• Әхбаратлар еқими
• 08 Тамыз, 2018

Алмута – Талғир йоли кәңәйтилиду

Мәлумки, Алмута-Талғир йолида күнигә 20 миң машина маңиду. Бу шәһәр әтрапидики әң көп машина қатнайдиған йол болуп һесаплиниду.– Алмута – Талғир йолиниң селинғиниға 50 жилдин ешипту,– деди аһали билән өткән учришишта Қазақстан Җумһурийити Парламенти Мәҗлисиниң депутати Омархан Оксикбаев. – Йол тар болғанлиқтин йол-транспорт һалакәтлириму көп. Шәһәрдин Талғирғичә болған йол бойида йәттә йеза бар, демәк, йәттә мәктәп моҗут. Һазирқи Туздыбастав йезисидин Талғирғичә болған 12,5 километрлиқ икки қатарлиқ йол заман тәливигә тоғра кәлмәйду һәм хәлиқниң еһтияҗини қанаәтләндүрмәйватиду. Шуңлашқа мошу йолниң өткүзүш иқтидарини ашуруш мәсилиси туриду. Мутәхәссисләр һазир барлиқ һесаплаш ишлирини жүргүзүп, лайиһәни тәйярлаватиду. Әнди «Қазавтожол» миллий компанияси Алмута вилайәтлик шөбиси мудириниң орубасари Қуаныш Искендировниң ейтишичә, жилниң ахириғичә тендер елан қилинип, ғалиплар ениқлиниду. Қурулуш ишлирини келәр жили башлап, түгитиш мәхсәт қилинмақта. У шундақла йолни җөндәш ишлири давамида тротуарлар, пиядә маңғучилар өткүллири, бекәтләр рәткә кәлтүрүлидиғанлиғини алаһидә тәкитлиди. Муһими, йол төрт қатарлиқ болиду, униң өткүзүш иқтидари кәңийиду, йол бойидики дәл-дәрәқләр кесилмәйду.