• Әхбаратлар еқими
• 22 Тамыз, 2018

Уйғур театри Өзбәкстанда болди

Кейинки вақитларда Қазақстан вә Өзбәкстан оттурисидики мәдәний алақиләр йеңи басқучқа көтирилишкә башлиди. Икки дөләт президентлири Нурсултан Назарбаев вә Шавкәт Мирзиёевниң тәшәббуси билән һәрхил министрликләр, идариләр, мәһкимиләр арисида йеңи шәртнамиләр түзүлүп, икки оттуридики сәясий, ихтисадий алақилар техиму мустәһкәмлинишкә қарап бәт алди. Шу җүмлидин 2018-жилниң Өзбәкстанниң Қазақстандики жили, әнди 2019-жилниң Қазақстанниң Өзбәкстандики жили дәп елан қилиниши уларниң мәдәний алақилириниң риваҗлинишиға йеңи мүмкинчиликләрни бәрмәктә.Шу мунасивәт билән Қуддус Ғоҗамияров намидики дөләт академиялик Уйғур музыкилиқ-комедия театриниң артистлири 16 – 19-август күнлири Өзбәкстан пайтәхти Ташкәнт шәһиридә гастрольда болуп қайтти. Қазақстан Һөкүмити һәм Мәдәнийәт вә спорт министрлигиниң қоллап-қувәтлиши билән әмәлгә ашқан мәзкүр сәпәр җәриянида Уйғур театри артистлири төрт күн җәриянида тамашибинларға арамбәхш дәмләрни беғишлиди. Ташкәнт шәһиридики «Түркстан» концерт залида Өзбәкстанниң хәлиқ артисти Абдрим Әхмәдиниң туғулғининиң 90 жиллиғиға беғишланған концерт программиси, «Тәбәссүм» һәзил-күлкә программиси вә «Нава» уйғур фольклор ансамблиниң программиси көрситилип, өзбәкстанлиқ тамашибинларниң алаһидә алқишиға сазавәр болди. Әнди Муқими намидики Өзбәкстан дөләт музыкилиқ театр бенасида классикилиқ әсәр «Ғерип-Сәнәм» драмиси қоюлди. Тамашибинлар төрт күн мабайнида қазақстанлиқ сәнъәткарларни иллиқ қарши алди. Меһманларни күтүвелиш һәм уларни орунлаштуруш, билет тарқитиш, сәяһәт қилиш вә башқиму чарә-тәдбирләрдә, болупму Өзбәкстан Уйғур этномәдәнийәт мәркизиниң вәкиллири, жут активистлири алаһидә паалийәтчанлиқ көрсәтти. Уйғур театри артистлири Өзбәкстандин келип, бир күн дәм алғандин кейин, хошна мәмликәт – Қирғизстанға йәнә шу программилири билән гастрольлуқ сәпәргә атланди. Улар келәчәктә йәниму башқа мәмликәтләргә берип, уйғур сәнъитини тәшвиқ қилмақчи. Биз, барлиқ тамашибинлар, сәнъәткарлиримизниң өз талантлирини һәр җәһәттин намайиш қилип, техиму жуқури пәллиләргә йетишигә тиләкдашмиз. Рәхмәтҗан ЙҮСҮПОВ.