• «Уйғур авазиниң» сәйилгаһи
• 19 Шілде, 2018

Чәкмән

Уйғурларниң қолһүнәрвәнчилик мәдәнийитиниң җәвһири болған чәкмән нәпис, чирайлиқ һәм чидамлиқлиғи билән мәшһур. У қой вә төгә жуңлиридин йәрлик усулда тоқулидиған рәхттур.Чәкмән тоқуш җәрияни мундақ: авал жуң пакиз тазилинип, яғач челәк (жип егиридиған сайман) билән инчикә егирилиду. Жип тәйяр болғандин кейин арилиғи 20 метрдәк қеқилған икки қозуққа йөгилиду. Андин узунлуғи 40 сантиметрлиқ, кәңлиги он сантиметрлиқ тахтай үстидә рәхт тоқулиду. Униң қилич шәкиллик бир тахтай билән тоқулған қисми чиңдилип, нәпис вә сипта һаләткә кәлтүрүлиду. Хәлқимиз чәкмәнни қолһүнәрвәнчилик мәдәнийитимизниң вариси сүпитидә һелиму давамлаштуруп кәлмәктә. Бүгүнки күндиму у өз әһмийитини йоқатмиди. Чәт әлләргә туққан йоқлашқа, сәяһәткә баридиғанлар чәкмәнни есил соға сүпитидә елип маңиду.Мошу йәрдә чәкмәнниң инсан саламәтлиги үчүнму пайдилиқ екәнлигини ейтип өткинимиз тоғра. Мәсилән, төгә жуңидин тоқулған чәкмән ревматизм кесилигә шипа болиду. Тоқумичилиқ санаити зор дәриҗидә тәрәққий әткән бу дәвирдиму төгә жуңида ишләнгән чәкмән өзиниң нәпислиги, иссиқлиғи вә шипалиқ үнүми билән әтиварлиқтур. Тәңритағ уйғурчә тори.