• Әхбаратлар еқими
  • 11 Шілде, 2018

Әдәбиятимиз келәчиги парлақ болуши лазим

Иҗатқа һәвәс бағлиған биртоп яшларниң бешини қошқан «Варис» әдәбий-иҗадий бирләшмиси қисқа вақит ичидә хелә ишларни әмәлгә ашурди, дәп ишәшлик ейталамиз. Бизни қоллап-қувәтлигүчиләрниң ярдими билән дәсләп бәстикар Полат Һезимовниң йетәкчилигидики хәлқимиз нахшилирини сөйүп тиңшайдиған «Тарим» ансамбли билән бирликтә «Гүлстан» кафесида әдәбий-музыкилиқ кәч уюштурулди; «12 муқам» ресторанида йеңи форматтики «Хуш дәмләр» шеирийәт мәйрими өтти; Абдулла Розибақиев намидики 153-мәктәп-гимназиясидә «Әдәбий достлуқ – әбәдий достлуқ» мавзусида яш уйғур вә қазақ шаирлириниң учришиши муһим чарә-тәдбирләрниң бири болди.«Варис» уюштурған бу бир нәччә чарә-тәдбирләр билән биллә яшларниң топламлири бириниң кәйнидин бири нәширдин қилинишқа башлиди. Дәсләп, яш болғиниға қаримай, өзиниң таланти билән көзгә көрүнгән Сабирәм Әнвәрованиң «Ақ чечәк» шеирлар топлими йоруқ көрди. Андин Абдулҗан Азнибақиевниң сехирлиқ яшлиқниң тилсим қәтрилирини өз ичигә алған «Яшлиқ лирикилири» китави нәширдин чиқти. Альбина Әмәтованиң өзигә хас алаһидилиги билән ярқин ипадиләнгән «Мәҗнунтал» намлиқ топлимиму яшлар иҗадийитиниң йәнә бир ярқин көрүнүши болди. Мәзкүр қурлар муәллипиниң қәлимигә мәнсүп «Юлтузларда арманлар» топлимиму йеқинда оқурмәнләр билән үз көрүшти. Язғучи Әхмәтҗан Һашириниң тәшәббуси билән топланған яш иҗаткарларниң «Арзу булақлири» намлиқ умумий топламниң нәшир қилиниши әң чоң утуғимиз болди, десәк ашурувәткәнлик әмәс. Чүнки, биринчидин, мундақ умумий топламниң чиқмиғиниға талай жиллар бопту, иккинчидин, бу топламға жигирмидин ошуқ яш шаирниң шеирлири киргүзүлди. Әлвәттә, жуқурида аталған топламлар нәширдин чиқиши үчүн бәлгүлүк мәбләғни тәләп қилиду. “Яхшиниң яхшилиғини ейт, қәдри ашсун” демәкчи, бу мәсилидә хәлқимиз ичидин чиққан сехи инсанлар қол қоштуруп олтармиди. Мәсилән, «Ақ чечәк» — Алатав наһийәлик Ханим-қизлар кеңишиниң рәиси Ағчихан Һәмраеваниң, «Юлтузларда арманлар» билән «Мәҗнунтал» — миллий мәдәнийитимизниң җанкөйәри, коллекционер Азат Һекимбәгниң, «Арзу булақлири» җумһурийәтлик Уйғур этномәдәнийәт мәркизи йенидики Мизангүл Авамисимованиң йетәкчилигидики «Җанан» Ханим-қизлар фондиниң һамийлиғида йоруқ көрди. «Варис» қурулған күндин башлап, ана тилимизда нәшир қилиниватқан «Уйғур авази», «Азия бүгүн» гезитлири, «Иҗаткар», «Әхбарат», «Интизар» вә «Ғунчә» журналлири яшларниң иҗадини турақлиқ йорутуп келиватиду. Униңдин башқа Абдулҗан Азнибақиев билән Шахназ Җамашеваниң шеирлири қазақ вә рус тиллириға тәрҗимә қилинип, «Қазақ әдебиеті», «Жұлдыз» охшаш нәширләрдә бесилди. Дәл һазирқи вақитта Тәғдир Октябров, Аида Әхмәтова. Шахназ Жамашева, Гүлнарәм Аблиз, Қолдаш Шәмшидинов, Дилинур Өмәрова, Шөһрәт Илиев қатарлиқ яшлиримиз қизғин издиниш үстидә иҗат илип кәлмәктә вә бу яшларниң келәчигидин үмүт күтүшкә асас бар. «Варис» пәқәт заман тәливигә лайиқ бирләшмә болупла қалмай, бәлки шу тәләпләргә йөнилиш беридиған, уларни шәкилләндүридиған йолни тутуши шәрт. Мақаләмни аяқлаштуруп, «Варис» әдәбий-иҗадий бирләшмисиниң әзалири болған яш ижаткарларға яр-йөләк болған барлиқ инсанларға рәхмәт ейтимиз. Вильям МОЛОТОВ, «Варис» әдәбий-иҗадий бирләшмисиниң рәиси.

186 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

03 Наурыз, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы