• Әхбаратлар еқими
• 08 Тамыз, 2018

Саһани тәрәққий әткүзүшкә мәнпийәтдар

Йолдаш МОЛОТОВ, «Уйғур авази» Түнүгүн Астанадики «Hіlton Astana» меһманханисида Түрк кеңишигә әза дөләтләрниң туризм бойичә министрлириниң төртинчи учришиши өтти. Бу учришишни Қазақстан Җумһурийити Мәдәнийәт вә спорт министрлиги, Түрк кеңиши кативати, «KazakhTourіzm» миллий компанияси вә Ташқи ишлар министрлиги уюштурди.Учришишқа Түрк кеңишигә әза дөләтләрниң, йәни, Қазақстан, Түркия, Қирғизстан вә Әзәрбәйҗанниң туризм министрликлириниң рәһбәрлири, Түрк кеңишиниң вәкиллири, түркийтиллиқ дөләтләрниң мәнпийәтдар туроператорлириниң вәкиллири қатнашти. Шундақла Өзбәкстан, Түркмәнстанниң туристик комитетлириниң рәислири вә Хитай Хәлиқ Җумһурийитиниң Қазақстандики пәвқулладә вә вакаләтлик әлчиси һөрмәтлик меһманлар сүпитидә иштирак қилди. Учришишни Қазақстан Җумһурийитиниң Мәдәнийәт вә спорт министри Арыстанбек Мухамедиулы киришмә сөз билән ачти. Һәммимизгә мәлумки, ахирқи он жилда туризм дуния ихтисадида сүръәтлик тәрәққий етиватқан саһаларниң бири, — деди министр. — Туризм саһасидики мәбләғ нефть экспорти, озуқ-түлүк содиси, автомобиль ясаш саһалиридики мәбләғқә йәтти. 2017-жили хәлиқара туристларниң сани 1,3 миллиардтин ашти. Һазир Хитай вә Һиндстанниң туризм мәһсулатлириға еһтияҗи өсмәктә. Мошуниң һәммиси дуниявий туризм индустуриясиниң, шуниң ичидә Қазақстанда туризмниң тәрәққияти үчүн кәң имканийәтләрни яритиду. Шуңлашқиму Дөләт рәһбири бу саһаға алаһидә көңүл бөлмәктә. Президентниң тапшурмиси бойичә елимизда туризмни тәрәққий әткүзүшниң дөләт программиси тәйярлиниватиду. 2025-жилғичә униң ички умумий мәһсулат қурулумидики үлүшини 1 пайиздин 8 пайизға йәткүзүш вәзиписи туриду. Қазақстан Улуқ Ипәк йолиниң аҗралмас бир қисми болған. Шуңлашқа 2015-жили Бодрумда өткән Түрк кеңишиниң саммитида дөләт рәһбәрлири Қазақстанни «Түрк кеңиши — заманивий Ипәк йоли» бирләшкән туристик мәһсулатниң уйғунлаштурғучиси қилип бәлгүлиди. Шу сәвәптин, бийил 3-сентябрь күни Қирғизстанда өтидиған Түрк кеңишигә әза дөләтләр рәһбәрлириниң саммитиға туризм бойичә сүпәтлик қарарларни тәйярлишимиз лазим. Учришиш давамида Түрк кеңишигә әза дөләтләрниң һәмкарлиғида «TRT Avaz» түрк телеканали тәрипидин чүшүрүлгән һөҗҗәтлик фильм көрситилди. Мәзкүр учришишниң йәкүнлири бойичә лайиһәләр тәйярлинип, 3-сентябрь күни Чолпон-Атада (Қирғизстан) өтидиған Түрк кеңишигә әза дөләт рәһбәрлириниң саммитида муһакимигә қоюшқа тәвсийә қилиш қарари қобул қилинди.