• Йеңилиқлар
• 03 Қазан, 2018

Қазақстан Җумһурийити Президентиниң “Түркстан шәһирини түрк дуниясиниң мәдәний-роһий мәркизи сүпитидә тәрәққий әткүзүш бойичә Баш план концепциясини мақуллаш тоғрилиқ” Пәрманиға изаһәт

Дөләт рәһбириниң 2018-жил 19-июньдики №702-Пәрманиға мувапиқ, Түркстан шәһири Қазақстан Җумһурийити Түркстан вилайитиниң мәмурий мәркизи болуп елан қилинди, бу Түркстан шәһирини түрк дуниясиниң мәдәний-роһий мәркизи сүпитидә тәрәққий әткүзүш бойичә Баш план концепциясини (буниңдин кейин – Концепция) ишләп чиқиш үчүн асас болди. 2000-жили ЮНЕСКОниң қарари билән шәһәр өзиниң 1500 жиллиғини нишанлиди. 2017-жили Хәлиқара Түрк мәдәнийити тәшкилатиға (ТҮРКСОЙ) әза мәмликәтләрниң мәдәнийәт министрлири дайимий кеңишиниң 34-мәҗлисидә Түркстан түрк дуниясиниң мәдәний пайтәхти, дәп етирап қилинди. Концепцияниң баш мәхсити шәһәрни тарихий-мәдәний вә роһий мирасиниң сақлинип қелишини тәминләйдиған түрк дуниясиниң мәркизи сүпитидә шәһәрни техиму тәрәққий әткүзүшниң асасий йөнилишлирини ениқлаш, шундақла Түркстанни муһим регионлуқ тәрәққият мәркизи сүпитидә шәкилләндүрүштин ибарәт. Концепциядә Түркстан шәһириниң хәлиқара туристик вә регионлуқ нәзәрдин истиқбали бәлгүләнди, шәһәрни иҗтимаий-ихтисадий иқтидарни, территорияни истиқбаллиқ планлиқ уюштурушни, униң шәһәр қурулуши зонилириға бөлүшини, очуқ җәмийәтлик кәңликләр, тарихий-тематикилиқ парк, экологиялик стандартлар, турушлуқ өй-коммунал инфрақурулум системисини вуҗутқа кәлтүрүшни өз ичигә алидиған, аһалиниң узақ муддәтлик вақитқа көпийишини һесапқа алидиған комплекслиқ тәрәққий әткүзүш көздә тутулуватиду. Истиқбалда Түркстан шәһири дуниявий дәриҗидики туризм вә зиярәт қилиш мәркәзлири охшаш мәмурий-ишчанлиқ, роһий, мәдәний вә туристик мәркәз сүпитидә шәкиллиниду. Оттура Азия территориясидә Улуқ Ипәк йоли туристик маршрутиниң тиклиниши ихтисадий тәрәққиятқа асас болиду. Түркстанда шәһәрниң магистральлири йенидики наһийәләрдә җәмийәтлик мәркәзләрни қуруш арқилиқ “көпмәркәзлик” система тәминлиниду. Һәрбир наһийәдә иш, билим вә дәм елиш үчүн қолайлиқ турушлуқ шараит һәм тегишлик имканийәт тәминлиниду. Йеңи йөнилишләрни шәһәр ихтисадиниң турақлиқ тәрәққий етишигә җарий қилиш йеңи карханилар билән мәһсулат сетиш базарлирини кәңәйтиш вә вуҗутқа кәлтүрүшкә, аһалиниң кирими вә паравәнлигиниң ешишиға ярдәм қилиду. Концепциядә шәһәрниң транспорт-транзит иқтидарини ашуруш вә униң турақлиқ тәрәққий етишини тәминләш мәхситидә инфрақурулумни күчәйтиш планланди. Президент Мәмурийитиниң Дөләт назарити вә тәшкилий-территориялик уюштуруш иши бөлүми.