• Йеңилиқлар
• 10 Қыркүйек, 2018

Довунда қош хошаллиқ

Сабирәм ӘНВӘРОВА, “Уйғур авази” Бийил Уйғур наһийәсиниң Довун йезисидики оттура мәктәпни җөндәш ишлириға бюджеттин 49 миллион тәңгә бөлүнүп, яз бойи «Азамат құрылыс» ҖЧЙ тәрипидин қурулуш ишлири жүргүзүлгән еди. Биринчи сентябрь күни Довун йезисида қош хошаллиқ тойланди. Чүнки бу күни оқуғучилар толуғи билән мурәккәп җөндәштин өткән билим дәргаһиниң босуғисидин атлиди. Дәсләпки қоңғурақ мәрасимидин кейин довунлуқлар медицинилиқ пунктниң ечилиш тәнтәнисигә қатнашти. Хулләс, бу уларниң көптин күткән армини еди. Мәлумки, Дөләт рәһбириниң «Төртинчи санаәт инқилави шараитидики тәрәққиятниң йеңи имканийәтлири» дәп атилидиған бийилқи Мәктүбидә медицина саһасини риваҗландурушқа алаһидә көңүл бөлүшимиз керәклиги тәкитләнгән. Җүмлидин, Президентимизниң тапшурмиси, «100 мәктәп вә 100 ағриқхана» дөләт программиси асасида қәд көтәргән йеңи мәркәзниң ечилиш мәрасимидики дәсләпки сөз наһийә һакими Шөһрәт Нурахуновқа берилди. Наһийә һакими елимиздә медицина саһасиға көп көңүл бөлүниватқанлиғини ейтип, Довундики медицинилиқ пунктниң шуниң бир мевиси екәнлигини қәйт қилди. Дөләт үчүн әң чоң байлиқ – хәлқи болса, хәлиқниң әң зор байлиғи – саламәтлиги екәнлигини әскәртип, хәлиқ үчүн хизмәт қилидиған йеңи мәһкиминиң кәлгүси ишлириға утуқ тилиди. Мошундақ изгү тиләк ейтқанларниң қатарида наһийәлик мәслиһәтниң кативи Нурәким Есжан, наһийәлик мәркизий ағриқхана мудириниң хәлиққә хизмәт көрситиш бойичә орунбасари Майра Бокеева вә жут ақсақали Сайипҗан Тохтахуновларму болди. Бу күни сәнъәткарлар тәрипидин тәйярланған музыкилиқ номерлар тәнтәнини техиму җанландурди. Йеңи мәркәзниң рәмизлик лентисини қийиш һөрмити наһийә һакими Шөһрәт Нурахунов билән жут мөтивәри Сайипҗан Тохтахуновқа буйриди. Андин көпчилик медицинилиқ пунктни зиярәт қилди.