• Әхбаратлар еқими
• 03 Қазан, 2018

Мәктәптә хиҗаб кийишкә болмайду

Қазақстан Җумһурийитиниң әхбарат вә коммуникацияләр министри Дәурен Абаев мәктәпләрдә хиҗаб кийишкә мунасивәтлик изаһ бәрди. “Қазақстанда оттура мәктәпләрдә билим бериш тоғрилиқ қанунға мувапиқ, мәҗбурий мәктәп формуси җарий қилинди. Мәктәп формисини кийишниң өзи қандақту-бир башқа элементларни, җүмлидин диний элементларни пайдиланмаслиқни көздә тутиду. Башқичә ейтқанда, қанун дәрискә хиҗаб кийип яки яғлиқ теңипла әмәс, бәлки қандақту-бир субмәдәнийәткә характерлиқ кийим кийип келишни мәнъий қилиду. Шуңлашқа буниңда һакимийәт орунлири һәрикәтлириниң қанунға мувапиқ яки мувапиқ әмәслиги тоғрилиқ мәсилә болмаслиғи керәк. Наһийә мәмурийити вә мәктәп рәһбәрлиги пәқәт қанунға риайә қилған. Мениң билишимчә, ата-анилар билән чүшәндүрүш ишлири жүргүзүлди вә оқуғучи қизлар мәктәпкә хиҗаб киймәйдиған болди” деди министр “Диалог” программисида. “Келиңлар, мәсилини айдиңлаштурувалайли. Бу йәрдә сөз қандақту-бир динға бағлиқ қисим көрситиш вә диний сезимларни камситиш тоғрилиқ болмайватиду. Билим бериш мәһкимисиниң сиртида һәрким өзи қандақ дәп тапса, шундақ кийинәләйду. Қазақстанда динға етиқат қилиш үчүн надир вә наһайити яхши шараит яритилған, ойлаймәнки, буниңға һәммиси қошулиду. Конституциягә мувапиқ, дөлитимиз зайирлиқ дөләт болуп һесаплиниду. Мәктәп – биринчи новәттә, дөләт мәһкимиси”, дәп тәкитлиди Дәурен Абаев. Шуңлашқа, униң сөзичә, диний кийим кийиш, нәқ билим бериш системисиниң зайирлиқ принципиға хилаплиқ қилмақта. Министр көп әһвалларда балиларниң хиҗаб кийишиниң көп әһвалларда уларниң ата-анилириниң хаһиши екәнлигини тәкитлиди. “Әгәр сиртқи көрүнүшниң өзи ички дуниясини көрситиш усуллириниң бири болуп һесаплинидиғанлиғини етиварға алсақ, психологлар оқуғучи қизлар билән сөһбәтләшкәндин кейин, диний кийим кийишниң көп әһвалларда балиниң әмәс, бәлки ата-аниларниң хаһиши екәнлиги ениқланди”, дәп қошумчә қилди Дәурен Абаев. Министр дөләтниң адәмгә қандақ кийим кийиш керәклигини, қандақ кийимни кийишкә болмайдиғанлиғини үгитип, униң шәхсий һаятиға арилашмайдиғанлиғиға диққәт ағдурди.