• Йеңилиқлар
• 10 Қыркүйек, 2018

Артуқ төләм қайтурулиду

Насирахун РОЗАХУНОВ, “Уйғур авази” Йеқинда Алмута шәһириниң прокуратуриси аһалини хошал қилидиған икки хәвәрни тарқатти: биринчи, монополистларға баһаларни асассиз көтәргәнлиги үчүн аһалиға 4,7 миллиард тәңгини қайтуруш вәзиписини жүклисә, иккинчиси, жил ахириғичә иссиқлиқ, электр энергияси, су вә канализацияниң баһалири илгәрки петичә сақлиниду, әнди газниң баһаси болса, 4 пайизға төвәнләйду.Алмутида “Нур Отан” партияси сәясий кеңиши шәһәрлик бюросиниң мәҗлисидә шу һәқтә мәлум болди. Униңда Җәнубий пайтәхт һакими Бауыржан Байбек сөзгә чиқип, һазирқи күндә шәһәрниң 1,5 миллион аһалиси йәрлик бюджетниң һесавиға әрзәнлитилгән коммуналлиқ хизмәтләрни еливатқанлиғини тәкитлиди. – Дөләт рәһбири хизмәт баһалириниң асассиз өсүшигә йол қоймаслиқ тапшурмисини бәрди. Бу адәмләрниң һаят дәриҗисигә, тиҗарәтчиләргә, баһаларға, умумән, барлиқ нәрсигә сәлбий тәсирини йәткүзиду. Мошу мәхсәттә шәһәр прокуратуриси монополистлар арисида җиддий комплекслиқ тәкшүрүшләрни жүргүзди. Униң ақивитидә хизмәтләр үчүн баһаларниң асассиз көтирилгән әһваллири ениқланған. Көрүлгән чариләр түпәйли 1,5 миллион шәһәр аһалисиниң һоқуқлири һимайә қилинди. Әнди монополистлар аһалиға 4,7 миллиард тәңгә қайтуруши тегиш. Коммунал хизмәтләрниң баһасини көтириш үчүн һечқандақ асас йоқ. Һәрқандақ қанунға қарши һәрикәтләрниң алди елинидиған болиду. Президентимизниң бизгә қойған ениқ тапшурмиси бар, у сөзсиз орунлиниду, – деди Б.Байбек. Тәбиий монополияләрни тәңшәш вә риқабәтчиликни һимайә қилиш бойичә шәһәрлик департаменти турғунлар октябрь ейида өзлириниң коммунал хизмәтләрни төләш квитанциялиридә төләнгән ахчиниң қайта һесапланғанлиғини көридиғанлиғини вәдә қилди. Алмута шәһири.