• Хәйрихаһлиқ
  • 27 Маусым, 2018

Рабдулни әсләткән концерт

Бәхтишат СОПИЕВ, «Уйғур авази» Буниңдин икки ай илгири 12-шәһәрлик ағриқханида алмутилиқ 31 яшлиқ Рабдул Һевуллаев бемәзгил көз жумди. Дохтурларниң қойған диагнози – пневмония. Әтиси Рабдулни миңлиған адәмләр ахирқи сәпәргә узатти. Униң намизиға кәлгәнләрниң сани йоқ. У күни машиниларниң алди қәбирстанлиққа йәтсә, кәйни мусибәт чиққан өйдә болди. Көңүл ейтип кәлгәнләрниң арисида мәрһумниң чәт әлләрдә яшаватқан достлириму бар...Бизниң Рабдул мәзкүр мақалини йезишимизға «Уйғур авазиниң» электрон почтисиға Украинидин кәлгән төвәндики хәт сәвәп болди. – Биз Рабдул билән ШУАРда, йәни шу йәрдә уюштурулған «Талант сәһниси» шоу-программисида тонуштуқ, – дәп башлапту хәтни муәллипләр. – Мәшиқлиниш пәйтидә биринчи қетим уйғурлар билән көрүшүп вә шу милләтниң уссулини тамашә қилдуқ. Рабдул өзиниң әҗайип маһирлиқ билән иҗра қилған уссули арқилиқ бизгә пүтүн бир милләтни тонутти. Униң маһаритидин әҗайип тәсирләндуқ. Ундақ пластикини биз һечқачан көрмигән едуқ. Умумән мундақ уссулни биринчи қетим көрүшимиз дәп ейтсақ мубалиғә болмас. Униңға уйғурлардин тәркип тапқан жюрилар жуқури баһа бәрди. Һәтта бир жюри әзаси қизип кетип, униң билән уссулғиму чүшти. Хаталашмисақ, Рабдулни Қазақстандин Рустәм Сонуров исимлиқ жигит елип кәпту. У яқ «Талант сәһнисиниң» Қазақстандики вәкили екән. Рабдул билән Рустәм бизгә уйғурлар тоғрилиқ көп нәрсиләрни ейтип бәргини ядимда. Улар мәзкүр шоу-программа җәриянида бизгә тәрҗиманлиқму қилди. Рабдулниң вапати һәққидә аңлап, наһайити қайғурдуқ. Униң иллиқ чирайи, хуш күлкиси, шох уссули дәрһал көз алдимизға кәлди. Рабдулниң ата-анисиға, қом-қериндашлириға чоңқур қайғуруп тәзийә билдүримиз. ШУАРдики учришишта Рабдулниң өзи һәққидә һечнәрсә сорап үлгәрмәптимиз. Мүмкин болса, Рабдул һәққидә әтраплиқ әхбарат бәрсәңлар». Татьяна Колесниченко вә Александр Урда «STUDІO RAR продакшен» кампаниясиниң рәһбәрлири. Рабдул Һевуллаев аддий уйғур аилисидә туғулған жигит. У Алмута шәһәрлик коммунал егилигидә ишләвататти. У алтә йешидин уйғур миллий уссуллирини бабиға йәткүзүп орунлашқа башлайду. Уссулни у дадисидин үгәнгән екән. Дадиси Рабдулниң бовисидин үгәнгән болуп чиқти. Бу үчи уссулға чүшкәндә һәрқандақ мәрасимни қиздуриветәтти. Рабдул он йешида көпчиликниң көзигә чүшүшкә башлайду. Униң дәсләпки қетим “Ипархан” продюсерлиқ мәркизи тәсис қилған «Хошә!!!» шоу-программисида Артур Илахуновниң иҗрасидики «Әзиз яр» нахшисиға тамашибинлар арисидин туруп, уссулға чүшкини һелиму ядимда. Шу вақитта алдинқи қатарда олтарған Қазақстан хәлиқ артисти Мурат Әхмәдиев Рабдулниң қолини елип, униңға визиткисини бәргән еди. У келәчәктә Рабдулниң Уйғур театриниң сәһнисидә көрүшни арман қилған болса керәк. Шуниңдин кейин у «Хошәниң» иштракчилири билән Түркиядә өткән IX хәлиқара “FOMGED” балилар фестивалиниң ғалиби аталди. Амма у чоң болғанда сәнъәтни таллимиди. Уйғурниң миллий уссулини ойнаш униң хоббиси болуп қаливәрди. Қазақстан уйғурлири арисида Рабдулни тонумайдиған уйғур йоқ еди десәм, хаталашмаймән. Оттуз оғулниң һәқиқий мәнасидики гүли еди. Ахирқи қетим у ШУАРда өткән «Талант сәһниси» шоу-программисиға қатнишип, биринчи басқучтин муваппәқийәтлик өтти. Амма бу униң ахирқи уссули екән... Өткән һәптидә Рабдулниң алмутилиқ достлири униң туғулған күнини атап өтти. Достлири Сайит Мәсимов билән Һаким Абдуваҗитов биртүркүм нахшичилар коллективларниң қоллап-қувәтлишидә Талғир наһийәсиниң Туздыбастав йезисидики Мәдәнийәт өйидә Рабдулниң хатирисигә хәйрихаһлиқ концерт уюштурди. Униңға Рабдулниң ата-анилири билән қериндашлириниму тәклип қипту. Туздыбастав йезисидики «Азия» уссулчилар топи (хореограф Ислам Исрайилов) Рабдулниң уссуллирини бир ай үгинипту. Улар Рабдулниң һәрбир һәрикитини қайтилиғанда, залда олтарғанлар әриксиз көзлиригә яш алди. Залда җим-җитлиқ һөкүм сүрди. Мундақ пәйтләрни Зулпиқар Зайитов, Пәрһат Мәсимов, Әхмәтҗан Тайиров, Радик Өмәров, Сәйярә Сетәкова, Бәхтияр Һошуров, Нариман Һаширов, Таһир Ибрагимов қатарлиқ сәнъәткарлар хушхой нахшилири арқилиқ билиндүрмиди. Ахирида уюштурғучилар сәһнигә Рабдулниң ата-анисини чиқирип, уларға концерттин чүшкән пулни ианә қилди вә хатирә соғисини тапшурди. Өз новитидә улар Рабдулниң ағинилиригә миннәтдарлиғини билдүрди.

185 рет

көрсетілді

0

пікір
Алдыңғы мақала Издигини — изгүлүк
Келесі мақала “Сән яшайсән!”

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

13 Қаңтар, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы