• Әхбаратлар еқими
  • 21 Маусым, 2018

Әҗдатлар роһиға беғишланди

Сабирәм ӘНВӘРОВА, «Уйғур авази» Гезитимизниң өткән санлириниң биридә Алмута шәһиридә истиқамәт қиливатқан чоңақсулуқ Әли Әхмәтов, Сраждин Турсунов, Данияр Розахуновниң һамийлиқ қилиши билән Уйғур наһийәсиниң Чоң Ақсу йезисида «Ату» паҗиәсиниң қурванлириға хатирә таш қоюлғанлиғи һәққидә йезилған еди. Хулләс, бүгүнки күндә бу соваплиқ иш оңушлуқ аяқлишип, өткән һәптиниң шәнбә күни әлгә тонулған әрбаплиримиз, зиялилар, шаир-язғучилар, қисқиси, жүриги «хәлқим» дәп соққан қериндашлиримиз Чоң Ақсу йезисиға қәдәм тәшрип қилди.Дәрһәқиқәт, жирақ-йеқиндин кәлгән меһманларниң санида чәк болмиди. Көпчилик дәсләп «Ату» паҗиәси йүз бәргән җайда җәм болди. Йеза имами ата-бовилиримизниң роһиға беғишлап дуа қилди. Шуниңдин кейин, буниңдин бир әсир илгири гунасиз набут болған йүзлигән ата-бовилиримизниң җәсиди көмүлгән тәвәррүк топрақниң қучиғи бир пәстә дәстә-дәстә гүлләр билән гүлчәмбәрләргә толди. Чоң Ақсу йезисидин чиққан шаир Тельман Нурахунов мәзкүр мәрасимға риясәтчилик қилип, дәсләпки сөзни җумһурийәтлик Уйғур этномәдәнийәт мәркизи йенида “Ату” вақиәсиниң 100 жиллиғини хатириләп өтүш бойичә қурулған комиссия әзаси, вакаләтән тарихчи, профессор Абдуллам Самсақовқа бәрди. Натиқ мәзкүр чарә-тәдбирниң нәқәдәр әһмийәтлик екәнлигигә тохтилип, ҖУЭМниң жиллиқ реҗисидә асасий чоң үч мәсилә болғанлиғини, уларниң бири латин алфавитиға бағлиқ өтүлгән чарә-тәдбирләр, бири алда нишанлинидиған Уйғур мәтбуатиниң 100 жиллиғи болса, йәнә бир муһим чарә «Ату» паҗиәсиниң 100 жиллиқ сәнәси, һәм сәясий тәқипләш вә ачарчилиқ жиллири қурванлири күнини атап өтүш екәнлигини тәкитлиди. Роза һейтиниң иккинчи күни Л.Мутәллип, Ғ.Сәдвақасовтәк исми тарихта қалған намайәндилиримизниң жутиға җәм болуштики асасий мәхсәт, жуқурида тәкитләнгинидәк, «Ату» паҗиәси вә сәясий тәқипләш қурванлирини һәм ачарчилиқ жиллири көз жумған ата-бовилиримизни әскә елиш екәнлигини тилға алди. Андин натиқ Чоң Ақсу жутиға бир түркүм китапларни ианә қилди. Новәттә сөзгә чиққан Уйғур наһийәлик «Қоғамдық келісім» кеңишиниң рәиси Жеңис Тойшибеков ушбу чарини Дөләт рәһбириниң «Келәчәккә нишан: мәнивий йеңилиниш» мақалиси билән бағлаштурса, Москвадин кәлгән уйғур шаири Вильям Садиқов «Ату» паҗиәсигә беғишлап язған шеирини оқуп бәрди. Көрнәклик язғучи, Қазақстанниң хизмәт көрсәткән әрбаби Әхмәтҗан Һашири өмлүгимизниң мәңгүлүк болушини тилиди. Байсейит йезиси И.Тайиров намидики уйғур оттура мәктивиниң 8-синип оқуғучиси Сумбат Сәйдуллаева шаир Вильям Молотовниң «Ату» паҗиәси һәққидә йезилған «Үнсиз сада» намлиқ шеирини ядқа ейтип, һәммидә чоңқур тәсират қалдурди. Мошу ишниң бешида болуп, маддий вә мәнивий җәһәттин қоллап-қувәтләп кәлгән Әли Әхмәтов жутниң хизмитидә жүргән жигитбеши Махмут Исрайиловқа һәм униңға йеқиндин ярдәм қилған жутдашлири Қасим Қәмәевқа, Мусаҗан Тайиповқа вә башқиму чоң-кичик жутдашлириға, нәзирниң дәстихинини өз һөддисигә алған Һурнисәм Рәхмәтҗановаға миннәтдарлиғини изһар қилип, М.Исрайиловқа чапан кийгүзди. Өз новитидә сөзгә чиққан йеза һакими П.Мөрдиновму жутдашлириға йол-йоруқ көрситип, ушбу изгү башланмиға түрткә болған Ә.Әһмәтов, С.Турсунов, Т.Нурахунов, Ғ.Меманов, Ә.Рисәков, Д.Розахуновқа Чоң Ақсу жути намидин миннәтдарлиқ билдүрди. Уйғур наһийәси.

462 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы