• Әхбаратлар еқими
  • 07 Маусым, 2018

Қизлирим – һаятимниң мәнаси

Рашидәм РӘҺМАНОВА, «Уйғур авази» Устазим Бүвинур Сабитовани Челәктә бир мәрасимда учритип қалғинимда, әлачи нәврилири һәққидә бәкму пәхирлинип сөзләп бәргән еди. Йеқинда Байсейит йезисиға йолум чүшүп, униң әқиллик һәм омақ нәврилири билән тонушуш пурситигә егә болдум. Сəйпуллам Илиев билән Земфира Сабитованиң аилə қурғиниға бийил 22 жил бопту. Алла уларға үч қиз һәдийә қипту. Әр-аял қизлириниң тәрбийисигә алаһидә көңүл бөлүп, тәрбийиләветипту.Сәйпуллам технологиялик техникумида тәһсил көрүпту. Земфира болса, Исмайил Тайиров намидики уйғур оттура мəктивини алтун медальға тамамлап, С.Асфендияров намидики медицина институтиға оқушқа чүшкән. Кичигидин тиришчан қиз бу йәрдиму бар күч-ғәйритини билимгә сәрип қилип, институтниң икки курсини әла баһаларға тамамлиған. Амма 3-курста оқуп жүргинидә еғир ағриққа гириптар болуп, оқушини ташлап кетишкә мәҗбур болған. – Ағриватқинимға узун жиллар болди. Һаятимни сақлап қелиш үчүн дохтурлар маңа тоққуз операция ясиди. Шүкри, әһвалим яман әмәс. Йолдишим вә қизлиримға миң рәхмәт. Бәзидә аиләмгә еғирчилиғимни селиватқинимға хиҗаләт болимән. Йолдишим билән қизлирим көп җапаларни көрүп, талай иссиқ-соғларни бешидин өткүзди. Улардин чәксиз миннәтдармән, – дәйду Земфира мәйүслинип. – Бир күни қаттиқ ағрип, қийнилип ятсам, чоң қизим Әзизәм: «Апа, мән шеир яздим. Тиңшап көрүңа» дәп бешимни көккә йәткүзди. Қизимниң иҗадийитини устазлириму қоллиди. Интайин хошал болдуқ. Мошу йосунда Исмайил Тайиров намидики уйғур оттура мəктивиниң муəллиримлири Турсунбүви Бәрзамова, Зумрәт Қадирова, Асийəм Имирова, Гүлмира Нурхалиқова, Гүлинур Иминова вə башқиларға анилиқ миннәтдарлиғимни билдүргүм келиду. Һә, ана үчүн бала утуғидин чоң бәхит барму?! Әзизәмниң иҗадийәткә болған иштияқи күн санап өсти. Униң шеирлири дәсләп мәктәптики там гезитлирида, андин наһийәлик вә җумһурийәтлик нәширләрниң сәһипилиридә бесилди. Әзизәм Абдумеҗит Дөләтов намидики «Баһар қайтиду» намлиқ иҗадийәт көрүгигә катнишип, Баш мукапатни елишқа муйәссәр болди. Униң шеирлири яш талантларниң «Тунҗа пəрваз» китапчисиға кирди. «Өзәм һәққидә» шеири москвалиқ уйғур шаири Вильям Садиқовниң тәрҗимисидә «Казахстан и Россия, надежда и боль» китавида рус тилида нәшир қилинди. Әң муһими, таланти вә билимгә дегән интилиши һәм талантлиқ уйғур балилирини қоллап-қувәтлигүчиләрниң йол-йоруғи түпәйли Үрүмчи шəһиридики «Шинҗаң нормал университетиға» грант һесавиға оқушқа йолланма алди. Земфираниң кейинки қизи Розигүлму әла оқуди. Уму һәдисигә охшаш һәрхил көрүк, байқашларға қатнишип, көзгә көрүнди. Земфира тилимиз вә мәдәнийитимиз җанкөйәрлиригә йолуқуп, Розигүлниңму «Шинҗаң нормал университетиға» оқушқа чүшүши йолида маңди. – Йолдишим Сәйпуллам иккимизниң мəхсити – Алла бәргән қизлиримизни оқутуп, саватлиқ, инсаплиқ қилип, чоң қилиш. Һалал ненини тепип йесә, хəлқимизниң намиға дағ кəлтүрмəй, жутумизни йəргə қаратмай, хизмәт қилса, шу биз үчүн чоң бəхиттур. Биз йетəлмигəн арзу-арманларға балилиримиз йəтсекән, дəймиз. Қизлиримни ойлисам, ағриғимниму унтуп қалимән. Жутумға рəхмәт ейтқум келиду, чүнки улар дайим бизни қоллап-қувəтләп келиватиду. Иккинчи қизимниң оқушқа чүшүшигә ярдәм қилған Алмута шəһəрлик Уйғур этномəдәнийәт мəркизиниң рәиси Абдуллам Һошуровқиму миннәтдарлиқ билдүримән. Илаһим, шундақ сахавәтлик инсанлар көп вә аман болсун! Сәйпуллам билән Земфираниң кәнҗә қизи Сумбатму һәрхил жилларда «Баһар қайтиду» намлиқ иҗадийәт көрүгидә І орунни, Һебибуллам Қаһаров намидики җумһурийәтлик «Һошшәрә, талантлар!» көрүгидә ІІІ орунни егиләшкә мүйәссәр болди. «Бейбітшілік əлемі» Қазақ иҗадий бирләшмиси тәрипидин уюштурулған көрүкләргә қатнишип, икки жил уда Баш мукапатқа еришип, Дубай, Новосибирск вə Анталья шәһәрлиридә өтидиған конкурсларға йолланмилар алди. Бийил униң язған илмий лайиһиси І орунға лайиқ дәп баһаланди. Сумбатниң «Мениң арминим» намлиқ шеири «Тунҗа қəдəм» китавида бесилди. Земфира кәнҗисиниң медицина институтида билим елип, дайим йенида болушини арман қилиду. – Қизлирим – һаятимниң мәнаси. Улар билəн һаят гөзəл, – дәйду Земфира. Земфира балилириниң – келәчәк егиси, әвлат давами, хәлиқ ишәнчиси екәнлигини яхши чүшиниду. Мана шундақ ирадилик аял-аниларға апирин! Илаһим, Алла униңға анилиқ еқидә-әҗриниң йемишини көрүшни несип қилғай! Әмгәкчиқазақ наһийәси.

563 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы