• Дидар ғенимәт
• 02 Тамыз, 2018

Аридин йерим әсир өтсиму...

Атәш жүрәк шаиримиз Лутпулла Мутәллип “Вақит алдираңғу, күтүп турмайду... ” , дәп язғинидәк, бизниң “алтун уга” – ана мәктивимизни тамамлап,чоң һаят қойниға учум болғинимизғиму мана көзни ечип-жумғичә 50 жил өтүп кетипту...Биз Уйғур наһийәсиниң Ақтам оттура мәктивини 1968-жили бари-йоқи 11 оқуғучи – 6 жигит, 5 қиз тамамлидуқ. Бу қетимқи учришишимиз бизниң үчинчи новәтлик баш қошушимиз болди. Буниңғичә 20 вә 40 жиллиқ учришишларни ана жутимизда өткүзгән едуқ. Бу мәртә Алмутида учраштуқ. Әң авал дуниядин өткән устаз вә синипдашлиримизни хатириләп, роһиға дуа-тилавәт қилдуқ, андин саламәтлиги түпәйли учришишқа келәлмигән достларни йоқлап, көңлини алдуқ... Һазир барлиғимиз нәврә, бәзилиримиз һәтта чәврә сөйгән бова-момилар болсақму, беғубар балилиғимизни әсләп, һәммимизниң көңли яйрап, хошаллиғимизда чәк болмиди. Барлиғимиз әшу бир гөзәл чағларға қайтқандәк болдуқ. Һәрбиримизниң аилә вә иш-тирикчилигимиздики йеңилиқларни сораштуруп, сеғиниш отлирини басқичә, дидар ғенимәт дәмләрниң өтүп кәткининиму сәзмәй қалдуқ.Әслидә синипдаш-савақдашлар учришишиниң әһмийәт-маһийитиму шуниңда болса керәк. Ана мәктәпни тамамлиған биз бирәр мутәхәссислик егиләш үчүн Алмута,Ташкәнт шәһәрлиригә атландуқ. Һәммимиз өзимиз таллавалған кәспимизниң җапасини тартип, һалавитини көрүп, әл-жут тәрәққиятиға бир кишилик һәссә қоштуқ. Бизниң һаяттин өз орнумизни тепишимизға тоғра йол көрсәткән, сүпәтлик билим, аңлиқ тәрбийә бәргән муәллим-устазлиримизни дайим чоңқур һөрмәт илкидә әскә елип, яд етимиз. Бизниң башланғучтики тунҗа муәллимимиз – Дүрнисахан һәдә Һезмахунова (Исмайилова) болди. Дәсләпки муәллимниң һәрбир оқуғучиниң һаятидики орни вә ролиниң нәқәдәр муһимлиғи ейтмисақму чүшинишлик... Әнди жуқарқи синипларда билим бәргән муәллимлиримиз өзлириниң шәхсий мәдәнийити, билимликлиги вә тәләпчанлиғи билән алаһидә пәриқлинәтти. Улардики меһриванлиқ, кәспигә болған садақәт вә мәсъулийәтчанлиқ, шагиртлириға дегән көйүнүш вә тәләпчанлиқ алаһидә байқилатти. Болупму адаләтлик вә һәққанийлиқ, адимийлик хисләтләр шуларниң әҗри түпәйли бизниң жумран қәлбимизгә, гоя ташқа бесилған тамғидәк, мәңгүгә сиңип кәткәндәк. Бу учришишимизда биз Алмутиниң мәнзирилик җайлирини зиярәт қилдуқ, хатирә рәсимләргә чүштуқ, кәлгүси иш-реҗилиримиз, арзулиримиз билән бөлүштуқ... Шуларниң ичидики әң муһими, бизчә, әндиликтә имканийитимизниң баричә нәврә-чәврилиримизни ана тилимизда оқутайли, миллий қәдриятлиримизни сақлап, риваҗландурушқа бир кишилик үлүшимизни қошайли, дегән нийәтлиримизни билдүрүп, хошлаштуқ. Д.НАДИРОВА, Х. СӘЙДУЛЛАЕВА.