• Әхбаратлар еқими
• 26 Қыркүйек, 2018

Миллий алаһидилик – мода саһасида

Өткән җүмә күни Алмута шәһиридики Қурманғазы намидики Қазақ миллий консерваториясиниң концерт залида Қазақстан хәлқи Ассамблеясиниң уюштуруши билән «Этно fashion» мода фестивали болуп өтти. Униңға елимизниң җай-җайлиридин кәлгән он икки дизайнерниң миллий үлгидә тикилгән кийимлири намайиш қилинди. Мәшүр САСИҚОВ, «Уйғур авази» Дөләт рәһбириниң “Келәчәккә нишан: мәнивий йеңилиниш” мақалиси даирисидә уюштурған фестивальда миллий элементлири билән алаһидә пәриқлинидиған кийим-кечәк үлгилирини елип кәлгән дизайнерларниң мәһсулатлирини Қазақстан хәлқи Ассамблеяси Рәисиниң орунбасари Леонид Прокопенко башлиған барлиқ этномәдәнийәт мәркәзлириниң рәһбәрлири билән бу иҗадий йөнилишниң ишқивазлири тамашә қилди. Фестивальни тонулған композитор Марат Омаров «Қыз сәні» намлиқ нахшиси билән ечип, ҚХА тәрипидин яритилған бу мүмкинчиликләр нәтиҗисидә пәқәт кәспий дизайнерларла әмәс, бәлки бу саһада әндила қәдәм бесиватқанларму өзлириниң әмгәклирини көпчиликкә тонуштуруш имканийитигә егә болуватқанлиғини тилға алди. Тәкитләш лазимки, консерватория профессориниң иҗрасидики нахша давамида барлиқ этнослар вәкиллири миллий кийимлиридә чиқти. Рәңму-рәң вә чирайлиқ өзгичә миллий алаһидиликләргә егә кийим-кечәк үлгилири намайиш қилинған фестиваль қатнашқучилириму яш җәһәттин һәм кәспий дәриҗисиниң һәрхил болушиға қаримай, уларниң иҗадийитиниң өзигә хас услуб яки пәрқи бар екәнлиги бирдин байқилиду. Заманивий адәмләрниң еһтияҗи етиварға елинған һалда тикилгән айрим дизайнерларниң мәһсулатлирини тамашибинлар гүлдүрлигән алқишлар билән қарши алди. Әнди уларниң арисида һәтта он яшлиқ вә саламәтлигиниң яхши әмәслигидин, дохтурларниң алаһидә тизимида туридиған дизайнерларниң әмгәклири намайиш қилинғанда, уларға апирин ейтқучилар көп болди. Мәсилән, ақтөбилик дизайнер Гүлим Амангелди тоғрилиқ шундақ дейишимиз мүмкин. Буниңдин ташқири, балилиқ чағлиридин рәсим сизишқа иштияқ бағлиған он яшлиқ Әйгерим Муратқызы бош вақит тапсила кийим эскизлирини қураштуруш билән шуғуллинидекән. Бүгүнки фестивальға дәсләпки қетим елип кәлгән «Балауса» коллекцияси – униң бирнәччә жиллиқ әмгигиниң нәтиҗиси. Сөзара шуниму ейтип өтүш керәкки, мәзкүр фестивальда пәқәт яшларғила әмәс, бәлки яшанғанларму яқтуруп кийидиған кийим үлгилири тонуштурулди. Миллийлик арқилиқ миллий урпи-адәтләрни заманивийлаштурушқа беғишланған мәзкүр чарә-тәдбирдә һәрбир дизайнерға ҚХАниң хатирә соғилири тапшурулди. Ахирида ҚХА Рәисиниң орунбасари Леонид Прокопенко сөзгә чиқип, фестивальниң жуқури дәриҗидә өткәнлигини алаһидә тәкитлиди һәм шәхсән өзиниң намидин қатнашқучиларға гүлдәстиләрни тутти.