• Көргәзмә
  • 26 Қыркүйек, 2018

Әсәрлиридә әҗдатлар қияпити гәвдиләнгән

Мәлумки, өткән әсирниң 80 – 90-жиллири Қазақстан уйғур миллий тәсвирий сәнъити өз тәрәққиятиниң гүлләнгән дәврини баштин кәчүрүвататти. Уйғур рәссамлири, башқиму һәр милләт вәкиллири билән бирқатарда, җәмийәтниң иҗтимаий, сәясий, мәдәний мәсилилирини әкис әттүрүш билән биллә миллий әнъәниләрни, тарихни, мәдәнийәтни тәсвирләшкиму алаһидә көңүл бөлди. Қазақстан мустәқиллик алған дәсләпки жиллиридин тартип уйғур рәссамлириниң иҗадийитидә йеңи йөнилишләр, мавзулар, образлар, услублар пәйда болушқа башлиди. Вақит өтүши билән миллий рәссамчилиқ сәнъитимиздә йәнә бир топ йеңи исимлар пәйда болуп, уларму заманға беқип, иҗат қилишқа киришти. Назугум Самиева, Венера Ваҗитова, Мунисәм Гулиева, Камиләм Қурбанова вә башқилар шулар җүмлисидинлур. Ейтмақчи, бүгүн биз әйнә шу яш рәссамларниң сирлиқ, философиялик ой-пикирләргә толуп-ташқан әсәрлиридин һөзүрлиниш пурситигә егә болмақтимиз. Йеқинда Алмута шәһиридики Қазақстан дөләт мәркизий мирасгаһида өткән яш рәссам Гөзәл Закированиң «Мәркизий Азия образлири» дәп аталған шәхсий көргәзмиси шуниң ярқин бир испати болса керәк. 80гә йеқин әсәр қоюлған мәзкүр көргәзминиң ечилиш мәрасимида сөзгә чиққан мирасгаһ мудириниң биринчи орунбасари Бейбитқали Қақабаев, «Керемет Арт» лайиһисиниң асасчиси Жибек Қараманова, «Дуния Арт» заманивий сәнъәт галереясиниң мудири, мәдәнийәтшунаслиқ пәнлириниң намзити Һакимҗан Гулиев вә башқилар Гөзәл Закированиң қәлимигә мәнсүп әсәрләрниң бәдиий қиммитини, рәссам иҗадийитиниң өзгичиликлирини, униң талантини алаһидә тәкитлиди. – Бу мавзуни таллиғанлиғимниң сәвәви шуки, – дәп сөзини башлиди яш рәссам һаяҗанлинип, – Мәркизий Азия җумһурийәтлириниң Ташкәнт, Намангән, Бишкек охшаш көплигән чоң шәһәрлирини, шундақла Шинжаң-Уйғур Автоном Райониниң Қәшқәр, Хотән, Ақсу, Турпан охшаш шәһәрлирини сәяһәт қилип чиқтим. Әлвәттә, бу көргәзмә мениң шу сәяһәттин алған тәсиратлиримниң нәтиҗисидур. Мән Мәркизий Азиядики милләтләрниң мәдәнийитигә бәк қизиқимән. Болупму уйғурларниң мәдәнийити наһайити бай. Мән бүгүн көргәзмигә қойған әмгәклирим арқилиқ уйғурларниң вә пүтүн Мәркизий Азиядики милләтләрниң мәдәнийитини тәсвирләп беришни мәхсәт қилдим. Асасән портрет жанрида ишләнгән бу әсәрләрдә Мәркизий Азиядә яшаватқан һәрхил милләтләрниң һаяти, мәдәнийити әкис етилип, уларда муәллипниң үчжиллиқ сәяһити давамида алған тәсиратлири муҗәссәмләнгән. Гөзәл Закирова 1985-жили Алмута шәһиридә туғулуп, Талғир наһийәсигә қарашлиқ Гүлдала йезисидики оттура мәктәпни ана тилида тамамлиғандин кейин, һазирқи Абай намидики Қазақ миллий педагогикилиқ университетиниң рәссамчилиқ факультетида тәһсил көриду вә шу университетниң магистратурисини тамамлайду. У өзиниң әмгәк паалийитини Алмута мемарчилиқ-қурулуш колледжида сәнъәт тарихи пәни бойичә муәллимликтин башлиған. Рәссамниң әсәрлири Россия, Түркия, Хитай охшаш мәмликәтләрдә өткән хәлиқара көргәзмиләрдә қоюлди. Гөзәл һазир өзиниң билим дәриҗисини техиму мукәммәлләштүрүш билән бирқатарда рәссамчилиқ иҗадийитиниң йеңи сирлирини үгиниш вә егиләш билән җиддий шуғулланмақта. Яш рәссамниң көргәзмиси 4-октябрьғичә давамлишиду. Биз сәнъәт мухлислири намидин Гөзәлгә ақ йол тиләп, техиму егиз чоққилардин көрүнүшигә тиләкдашлиқ билдүримиз. Рәхмәтҗан ЙҮСҮПОВ.

140 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

03 Наурыз, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы