• Әхбаратлар еқими
• 02 Тамыз, 2018

Мәҗлис депутати Алмута вилайитиниң үч наһийәсидә болди

Мәшүр САСИҚОВ, «Уйғур авази» Өткән һәптидә Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси, җумһурийәтлик Уйғур этномәдәнийәт мәркизиниң рәиси Шаһимәрдан Нурумов Алмута вилайитиниң Талғир, Уйғур вә Панфилов наһийәлиридә болуп, жут-җамаәтчилик билән учрашти.Наһийәгә қәдәм тәшрип қилған Шаһимәрдан Үсәйин оғли көпчиликкә елимиз Президенти Нурсултан Назарбаевниң «Келәчәккә нишан:мәнивий йеңилиниш» мақалисида алға сүрүлгән мәсилиләр һәққидә әтраплиқ чүшәнчә бәргәч, турмуш-тирикчилигимиздә йүз берип туридиған айрим аддий камчилиқларни сәясәткә айландурмаслиқниң әвзәллигигә алаһидә тохталди. Натиқ өз сөзидә Қазақстанниң байлиғи йәр-асти яки униң үстидики байлиқлар әмәс, бәлки дана Президентимизниң жүргүзүватқан ички һәм ташқи сәясити түпәйли қолға кәлтүрүлгән бирлигимиз билән өмлүгимиз екәнлигини атап өтти. – Силәргә мәлум болғинидәк, Президентимизниң һәрбир қәдими аһалиниң турмуш шараитини яхшилашқа қаритилған – деди Шаһимәрдан Нурумов. – Мәсилән, уларниң арисидики «Президентниң бәш иҗтимаий тәшәббусини» алайли. Униңда көрситилгән йөнилишләр хәлиқниң һәрхил қатлиминиң һал-оқитини, мәйли у студент болсун яки әмгәк қиливатқан ишчи болсун, уларниң һәммисигә бирқатар йеникчиликләрни бериду, һәрбир қазақстанлиқниң оқуп-билим елишиға вә шундақла өзи халиған тиҗарәт билән шуғуллинишиға имканийәт яритиду. Әнди хәлиқниң ғемини қилидиған программиларни әмәлгә ашурушқа бөлүнүватқан мәбләғни көз алдимизға кәлтүридиған болсақ, бүгүнкидәк ихтисадий боһран пәйтидә һеч қандақ дөләт ундақ тавакәлчиликкә бармайдиғанлиғи ениқ. Һә, биздә миллиардлиған тәңгә хәшлиниватиду. Бу болсиму, йәнә тәкрарлаймәнки, Президентимизниң хәлқини чин сөйидиғанлиғиниң вә дайим әл билән биллә екәнлигиниң ипадисидур. Пурсәттин пайдилинип, шуни ишәшлик ейталаймәнки, мән җумһурийәтлик Уйғур этномәдәнийәт мәркизиниң рәиси сүпитидә қазақстанлиқ уйғурларниң Президентимиз жүргүзүватқан сәясәтни келәчәктиму қоллап-қувәтләйдиғанлиғиға ишәнчим камил. Буниңға биз, уйғурларниң, қериндаш қазақ хәлқи билән бир күндә дегидәк кириллицидин латин алфавитиға өтүш мәсилисини һәл қилғанлиғимиз яхши дәлилдур. Учришиш давамида жиғилған көпчилик депутатқа өзлирини ойландуруп жүргән соаллирини қойди. Буниңдин ташқири, депутат билән биллә болған Талғир наһийәсиниң вә Алатав йеза округиниң һакимлири Рыскелды Сәтбаев билән Қуатбек Смағуловқиму бирқатар соаллар келип чүшти. Улар асасән ичидиған су вә наһийәгә әндила тартиливатқан газ трубилири тоғрисида болуп, бу мәсилә бойичә аһали бираз «рәнҗишлириниму» очуқ изһар қилди. Мәсилән, Қизил Ғәйрәт йезисиниң турғуни Мерванәм Савутова жутдашлири намидин ичидиған суниң баһасиниң һәддидин ташқири қиммәтлигини ейтиведи, жутдашлири уни алқишлар билән қоллап-қувәтлиди. Учришишта мошундақ көпчиликни ойландуруп жүргән мәсилиләрниң бири, Гүлдала йезисидики Мәдәнийәт өйи билән балилар бағчиси екән. Турғунларниң ейтишичә, бу беналар шәхсийләрниң қолиға өтүп кәткәнликтин уларни аһали өзлиригә қайтурувелиш мәхситидә бармиған йери қалмиған охшайду. Көпчилик Шаһимәрдан Үсәйин оғлини мошу мәсилидә депутат сүпитидә қол учини сунушни илтимас қилған һалда, у беналарниң бүгүнки күндә һечкимгә керәксиз турғанлиғини йәткүзди. Шундақла бу күни Қизил Ғәйрәт йезисиниң тәрәққиятиға салмақлиқ һәссисини қошқан шәхсләрниң бири – Музәппәр Һезбақиевниң қизи Реһимәм Һезбақиева атисиниң намида мошу жутта бир кочиниң атилиши тоғрилиқ пикирини оттуриға салди. Учришиштин кейин наһийә һакими Рыскелды Ахметқалиулы Шаһимәрдан Нурумовқа Талғир шәһириниң бирқатар иншаәтлирини тонуштурди. Атап ейтсақ, шуларниң бири мошу жилниң ахирида ишқа қошулуш алдида турған Талғир су электростанцияси. У ишқа қошулғандин кейин Талғир шәһириниң ичидиған су вә электрэнергияси тапчиллиғини йоқитиду. *** Сабирәм ӘНВӘРОВА, «Уйғур авази» Қазақстан Җумһурийити Парламенти Мәҗлисиниң депутати Шаһимәрдан Нурумов Кәтмән йезисида болуп, җамаәтчилик вәкиллири билән учрашти. Уйғур наһийәси һакиминиң орунбасари Дәулетжан Деменбаев мәзкүр баш қошушниң һөрмәтлик меһмини билән тонуштуруп, дәсләпки сөзни Шаһимәрдан Һүсәйин оғлиға бәрди. У өз сөзини техи йеқиндила нишанланған Астанамизниң 20 жиллиғидин башлап, пайтәхтимизниң йәткән утуқлирини пәхирлиниш билән тилға алди. Шундақла Қазақстан хәлқи Ассамблеяси һәққидә тохтилип, униң елимиздики хәлиқләр достлуғини мустәһкәмләшкә қошуватқан үлүши тоғрилиқ ейтип өтти вә Мәҗлистә атқурулған ишлар һәққидә әхбарат берип, бир жилниң ичидә 128 қанун лайиһәсиниң қарилип, униң атмиш бәши қобул қилинғанлиғини йәткүзди. Шаһимәрдан Нурумов Президентимизниң «Бәш иҗтимаий тәшәббусидики» мәсилиләргә айрим-айрим тохтилип, тәпсилий чүшәнчә бәрди. Йәр мәйдани бойичә бәш Францияни өз ичигә алидиған Қазақ даласиниң әң чоң байлиғи, нефть билән газ әмәс, бәлки бирлигимиз, өмлүгимиз екәнлигини тилға алди. Депутатниң сөзидин кейин новәт турғунларға берилди. Дардамту йезилиқ ақсақаллар кеңишиниң рәиси Қызыр Сатымқулов Дөләт рәһбириниң тапшурмисиға бенаән, йезида кооператив қурулған билән, су тапчиллиғидин иш маңмайватқанлиғини ейтип, депутатқа «Дардамту йезисиға ихчам тосма ясалса...» дегән тәклипни бәрди. Кәтмән йезисиниң мөтивәри Каммунар Шәхиев көмүр мәсилисини қозғап, һазирқи вақитта жутқа тоннаси 23 миңдин келидиған көмүрниң баһаси наһайити қиммәт екәнлигини ейтип, «йезиларға қачан газ келиду?» дегән соални қойди. Газ мәсилиси һәққидә Дәулетжан Деменбаев сөз елип, алдики вақитта Чонҗа йезиси газ билән тәминләнсә, кейин новәт-новәт билән барлиқ йезиларға газ трубилири тартилидиғанлиғини ейтти. Учришишта Дәулетжан Деменбаев бүгүнки күндә наһийәдики муһим мәсилиләрниң бири – уйғур мәктәплиригә йеңи программа бойичә дәрисликләрниң йетишмәслиги екәнлигини ейтип, депутаттин мүмкин болса мошу мәсилини һәл қилишқа күч чиқиришини илтимас қилди. *** Гөһәрбүви ИСМАЙИЛҖАНОВА, «Уйғур авази» Мәҗлис депутати Шаһимәрдан Нурумовниң сәпири Яркәнт тәвәсидә давамлашти. Уни Көктал йезисидики Мәдәнийәт өйидә Панфилов наһийәсиниң һакими Темирлан Бектасов билән униң орунбасари Шөһрәт Қурбанов күтүвалди. Депутат билән учришишқа Көктал йеза округи җамаәтчилигиниң вәкиллири, округ территориясидики Ақжазық, Көктал вә Абай намидики мәктәпләрниң мудирлири, муәллимләр коллективлири билән медицина хадимлири, яшлар қатнашти . Мән депутат болуп сайланғандин бери елимизниң барлиқ вилайәтлири билән шәһәр-йезилирини арилап, сайлиғучилар билән учришип, уларниң қолға кәлтүрүватқан утуқ-муваппәқийәтлири, муң –муһтаҗи билән йеқиндин тонушушқа муйәссәр болуватимән,– дәп сөзини башлиди депутат.– Бу қетим бир ай мабайнида Қазақстанниң барлиқ вилайәтлиридә сайлиғучилар билән учраштим. Елимизниң қайси шәһиригә, авул-йезисиға бармай, қазақстанлиқларниң һәммиси күч-қувитини Мустәқил елимизниң тәрәққияти үчүн сәрип қиливатқанлиғиға, миллитигә, диниға, етиқатиға бағлиқ һеч қандақ камситиш әһваллириға дуч кәлмәй, инақ яшап әмгәк қиливатқанлиғиниң гувачиси болуватимән. Бу бизниң әң чоң байлиғимиз. Мошундақ достлуқниң уютқуси Дөләт рәһбири Нурсултан Назарбаев екәнлигини тәкитлишимиз керәк. Җүмлидин, Панфилов наһийәсидики 40тин ошуқ милләтниң өзара достлуғини, бир мәхсәттә әмгәк қиливатқанлиғини, инақлиғини алаһидә тәкитлигүм келиду. Учришиш давамида Панфилов наһийәсиниң Пәхрий граждини Әдепхан Жақибаев, әмгәк ветеранлири Нәзәрғожа Әхмәтов, Көктал йезисиниң баш жигитбеши Рәхимжан Яқупов вә башқилар сөзгә чиқип, өзлирини ойландуруп келиватқан мәсилиләрни оттуриға қойди вә депутат бу мәсилиләрниң һәл қилиниши үчүн йәрлик органлар билән һәмкарлиқта иш елип баридиғанлиғини қәйт қилди. Панфилов наһийәси.