• Әхбаратлар еқими
• 21 Маусым, 2018

Һәмкарлиқ йөнилишлири

Президент Нурсултан Назарбаев Россия Федерациясигә қилған иш бабидики сәпири даирисидә Татарстан Җумһурийитидә болуп, Президент Рустам Минниханов билән учрашти.Музакириләр давамида тәрәпләр өзара мунасивәтләрниң һазирқи мәсилилирини вә тәрәққият планлирини муһакимә қилди. Дөләт рәһбири Татарстан иҗтимаий-ихтисадий тәрәққиятиниң жуқури сүръәткә егә екәнлигини тәкитлиди вә иккитәрәплимә алақиларни чоңқурлитишниң истиқбаллиқ йөнилишлирини атап көрсәтти. Нурсултан Назарбаев Қазақстан вә Татарстан оттурисида әң йеқин һәм ишәшлик мунасивәтләрниң қелиплашқанлиғини тәкитлиди. Президент шундақла сода-ихтисадий вә инвестициялик һәмкарлиқни күчәйтишниң муһим екәнлигигә диққәт ағдурди. – Силәрдә IT-технологияләр саһаси яхши тәрәққий етиватиду. Бизниң яшлиримиз мошу тәҗрибини үгиниши зөрүр. Шундақла регионларара һәмкарлиқ йолға селиниватиду. Өзара сода көләми 700 миллион долларғичә көпәйди вә әнди биз бир миллиард доллар көрсәткүчини қолға кәлтүрүшимиз керәк, – дәп тәкитлиди Дөләт рәһбири. Қазақстан Президенти машина ясаш, мудапиә вә космос санаити саһалирида бирләшкән карханиларни қуруш мүмкинчиликлирини атап көрсәтти. Нурсултан Назарбаев шундақла Татарстанниң нефть мәһсулатлирини қайта ишләш саһасини тилға алди. – Барлиқ мәмликәтләр альтернативилиқ энергия мәнбәлирини пайдилинишқа көчүватиду. Шуниң билән биллә, йеқинқи 50 жилда нефть вә газму тәләп қилиниду. Биз мана мошу арилиқтин пайдилинип, қайта ишләш санаитини вуҗутқа кәлтүрүшимиз керәк. Қазақстан Президенти униңдин ташқири йеза егилиги саһасидики һәмкарлиқ мәсилилиригә диққәт ағдурди. – Йеза егилиги пәнини тәрәққий әткүзүш зөрүр. Шундақла Россиягә гөш йәткүзүшимиз мүмкин. Биз жуқури сүпәтлик кала гөшини йетиштүрүш үчүн қара малниң әң яхши нәсиллирини кәлтүрдуқ, – деди Нурсултан Назарбаев. Дөләт рәһбири шундақла Қазақстанниң транзит-транспорт иқтидарини тәрәққий әткүзүш вә инфрақурулумлуқ программиларни әмәлгә ашуруш нәтиҗилиригә тохталди. Қазақстан Президенти шуниң билән бирқатарда мәдәний-һәмкарлиқ, шу җүмлидин маарип вә медицина саһалирида алақиларни йолға селиш мәсилилиригә диққәт ағдурди. – Қазанниң утуқлуқ тәрәққий етиватқанлиғи мени хошал қилиду. Бизниң Россия билән болған умумий өзара мунасивәтлиримиз даирисидә Татарстан йетәкчи орунларниң бирини егиләйду. Биз икки хәлиқниң бәхит-саадити үчүн һәмкарлиқни техиму тәрәққий әткүзимиз, – дәп билдүрди Нурсултан Назарбаев. Дөләт рәһбири Рустам Миннихановниң хәлиқләр оттурисидики достлуқ, өзара чүшәнчә вә ишәнчини күчәйтишкә қошқан һәссисини тилға елип, Татарстан Җумһурийитиниң Президентини I дәриҗилик “Достық” ордени билән мукапатлиди. Өз новитидә Рустам Минниханов ихтисатниң түрлүк секторлиридики нәтиҗидарлиқ иккитәрәплимә һәмкарлиқниң муһимлиғини тәкитлиди. – Бүгүнки күндә Қазақстан – бизниң әң асасий шеригимиз. Утуқлуқ бирләшкән лайиһиләрни әмәлгә ашуруш тәҗрибиси муһим болуп һесаплиниду, – деди Татарстан Җумһурийитиниң Президенти. Рустам Минниханов шундақла Қазақстанда билим бериш системисиниң сүръәтлик тәрәққий етиватқанлиғини тәкитлиди вә студентларни алмаштуруш җәриянини җанландурушқа тәйяр екәнлигини билдүрди. Татарстан Президенти шундақла Астанада өткән “ЭКСПО-2017” Хәлиқара көргәзмисини зиярәт қилиштин алған тәсиратлири билән ортақлашти. – “ЭКСПО–2017” көргәзмиси жуқури дәриҗидә өтти. Силәр күчлүк вә заманивий мәйданни вуҗутқа кәлтүрдиңлар, мошу комплекс асасида “Астана” Хәлиқара малийә мәркизиниң ечилиши ярқин вақиәгә айлиниду вә биз буниңдин кейин шу мәркәз даирисидә қазақстанлиқ кәсипдашлиримиз билән ишләшни халаймиз, – деди Рустам Минниханов. Қазақстан Президенти Татарстан рәһбири билән учришиштин авал Қазан федерал университетида болған еди. Нурсултан Назарбаев профессор-оқутқучилар тәркиви билән учришиш алдида Қазанда оқуватқан қазақстанлиқ студентлар билән сөһбәтләшти. Президент яш вәтәндашларға оқушида утуқ вә муваппәқийәтләр тилиди. Алий оқуш орнини зиярәт қилиш вақтида Дөләт рәһбиригә “Қазан федерал университетиниң пәхрий пән доктори” унвани берилди. Нурсултан Назарбаев Татарстан Җумһурийитигә қилған иш бабидики сәпири даирисидә шундақла Қазан шәһиридә санаәт карханилириниң көргәзмисини зиярәт қилди. Дөләт рәһбиригә кемә вә машина ясаш саһаси, шундақла-мудапиә-санаәт комплекси карханилириниң мәһсулати көрситилди. Җүмлидин Қазақстан Президенти экологиялик таза вә тәбиий энергия мәнбәлирини пайдилинидиған транспорт үлгилири билән тонушти. Қазақстан Президенти шундақла Булғар шәһирини вә территориясидә Успен Худа-ана әрләр монастыриниң баш ибадәтханиси Успен Собори орунлашқан Град Свияжск арилини әслигә кәлтүрүш плани билән тонушти.