• Акция
• 08 Тамыз, 2018

Медиацияниң роли алаһидә

Мәшүр САСИҚОВ, «Уйғур авази» Өткән пәйшәнбә күни Алмута шәһиридики Достлуқ өйидә Алмута шәһәрлик Қазақстан хәлқи Ассамблеясиниң, достлуқ өйлириниң паалийитини тәминләш хизмитиниң, шәһәрлик медиация кабинетиниң уюштуруши билән Медиация күнигә беғишланған акция болуп өтти. Униңға актив паалийити билән көзгә чүшкән җумһурийәтлик, шәһәрлик этномәдәнийәт мәркәзлириниң рәһбәрлири, шәһәрлик вә наһийәлик сотлар билән кәспий иттипақлардин вәкилләр, прокуратура органлириниң хадимлири вә кәспий һәм ишқиваз медиаторлар қатнашти.Мәрасимниң ечилишида униң модератори – Д.Қонаев намидики Евраазия әдлийә академиясидики ҚХА кафедрисиниң йетәкчиси Болысбек Батталханов көпчиликни күн тәртивидики мәсилиләр билән тонуштурғач, бүгүнки медиацияниң җәмийитимиздики ролиға тохтилип өтти. Шундақла у ушбу чарә-тәдбир давамида медиация һәққидә әтраплиқ сөз болидиғанлиғини йәткүзүп, айрим гражданларға кәспий мутәхәссисләр ярдәмгә келидиғанлиғиниму ейтти. Андин медиация тоғрисида пикир ейтқан Алмута шәһәрлик ҚХА рәисиниң орунбасари Казбек Мамсуров жумһурийитимиздә истиқамәт қиливатқан милләтләр арисидики өзара достлуқни сақлинишиға медиацияниң йәткүзүватқан роли алаһидә екәнлигини тәкитләп, көпмилләтлик Қазақстанда медиация арқилиқ йешилидиған мәсилиләр пат-пат йүз берип туридиғанлиғини вә бәзи чағларда тиймаққа турмайдиған ишларни сотқа йәткүзмәй өзара келишимгә келиш һәм течлиқ йол билән биртәрәп қилишниң муһимлиғини алаһидә қәйт қилди. Натиқ бүгүнки чарә-тәдбирниң Достлуқ өйидә өткүзүлүватқанлиғиму әйнә шу милләтләр арисидики разимәнликни техиму риваҗландурушқа, жуқурида ейтилған күндилик турмушта учришидиған келишмәсликләрниң алдини елишқа қаритилғанлиғини қошумчә қилди. Медиацияни аһали арисида тәрғибат қилишқа қаритилған акция давамида сөзгә чиққан шәхсләр, җүмлидин «Ахыска» җумһурийәтлик Түрк этномәдәнийәт мәркизи рәисиниң орунбасари Шахисмаил Асиев, Медев наһийәсиниң судьяси Камчат Умбеталиева, кәспий медиатор Сегизбай Ержигит вә журналистларға медиация бойичә маһарәт-дәрис бәргүчи Ирина Родионова мәйли у җинаий болсун яки мәмурий һоқуққа хилаплиқ қилинған болсун, уларни сотқа йәткүзмәй, икки тәрәпни яхши қилип қоюшниң әң яхши амили – медиация екәнлигини тәкитләп, өзлириниң тәҗрибисидин бирмунчә мисаллар арқилиқ көпчиликкә чүшәнчә бәрди. Болупму бу күни натиқлардин рус мәдәнийәт мәркизиниң рәиси Всеволод Лукашев билән җумһурийәтлик Уйғур этномәдәнийәт мәркизи рәисиниң орунбасари Шәмшиқәмәр Абдурахмановниң нутқи қатнашқучиларда чоңқур тәсират қалдурди. Мәсилән, дәсләпки натиқ медиацияниң пайдилиқ тәрәплирини аддий тил вә ениқ мисаллар билән чүшәндүрсә, иккинчиси уйғур хәлқиниң өзлири яшаватқан тәвәдики чоң-кичик мәсилиләрни алди билән жутниң жигитбашлири яки ақсақаллириниң арилишиши билән биртәрәп қилинидиғанлиғиниң қедимдин қелиплашқан әнъәнә екәнлиги медиацияниң бир түригә ятидиғанлиғини ейтип өтти. Мәрасим ахирида медиаторлар билән һөкүмәт органлирини хадимлири ярдәм сорап, мураҗиәт қилған бирқатар гражданларға пайдилиқ мәслиһәтлирини бәрди.