• Сәнъәт
• 18 Маусым, 2018

Павлодарға «Баһар» кәлди

Рашидәм РӘҺМАНОВА, «Уйғур авази» Әмгәкчиқазақ наһийәсиниң Раһат йеза округиға қарашлиқ Раһат, Қәйнәзәр вә Азат йезилирида уйғурлар зич җайлашқан. Мәзкүр округта талантлиқ сәнъәткарлар көпләп санилиду. Мәсилән, буниңдин онлиған жиллар илгири Абдрахман Тайиров рәһбәрлигидә һәвәскарлар топи қурулуп, узун вақит көпчиликниң көңлидин чиқип кәлди. Азат толуқсиз мәктивидә «Диләрәм» ансамбли бәрпа болди. Униң рәһбири Юнус Имиров балиларни нахша-сазға үгәтсә, ушбу мәктәпниң музыка пәниниң муәллими Гүлзарәм Сулайманова онлиған яш уссулчи қиз-жигитләрни тәрбийиләп чиқти. Шуларниң бири – Имселимәм Ниязова.Имселимәм 5 йешидин уссул ойнашқа башлиған. Гүлзарәм һәдә бу әҗайип қабилийәтлик, сәнъәткә бөләкчә иштияқ бағлиған қизчақниң талантини риваҗландуруш үчүн униңға 9-синипни тамамлиғичә уйғур хәлқиниң әвришим уссуллириниң қир-сирини үгәтти. Мәктәпниң шу чағдики мудири Иврайим Исмәков болса, Имселимәмниң Әмгәкчиқазақ наһийәси вә Алмута вилайити миқиясида өткән конкурсларға қатнишиши үчүн шараит яритип турди. Имселимәм 2011- вә 2013-жиллири вилайәтлик «Жетісу жұлдыздары», «Чер лидер» байқашлириниң ғалиби аталди. Мәктәпни тамамлиғандин кейин Имселимәм йезида «Баһар» ансамблини тәшкил қилип, уссул сәнъитигә муһәббәт бағлиған гөдәкләрни тәрбийиләп келиватиду. Ансамбль тәркивидә 5 – 16 яш арилиғидики 30дин ошуқ оғул вә қиз бар. Башта наһийә даирисидә паалийәт елип барған ансамбль кейинки вақитларда чоң-чоң сәһниләрдин көрүнүшкә башлиди. Мәсилән, өткән айда «Баһар» ансамбли Астана шәһиридә өткән «Бала шабыты» хәлиқара конкурсиға қатнишип, Баш мукапат — «Гран-Приға» еришсә, ансамбль нахшичиси Наиля Тохтахунова І орунни алди. Йеқинда «Баһар» ансамблиниң тәркивидики яш сәнъәткарлар Павлодар шәһиридә өткән «Казахстан-Star» хәлиқара конкурсиға иштрак қилип, һүнирини намайиш қилди. Уларниң орунлишидики «Тәклимакан» уссули 80 номерниң ичидә І орунға лайиқ дәп тепилса, «Бөшүк уссули» Баш мукапатқа еришти. Әнди ансамбльниң рәһбири Имселимәм болса «Наз» ансамблиниң бәдиий рәһбири Қадиша Ағимбаеваниң маһарәт дәрислиригә қатнишип, мәхсус сертификат вә «Әң яхши қойғучи-хореограф» медали билән мукапатланди. – Дәсләпки жиллири йезидики Мәдәнийәт өйидә ихчам концертларни уюштуруп жүрдуқ, – дәйду Имселимәм сөһбәтара. – Уларға асасән йеза турғунлири кәлгәнликтин, билетлиримизниң баһасиму әрзән болди. Башта һүниримизни вә әмгигимизни жутдашлиримизға көрсәттуқ. Концертлардин чүшкән мәбләққә топ әзалириға кийим-кечәк сетивалдуқ. Сәнъәт йолумда устазлирим Иврайим Исмәков, Гүлзарәм Сулайманова, Қәйнәзәр Мәдәнийәт өйиниң мудири Райхан Жанбосынова қатарлиқ сахавәтлик инсанлар ярдәм қолини сунуп, йеқиндин яр-йөләк болди. Улардин чәксиз миннәтдармән. Шундақла Павлодарға дәсләпки қетим барғинимизда, бизни қучақ ечип қарши алған Павлодар вилайәтлик Уйғур этномәдәнийәт мәркизиниң рәиси Арсен Турдиевқа сәмимий миннәтдарлиғимни изһар қилғум келиду. Хәлқимизниң бай сәнъитини әвлаттин-әвлатқа йәткүзүватқан сәнъәткарлар үчүн милләтпәрвәр ака- һәдилиримизниң қоллап-қувәтлиши интайин муһим. Шундақ екән, биз «Баһар» ансамблиниң тәркивидики сәнъәткарларға пәқәт утуқлар тиләймиз. Әмгәкчиқазақ наһийәси.