• Дидар ғенимәт
  • 15 Тамыз, 2018

Әстә қалған шу күнләр

Гәһәрбүви ИСМАЙИЛҖАНОВА, “Уйғур авази” Пәнҗим йезисидики Абдулла Розибақиев намидики мәктәп Панфилов наһийәсидики дәсләпки билим дәргаһлириниң бири болуп һесаплиниду. Дәсләп башланғуч, андин йәттә, кейинирәк сәккиз жиллиқ вә ахирида оттура мәктәп болған мәзкүр билим дәргаһи тохсән жиллиқ тарихқа егә.Өткән вақит мабайнида мәзкүр мәктәптин миңлиған шагиртлар учум болуп, җәмийәттин өз орнини тапти. Шагиртлар демәкчи, улар ана мәктиви билән устазлирини унтумай, һалидин хәвәр елип, өзлириниң қол йәткүзгән утуқ-муваппәқийәтлиридин һесават беришни әнъәнигә айландурғанлиғиниң гувачиси болуватимиз. Әйнә шундақ тәрбийәвий әһмийити чоң чарә-тәдбир новәттики қетим уюштурулди, йәни 1968-жили оттура мәктәпни тамамлиған сабиқ синипдашлар бийил ана мәктивидә дидарлашти. Тәкитләш керәкки, 1968 – 1969-оқуш жили уйғур синипидин 33 нәпәр қиз-жигит қоллириға камаләтлик шаһадәтнамә елип, чоң һаятқа қәдәм басқан еди. Улар 50 жилдин кейин чечи ақарған, үзлиригә қоруқ басқан бова-момилар болуп қапту. Бир-бири билән қучақ йейип, қериндашларчә дидарлашқан савақдашлар ана мәктивидики А.Розибақиевниң бюстиға гүлчәмбәрләрни қойди. Учришиш Пәнҗим йезисидики йеңидин пайдилинишқа берилгән «Әмирхан» ресторанида давамлашти. Дәсләп учришишниң тәшәббускарлири Нурәхмәт Иминов билән Әршидин Қутәмов вә Иззәтқиз Әзизова сөз елип, бүгүнки учришишқа йәттә синипдиши қатнишалмиғанлиғини ечиниш билән тәкитлиди. Яқупҗан Тейипов, Сулайман Мәсимов, Турсунай Азнахунова, Һүсәнҗан Исмайилҗанов, Маһмутҗан Босақов, Муңдаш Йолдашев вә Адилҗан Бешировни қарам әҗәл бевақит елип кәткән еди. Учришишқа уларниң өмүрлүк җүптилири тәклип қилинипту. Мошу йәрдә уларниң арисидин һәрхил кәсип егилири йетилип чиқип, наһийәниң ихтисади билән мәдәнийитиниң риваҗлинишиға биркишилик һәссисини қошқан зиялиларниң бар екәнлигиниму тәкитләш артуқ болмиса керәк. Абдурахман Әсқәров, Иззәтқиз Әзизова, Зәйтүнәм Баратова, Сепийәм Мухпулова, Разийәм Палтиева, Нурәхмәт Иминов, Аблимит Маһмутов, Мәһәммәтҗан Әмәтов, Һакимҗан Турсунов, Әршидин Қутәмов әйнә шулар җүмлисидиндур. Учришишта шох нахша-саз, уссуллар тәсири астида әллик жиллиқ сеғиниш-кинәш сезимлири билән суғирилған жүрәк қетидики сөзләр ейтилди. Алмута, Яркәнт тәвәсидин йетип кәлгән савақдашлар бир-биригә вә дидар ғенимәт дәмләрни уюштурушниң тәшәббускарлириға сәмимий тиләклирини изһар қилишти. Шундақ қилип, 50 жиллиқ учришишниң сәвәпкарлири йәнә бәш жилдин кейин учришишқичә аман болайли, дәп бир-бирини қиймай хошлашти. Панфилов наһийәси.

234 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы