. Йешиниң бир йәргә йәткинигә қаримай, җәмийәтлик ишлардин қол үзмәй келиватиду. ҚХАниң барлиқ сессиялириниң иштракчиси, бизниң мәслиһәтчимиз. Шундақла иҗадийәткиму садиқ. Униң дәлили – мошу китави. Мән, пурсәттин пайдилинип, Леонид Юзефовичқа саламәтлик вә иҗадий утуқ тиләймән. Шуниңдин кейин сөзни тонулған шаир, дөләт вә җәмийәт әрбаби Олжас Сулейменов алди. — Биз Леонид Юзефовични «йолдаш полковник» дәп атаймиз, – деди Олжас Сулейменов. – Һәқиқий полковник. У әмгиги, иҗадийити, китаплири билән һәммимизгә үлгә болуватиду. Мән униң әмгәкчанлиғиға, тиришчанлиғиға һәйран қалимән. Растини ейтиш керәк, һазир яшлиримизда әйнә шундақ хисләтләр аз. Шаир сүпитидә дәйдиғиним, у өзи көргәнни, қанлиқ урушни қәлб тарлири арисидин өткүзүп язиду. Шуңлашқиму униң шеирлирини хәлиқ сөйүп оқуйду. Демәк, йеңи китавиниңму муваппәқийәт қазинидиғиниға ишәнчим камил. Бүгүн мән уни новәттики утуғи билән тәбрикләп, узақ өмүр, иҗадий утуқ тиләймән. Өз новитидә сөз алған Алмута шәһири һакиминиң орунбасари Арман Қырықбаев, китапниң муһәррири Елена Фроловская, журналист Елена Брусиловская вә башқилар Леонид Гиршниң иҗадий паалийитиниң алаһидиликлиригә тохтилип, һазирқи таңда әйнә шундақ китапларниң зор әһмийәткә егә екәнлигини тәкитләшти. Мәрасим ахирида «Арыстан» мәхсус лицейиниң курсантлири Леонид Гиршниң шеирлирини ипадилик оқуп бәрди.