• Әхбаратлар еқими
• 18 Маусым, 2018

Конкурс ғалиплири ениқланди

Қазақстан Җумһурийити Әхбарат вә коммуникацияләр министрлиги билән “Ниет” хәйрихаһлиқ фонди тәрипидин уюштурулған “Ниет” иҗтимаий роликлар үчүн әң яхши идеяләр конкурсниң ғалиплири ениқланди.Конкурсқа қатнишиш үчүн қазақстанлиқлардин әң актуал мавзуларға йезилған 600дин ощуқ сценарий келип чүшти. Уларниң ичидин әң яхши дегән 10 әмгәк таллавелинди. Конкурсниң баш мукапити – миллион тәңгә – алмутилиқ Дмитрий Галабирға тапшурулди. Униң ролигида ата-аниси өз ишлири билән бәнт болған кичик балиниң һаяти тоғрилиқ һекайә қилиду. Пәқәт гөдәкләр интилишиниң нәқәдәр муһим екәнлигини чүшәнгән балиниң бовисила униңға ярдәм қилмақчи, йәни у арман қилған соғини тапшурмақчи болиду. Конкурс ғалибиға дипломни вә мукапатни Қазақстан Җумһурийитиниң әхбарат вә коммуникацияләр министри Дәурен Абаев тапшурди. Министр шундақла иҗтимаий роликта баш рольни ойниған балиғиму оюнчуқларни һәдийә қилди. Конкурста иккинчи орунға асасий идеяси Вәтәнгә болған муһәббәттин ибарәт сценарийни әвәткән Қуаныш Омаров еришти. Униңға мәхсус диплом вә Apple MacBook ноутбуки тапшурулди. Үчинчи орунға егә болған Ринат Турғанбеков диплом вә Canon фотокамерисиға сазавәр болди. Шундақла мукапатлиқ орунларға егә болған әң яхши йәттә сценарийниң муәллиплиригә мәхсус диплом вә рәғбәтләндүрүш мукапатлири тапшурулди. Уларниң арисида “Қазақ газеттері” ҖЧЙ сайтиниң муһәррири Гаухар Түстикбаеваму бар.