• Дидар ғенимәт
• 19 Шілде, 2018

Синипдашлар учришиши

Яркәнт шәһиридики Х.Һәмраев намидики уйғур оттура мәктиви тәвәдики дәсләпки билим дәргаһлирини бири. Униң яш әвлатқа ишигини ачқиниға бийил 97 жил болиду. Дәсләп башланғуч, андин йәттә жиллиқ һесапланған мәктәп 1954 – 1955- оқуш жилидин башлап он жиллиққа айландурулуп, паалийәт жүргүзүп келиватиду. Он жиллиқ билим алған дәсләпки учумкарлирини, йәни 64 нәпәр жигит вә қизни 1958-жили һаят йолиға атландурди. Улар шагиртларниң карван беши болуп, зиммисигә чүшкән вәзипиләр һөддисидин шәрәплик чиқти.Бир мисал, билим дәргаһи он жиллиқ болуп, шәһәрдики икки қәвәтлик офицерлар өйигә көчүп кәлгәндә, уни мәктәп сияқиға кәлтүрүш оңай болмиди. Жуқарқи синипларда оқуватқан жигитләр пушқақ түрүп лай етип, кесәк қуйди, қизлар назук қоллириға һандуга тутуп сугакчилиқ қилди. Ана мәктәп ишқи учумкарларға әйнә шундақ күч-қувәт, илһам ата қилип, улар мәктивидә өчмәс из қалдуруп, йәнә оқуш истигидә һәр ян кәтти. Көпчилиги алий вә мәхсус билим дәргаһлириға чүшүп, мутәхәссислик алди, бәзилири жутида қелип,әмгәккә арилашти. Жиллар шундақ сезилмәй өтүвәрди. Дәсләпки шагиртларниң мәктәп босуғисини атлиғиниғиму бийил 60 жил болди. Улар үчүн бу қетимки учришиш хелила қийинға чүшүп, вақтиму созулди. Чүнки бириниң тави йоқ болса, бири матәмдә, йәнә бири жирақта, әйтәвир, дәрди-әһвалини ейтқанлар хелә болди. Буниң өзи қерилиқниң ишариси болса керәк дәп ойлаймән. Чүнки дәсләпки шагиртларниң алди һазир һаятиниң 80- даваниға қәдәм басти. Мошу мәнзилгә йәткичә 37 нәпәр дост-синипдаш аләмдин өтүп кетипту. Бүгүнки аримизда бар синипдашларниң көпчилиги Яркәнт тәвәсидә вә Алмута шәһиридә истиқамәт қиливатиду. Уларниң арисидин Айим Кәримова, Һәҗәрбүви Подчимирова, Алим Һезбақиев, Аблеким Искәндәровлар мәктәпни пүтәргәнлигиниң 60 жиллиғини нишанлап өтүш тәшәббусини көтәргән. Нәтиҗисидә улар хасийәтлик җай – Яркәнт мечити алдида жиғилип, зияпәтни Ават йезисидики йени ресторанда өткүзүшни қарар қилиду. 25-июнь күни бу йәргә жигирмә синипдаш топланди. Жиғилғанлар бир аз муңдашқандин кейин һашамәтлик бена – мечитқа қәдәм тәшрип қилди. Уларни хуш қарши алған “Яркәнт мечити” тәсвирий-бәдиий мирасгаһиниң мудири Абдумурат Раев бир әсирдин ошуқ вақит қәд көтирип турған бенаниң тарихи тоғрилиқ қизиқ вә тәсирлик сөзләп бәрди. Шу йәрдин синипдашлар өткән оқуш жили икки қәвәтлик заманивий бенаға көчүп киргән ана мәктивигә кәлди. Униң иллиқ вә гөзәл мәнзиригә беқип, тәсиратларға чөмди, хатирә сүрәткә чүшти... Андин Ават йезисидики “Ниагара” ресторанида дидар ғенимәт дәмлирини давамлаштурди. Мол дәстихан әтрапида новәтлишип сөзгә чиқип, сирлирини төкти. Дәсләп сөз алған Аблеким мәрһум синипдашлар роһиға атап қуръан оқуди, андин шәхсий архивида сақланған Панфилов наһийәлик “Йеңилиқ авази” гезитиниң 1978-жили 25-майда чиққан санини көрситип, униңда буниңдин қириқ жил илгири синипдашларниң дәсләпки 20 жиллиқ учришиши тоғрилиқ йезилған мақалини оқуп бәрди. Сөз-хатириләр давамлашти. Һәвәскар шаирә Ипархан Нәзәрова мәктиви вә синипдашлири тоғрилиқ язған шеирини оқуди. Нурбан Кулиева “Әҗәм наваси”, Алим Һезбақиев “Һәйран болма” нахшилирини бабиға кәлтүрүп ейтип, достлар қәлбини һаяҗанлиққа бөлиди. Тәвәгә тонулған сәнъәткарлар Мәхсүм Әзизов, Қурванҗан Һәмраев, Рәхмитулла Савутовлар иҗра қилған дилраба саз-нахшилар синипдашларға хуш кәйпият ата қилип, мәйрәмлик кәйпиятини техиму көтәрди. Ахирида синипдашлар йәнә бәш жилдин кейин учришишни үмүт қилип, бир-бири билән сәмимий хошлашти. Абдукерим ТУДИЯРОВ.