• Әхбаратлар еқими
• 26 Қыркүйек, 2018

Анилар слети

Ақтөбидә I җумһурийәтлик Анилар слети өткүзүлүп, униңға мәмликәтниң җай-җайлиридин 1200дин ошуқ ханим-қиз қатнашти. Ақтөбә вилайитиниң һакими Бердибек Сапарбаев форумни тәнтәнилик ечиш мәрасимида Қазақстан Җумһурийитиниң Президенти Нурсултан Назарбаевниң слет қатнашқучилириға йоллиған тәбрик хетини оқуп бәрди. “Рухани жаңғыру” программиси даирисидә дәсләпки қетим уюштурулуватқан Анилар слети – бу әнъәнивий аиләвий қәдрийәтләрни мустәһкәмләшкә қаритилған алаһидә муһим чарә-тәдбир. Ана – һәрбир аилиниң, пүткүл дөләтниң таянч-тириги. Қазақстанлиқ аниларниң паравәнлигини, уларниң бәхитлик һаятини вә балилириниң келәчиги үчүн хатирҗәм болушини тәминләш – мениң үчүн асасий мәхсәтләрниң бири. Шуңлашқиму “Қазақстан-2050” Стратегиясидә анилар вә балиларни қоғдаш иҗтимаий сәясәтниң муһим тәркивий қисми болуп елан қилинди”, дәп тәкитлиниду Дөләт рәһбириниң тәбрик хетидә. “Анаға тағзым” форуми “Рухани жаңғыру” программисини әмәлгә ашуруш даирисидә уюштурулди. Униң асасий мавзуси – ханим-қизларниң җәмийәттики иҗтимаий роли вә мәртивисини ашуруш, заманивий аилә, анилар вә балилар проблемилириға диққәтни җәлип қилиш, демографиялик сәясәтни тәрәққий әткүзүш. Учришишниң асасий қатнашқучилири – җамаәтчилик, иҗраий органлар, һөкүмәтлик әмәс тәшкилатлар, бизнес-қурулумлар вәкиллири. Уларниң арисида мәдәнийәт, спорт, тиҗарәт, билим бериш, илим-пән саһалирини тәрәққий әткүзүшкә чоң һәссә қошқан ханим-қизлар, көпбалилиқ анилар бар. Форумға пәхрий меһманлар сүпитидә СССР хәлиқ артисти Бибигүл Төлегенова, Социалистик Әмгәк Қәһримани Вера Сидорова, Қазақстан Җумһурийити Пәнләр академиясиниң академиги Раиса Кузденбаева, Қазақстан Җумһурийитиниң балилар һоқуқи бойичә вәкили Сәуле Айтбаева, этнограф Зейнеп Ахметова, атақлиқ шаирә Марфуға Айтхожина, язғучи, җәмийәт әрбаби Алтыншаш Жағанова, Қазақстан Җумһурийитиниң хизмәт көрсәткән әрбаби Татьяна Бурмистрова вә башқиму атақлиқ шәхсләр тәклип қилинди. Шу нәрсә алаһидә рәмзгә егә болуватидуки, мошу муһим миқияслиқ чарә-тәдбир даирисидә Ақтөбидә Қазақстандики биринчи надир объект – “Анаға тағзым” мәнивий-әхлақий тәрбийә мәркизи ечилди. Мәзкүр лайиһә “Туған жерге тағзым” акцияси даирисидә әмәлгә ашурулди. Мәркәз паалийити ханим-қизларниң аилидики ролини күчәйтишкә, миллий әнъәниләр вә урпи-адәтләрни һесапқа елип кәлгүси аниларни тәрбийиләшкә қаритилиду. Слет ишиниң йәкүни бойичә, униңға қатнашқучилар барлиқ қазақстанлиқларға мәхсус мураҗиәт қобул қилип, бирлишип күч чиқириш арқилиқ аилә институтини мустәһкәмләшкә, анилар вә балиларни қоллап-қувәтләшкә, өсүватқан әвлатни тәрбийиләшкә мунасип һәссә қошушқа чақирди. Форум даирисидә шундақла секция мәҗлислири, “Аләмни тәврәткән ана” мавзусида чарә-тәдбирләр өткүзүлди. Т.Ахтанов намидики вилайәтлик драма театрида слет делегатлири үчүн “Бир түп алма” спектакли қоюлди.