• Сәнъәт
• 28 Тамыз, 2018

«Миллий колорит» номинациясиниң ғалиби – уйғур жигити

«MUZZONE» телеканили һәр жили елимиздә әң аммибап сәнъәткарларға «Eurasіan Musіc Award» мукапитини тапшуриду. Жилдин-жилға инавити өсүватқан ушбу мукапатқа көплигән сәнъәткарлар егә болди. Шуларниң арисида һәммимизгә яхши тонуш миллитимиз вәкиллиридин «Дәрвишләр» топи билән Дилназ Әхмәдиева бар. Бийил бу мукапатқа тор арқилиқ аваз бериш нәтиҗисидә «Илғар Q – pop артист», «Илғар нахша», «Жил дебюти», «Илғар дуэт», «Илғар әрләр коллективи», «Илғар аяллар коллективи», «Илғар клип», «Илғар нахшичи қиз», «Илғар нахшичи жигит», «Миллий колорит», «Илғар коллектив» номинациялири бойичә бир жил мабайнида йеңи нахша клиплири вә аммибаплиққа егә болған сәнъәткарлар бәйгигә чүшти. Шуларниң қатарида «Миллий колорит» номинациясидә үч уйғур жигити, җүмлидин Рәшит Сабитов — «Будь со мной», Камунар Турсунов — «Ашиқ булбул» вә Молутҗан Тохтахунов – «Дәрдим бедава» нахшилилири билән күч синашти. Бу номинациягә үч уйғур сәнъәткариниң иштрак қилиши, әлвәттә, һәммимизни хошал қилиду. Мәзкүр номинация бойичә талантлиқ нахшичи Молутҗан Тохтахунов Баш мукапатни утувалди. Йеңидин йетилип чиқиватқан бу яш нахшичини чин қәлбимиздин сәмимий тәбрикләп, техиму егиз пәллиләрдин көрүнүшигә тиләкдашлиқ билдүримиз. Молутҗан ТОХТАХУНОВ, Яркәнт гуманитарлиқ-техникилиқ колледжиниң оқутқучиси.