• «Уйғур авазиниң» сәйилгаһи
• 18 Маусым, 2018

Уйғур жигитлириниң утуқлири

“Әркин Азия” радиосиниң хәвиригә қариғанда, йеқинда икки нәпәр қазақстанлиқ тәнһәрикәтчи гимнастика бойичә дуниявий мусабиқиләрдә күмүч медаль елишқа муйәссәр болған.Хәлиқарида муваппәқийәт қазанған оғланлиримизниң бири – 20 яшлиқ Нариман Қурбанов. У Словенияниң Копер шәһиридә өткән гимнастика бойичә дуния чемпионатида “Ат үстидики һәрикәт ” бойичә күч синашқан 42 спортчиниң арисидин топ йерип, утуқ қазанған. Нариман аз күндә Қазақстанда өтидиған җумһурийәтлик мусабиқигә қатнишип, андин Индонезиядә болидиған Азия биринчилигигә тәйярлиғини башлаветиду. Гимнастикиниң нәқ мошу йөнилиши бойичә утуққа еришкән йәнә бир пәрзәндимиз – 19 яшлиқ Һаким Мусаев. У қатнашқан дуниявий мусабиқә Хорватияниң Осийек шәһиридә болуп өтти. Спортниң бу түри билән 6 йешидин башлап шуғуллиниватқан бу талантлиқ жигит бүгүнки күнгә қәдәр бирқатар хәлиқара мусабиқиләрдә муваппәқийәт қазинип үлгәргән. Нариман билән Һакимниң устази һәм ғәмхорчиси, ”Кентавр” қабилийәтлик тәнһәрикәтчиләргә ярдәм қилиш җәмийәтлик фондиниң президенти, Қазақстанниң хизмәт көрсәткән мәшиқләндүргүчиси Махмут Искәндәров талантлиқ уйғур жигитлириниң бу қетимқи утуқлиридин толуқ қанаәтлинидиғанлиғини билдүргән. У шундақла уйғур пәрзәнтлириниң өз миллитиниңла әмәс, бәлки мустәқил елимиз шәнини қоғдиғанлиғини мәмнунийәт билән тәкитлиди.