- Йеңилиқлар
- 07 Қыркүйек, 2012
Грузиядин олҗилиқ қайтти
Йеқинда Грузияниң Анаклия шәһиридә өткән хәлиқара «Golden Snell» музыкилиқ конкурста уйғур қизи Адель Шавдунова биринчи орунни егиләп, сәнъәттики йәнә бир утуғиға қол йәткүзди.
Бәш йешидин тартип Дина Исмайилова рәһбәрлигидики «Тансери» театр-студиясидә сәнъәтниң вокал, актерлуқ маһарәт, хореография түрлири билән шуғуллинип келиватқан талантлиқ қиз чоң-чоң сәһниләргә чиқип, шәһәр, җумһурийәт, хәлиқара дәриҗидә өткүзүлгән нурғунлиған конкурсларда ғалип атилип, муваппәқийәтләргә еришип кәлмәктә. Адель Шавдунова өз вақтида җумһурийитимиздә өткән «Очаровашка», «Фотомодель», «Қазақ әндері» конкурслирида өз һүнирини көрситип, тамашибинларниң алқишиға сазавәр болған еди. Өткән жили болса, Сочида өткән «Кинотаврик» хәлиқара конкурсида вокал номинацияси бойичә үчинчи орунни, хореография бойичә биринчи орунни егилиди.
— Грузиядә өткән конкурсқа Қазақстан, Эстония, Литва, Россия, Грузия, Беларусь Җумһурийәтлиридин кәлгән вәкилләр қатнашти. Мәзкүр конкурс дәсләпки қетим өткүзүлүватқачқа, конкурс қатнашқучилириға қоюлған тәләпләрму наһайити жуқури болди. Шундақ болсиму, Адель өзиниң иҗрачилиқ маһарити билән жюри әзалирини, шундақла аваз беришкә қатнашқан тамашибинларниму қайил қилди. Финалда Беларусьтин кәлгән жигит билән Адельниң топлиған пайлири тәң болуп қалди. Шуниңдин кейин жюри әзалири һәр иккисигә сәһнидила, һеч бир тәйярлиқсиз, җанлиқ авазда нахша ейтиш шәртини қойди. Адель бу синақтинму утуқлуқ өтүп, нәтиҗидә биринчи орунни егилиди. Мошу йәрдә, пурсәттин пайдилинип, Адельниң мәзкүр конкурсқа қатнишишиға мүмкинчилик яритип, маддий-мәнивий ярдәм көрсәткән тиҗарәтчиләр Сәнәм Бешироваға, Ғулам Шамахуновқа, «Инайәт» ассоциациясигә вә «Дәрвишләр» топиға миннәтдарлиғимни изһар қилмақчимән, — дәйду Адельниң аниси Мукарәм Таранова.
Йолдаш МОЛОТОВ.
516 рет
көрсетілді0
пікір
