• Әхбаратлар еқими
• 21 Маусым, 2018

Токио турғунлири тәбрикләйду

Токио турғунлири мәмликәт Президентини вә Қазақстан хәлқини Астананиң 20 жиллиғи билән тәбрикләйду.Япония пайтәхтиниң губернатори Юрико Койке Қазақстан Җумһурийитиниң Япониядики әлчиси Ерлан Баударбек-Қожатаевқа Астананиң 20 жиллиқ юбилейи мунасивити билән Президент Нурсултан Назарбаевниң намиға йезилған тәбрикни тапшурди. Губернатор қазақстанлиқларға течлиқ, утуқ вә гүллиниш тиләп, Дөләт рәһбириниң пайтәхтниң җошқун тәрәққиятида чоң роль ойниғанлиғини тәкитләйду. Юрико Койкениң сөзичә, қисқа вақит ичидә Астана көпчилик тонуйдиған пайтәхткә айланди. 2017-жили “ЭКСПО” Хәлиқара көргәзмисиниң утуқлуқ өткүзүлүши әйнә шуниң испати болуп һесаплиниду. Губернатор һазирқи вақитта Токиониң 2020-жили Олимпиада вә Паралимпиада оюнлирини өткүзүшкә тәйярлиқ көрүватқанлиғини һәм чәт әлләрдин нурғунлиған меһманларниң келишини күтүватқанлиғини тәкитлиди. Шәһәр һөкүмити Аләмшумул достлуқ илим лайиһисини әмәлгә ашуруватиду. У Токио балилирини дунияниң түрлүк мәмликәтлириниң, җүмлидин Қазақстанниң мәдәнийити вә алаһидиликлири билән тонуштурушқа қаритилған. У шундақла Қазақстан командисиниң Токио олимпиадисида яхши нәтиҗиләрни қолға кәлтүридиғанлиғиға үмүт билдүрди. Шу нәрсә диққәткә сазавәрки, һазир Токио юбилейлиқ сәнәни – пайтәхтниң Киотодин көчирилгининиң 150 жиллиғини нишанлаватиду. Һазир мошу шәһәр умумий ички мәһсулат дәриҗиси бойичә – 1,5 триллион доллар – дуниядики әң чоң шәһәр болуп һесаплиниду. У шундақла туризм вә бехәтәрлик нуқтәий нәзәридин иккинчи жил уда дуниядики мәптункар шәһәр атиливатиду. Әлчи Ерлан Баурдарбек-Қожатаев өз новитидә губернаторни Қазақстан пайтәхтиниң тәрәққияти билән тонуштурди.