• Әхбаратлар еқими
• 21 Маусым, 2018

Улуқ даланиң бирләштүргүчи күчи

Астанада Хәлиқара Түрк академияси Қазақстан Җумһурийити Президенти Мәмурийитиниң қоллап-қувәтлишидә уюштурған III Хәлиқара “Улуқ дала” иҗтимаий пәнләр форуми болуп өтти. Униңға Қазақстан Җумһурийитиниң дөләт кативи Гүлшара Әбдиқалықова қатнашти.Дөләт кативи форумни ечип, Қазақстан Президентиниң “Бизниң муқәддәс йеримизни қедимдин тартип Улуқ дала, әҗдатлиримизни – Улуқ дала балилири дәп атайду. Биз – уларниң избасарлири, Улуқ дала мирасхорлири” дегән сөзлирини әслитип өтти. – Улуқ дала – чоңқур мәзмунға егә вә пүткүл түрк дуниясини бирләштүридиған муқәддәс чүшәнчә. У чоң Евразия кәңлигидә яшаватқан барлиқ хәлиқләрниң тәғдирини өз ичигә алиду, – дәп тәкитлиди Гүлшара Әбдиқалықова. Дөләт кативи мәнивий йеңилиниш тоғрилиқ гәп қилип, униң мәхсәт вә вәзипилириниң пәқәт Қазақстанниңла әмәс, бәлки барлиқ түркий мәмликәтләрниң идеаллириға мувапиқ келидиғанлиғиға диққәт ағдурди. Дөләтләр билән хәлиқләр аләмшумул дунияда утуқлуқ вә риқабәткә тақабил туруш үчүн вақит тәләплиригә маслишиши, өзиниң әқлий иқтидарини күчәйтиши, дуниявий җәриянларниң қайнимида болуши, мәдәний мираси вә қәдрийәтлирини сақлап, тәрәққий әткүзүши керәк. Форумға қатнишиш үчүн Астанаға Қазақстан, Әзәрбәйҗан, Германия, Қирғизстан, Хитай, Монғолия, Өзбәкстан, Таҗикстан, Россия, Түркия вә башқа мәмликәтләрдин болуп 250тин ошуқ алим жиғилди. Чарә-тәдбиргә шундақла Түркия Президентиниң мәслиһәтчиси Айгюн Аттар, Қирғизстан Президентиниң мәслиһәтчиси Султанбай Раев, Монғолия Пәнләр академиясиниң Президенти Рэгдэл Дугэрийн, хәлиқара тәшкилатларниң рәһбәрлири, дипломатлар, җәмийәт әрбаплири қатнашти. Султанбай Раев форум қатнашқучилириға Қирғизстан Президентиниң тәбригини йәткүзди. Униңда Сооронбай Жээнбеков “Улуқ дала” форуминиң өткүзүлүшини қоллап-қувәтләйдиғанлиғини тәкитләп, қазақстанлиқларни Астананиң 20 жиллиғи билән тәбрикләйду. – Буниңдин 20 жил илгири Қазақстан пайтәхтиниң Астанаға көчирилиши – мустәқил дөләт тарихидики чоң қәдәм. Мошу вақит ичидә шәһәр течлиқ, бехәтәрлик, турақлиқ тәрәққият мәсилилири һәл қилиниватқан җайға айланди, у муһим геосәясий вә мәдәний мәркәз, – дәп тәкитлиди сөз новитидә Айгюн Аттар. Форумда тюркология пәнини тәрәққий әткүзүшкә чоң һәссә қошқан алимларни мукапатлаш мәрасими болуп өтти. Мәсилән, филологлар Фердаус Хисамидиноваға вә Николай Егоровқа Түрк академиясиниң алтун медали, филолог Олег Мудрак билән тарихчи Чулуун Сампилдондовқа В.Томсон намидики алтун медали тапшурулди. Форум даирисидә Гүлшара Әбдиқалықова бирқатар мәмликәтләр делегациялири рәһбәрлири билән учрашти.